Jeremia 46:10 - O Debleskro Lab 2024 (Sinte-Manouche)

¹⁰ Kava hi o dives o baro Deblestar, kay hi o ray pral o bolepen oun i phoub. Ap ko dives dell lo kolen, kay kamenn les gar, kova pale, hoy yon ap leskre menshende kran. Leskro rharo rhal len, bis te hi lo čalo, oun vell mato lengro rateha. Yon hi har firhe, kay maredo venn o baro Debleske, kova, kay hi o ray pral o bolepen oun i phoub. Yob moukell len moulo te dell pash o pani Eufrat an o them, hoy kote čiddo hi, kay norden hi.

O Debleskro Drom 2021 (Sinte)

¹⁰ Kawa hi o diwes o baro Deblestar, kai hi o rai pral o bolepen un i phub. Ap ko diwes dell lo kolen, kai kamenn les gar, kowa pale, hoi jon ap leskre menshende kran. Leskro charo chal len, bis te hi lo tchalo, un well mato lengro rateha. Jon hi har vieche, kai maredo wenn o baro Debleske, kowa, kai hi o rai pral o bolepen un i phub. Job mukell len mulo te dell pash o pani Eufrat an o them, hoi kote tchiddo hi, kai norden hi.

Jeremia 46:10 Iomraidhean Croise

2. Rajengro liil 24:7

Oun o baro ray pral o them Egiptia djas bouder gar dran peskro them vin. O baro ray pral o them Babilonia las leske halauter krik, hoy lo peske dren las: o tselo them mank o them Egiptia oun o pani Eufrat.

Hiob 24:1

Hoske dell o zorelo Devel kek tsirya, kay rakrell lo o čačepen vin pral i čilačende? Kolla, kay les prindjrenn, dikenn gar, har oun kaana yob kova krell.

Jesaja 13:6

Rovenn, o dives, kay o baro Debleskri rholi vell, hi bouder gar dour. Ap ko dives anell o zorelo Devel bari bibarht pral t'mende.

Jesaja 2:12

Leskro dives vella, ko dives o baro Deblestar, ko rayestar pral o bolepen oun i phoub. Ap ko dives vell hako pre-phourdo tiknes kerdo, ninna hakeno, kay hadas pes, hakeno kay kras pes bares.

Jesaja 31:8

I Assirya venn dino o rhareha. Kek rharo, hoy i mensho hadell, marell len. Na-a, o Debleskro rharo dell len moulo. Oun yon nashenn penge glan ko rharo, oun lengre terne morsha venn tapedo oun venn pandle boudepangre.

Jesaja 61:2

Me vom bičedo, te dap vin gole, te vas ko bersh, kay sikrell o baro Devel peskro lačepen ap peskre menshende. Ninna vas ko dives, kay dell maro Devel hakenes ko čilačepen pale, hoy yob ap o them Youda kras. Yob bičras man, te khossap i sva tele kolenge, kay kanna rovenn.

Jesaja 63:4

An miro dji vas o dives, kay dau hakenes pale, hoy lo kras. Oun ko bersh vas, kay lau mire menshen dran o čilačepen vin.

Jeremia 12:12

Pral ko nango pralstouno them venn kol kourepangre, kay denn lauter khetne. O baro Devel anas len kay, te kourenn le pen i menshentsa an o tselo them, yek rigyatar bis ap i vavar. Oun kek nay nashell peske lendar.

Jeremia 46:14

Denn vin gole an o them Egiptia! Penenn i menshenge an i forya Migdol, Memfis oun Tapanes: Kourenn t'men kolentsa, kay ap t'mende pre djan! O rharo rhal kolen, kay troul t'mende hi.

Jeremia 46:2

An o starto bersh, har o Yoyakim, koleskro dad o Yosia his, ko baro ray pral o them Youda his, rakras o baro Devel pral o them Egiptia. Koy his i lourde o Faraestar Neko, ko baro ray pral o them Egiptia, pash o pani Eufrat tardo pash o foro Karkemish. Oun o Neboukadnezar, ko baro ray dran o them Babilonia, kouras pes lentsa oun das len.

Jeremia 46:6

Kova kay sik hi, nay nashell peske gar. Oun kova kay zorelo hi, vell tapedo. Kote, an o nordetikro them pash o pani Eufrat peran le, oun ačenn le moulo čiddo.

Jeremia 50:15

Denn i kourepaskri gole haki rigyatar! Dikenn, o foro dell pre! Leskre turme phagenn khetne. Leskre massurya hi tele phagedo. O baro Devel dell o foro Babilon peskri phagi. Denn o foreske halauter pale pale, hoy kava foro ninna kras!

Jeremia 50:18

Doleske penell o baro Devel, ko ray pral o bolepen oun i phoub, kay o Israeleskro Devel hi: Čačepah, me dau o rayes pral o them Babilonia oun leskro them pengri phagi, yaake har dom o rayes pral o them Assour peskri phagi.

Jeremia 51:6

Nashenn sik dran o foro Babilon, nashenn t'maro djipaske! te djan gar halauter tele an koy doosh, hoy kava foro ap peste anas! Kova hi o baro Debleskro tsiro, kay dell lo i Babilonaryen ko čilačepen pale, hoy kolla kran.

Ezekiel 21:28

I menshenge an o foro Yerusalem vell kova glan har i rhorheno dourkepen. O baro ray dran Babilonia krals lentsa vin, te krell lo lenge či, oun dals peskro vast koy pre. Kanna te vell yob pral lende, vell lenge an o shero, te rikran yon gar dren, hoy le leha vin kran. Oun yon venn tapedo.

Joel 1:15

Havo bibarhtelo tsiro! O dives, kay o baro Debleskri rholi vell, hi bouder gar dour. Ap ko dives anell o zorelo Devel bari bibarht pral mende.

Joel 2:1

Phourdenn an i phourdepangre! Denn bares gole ap miri berga, koy berga Sion! Trashenn, t'mer lauter, kay djivenn an o them Youda! O dives o baro Deblestar vella sik!

Zakarie 6:6

I kale graya djan ap i servi rig, i parne graya djan ap i rig, kay o kham tele djal, oun i kalo-parne graya djan ap i čači rig.

Louka 21:22

An kol divessa vell o Debleskri rholi ap i menshende tele. Palle vell lauter čačo, hoy an o Debleskro lab činlo hi.

5. Mose 32:42

Kol fayle, kolentsa karye dau, lendar perell o rat tele – ko rat kolendar, kay me moulo dau, ninna kol pandlendar. Miro rharo rhal o mass kolendar, kay kouran pen mantsa, oun dell lengre sherya paash.