Jeremia 4:1 - O Debleskro Lab 2024 (Sinte-Manouche)

¹ O baro Devel penell: T'mer Israelitarya, te kamenn t'maro čilačo drom te moukell, palle avenn pash mande! Te lenn t'mer kol djoungele deblen glan mire yaka krik, hounte nashenn bouder gar yek rigyatar ap i vavar.

O Debleskro Drom 2021 (Sinte)

¹ O baro Dewel penell: Tumer Israelitarja, te kamenn tumaro tchilatcho drom te mukell, palle awenn pash mande! Te lenn tumer kol djungele deblen glan mire jaka krik, hunte nashenn buder gar jek rigjatar ap i wawar.

Jeremia 4:1 Iomraidhean Croise

1. Mose 35:2

Koy penas o Yakob ap peskri familya oun ap lauterende, kay pash leste his: “Čivenn t'mendar krik kol deblen dran barra oun kashta, hoy t'mer an-mangenna! Thovenn t'men oun rivenn t'men djoudje ripya an!

2. Rajengro liil 23:13

Ninna kras lo kol moulne platse pale-čiddo, hoy kras o Salomo, ko baro ray pral Israel. Kolla his tardo ap koy rig o forestar Yerusalem, kay o kham pre-djal, ap i čači rig o djeteskri bergatar. O Salomo kras len, te venn kote kol djoungele moule debla an-mangedo: i Astarte, koy debletsa dran Sidon; oun o Kemosh, ko devel dran o them Moab; oun o Milkom, ko devel dran o them Ammon.

2. Rajengro liil 23:24

Ninna tradas o Yosia i tsele dravepangren krik, oun kolen, kay i moulen poučenn, oun moukas i khereskre deblen oun i vavar rhorhene deblen krik te anell dran o them Youda oun dran o foro Yerusalem. Kova kras lo, te vell halauter yaake kerdo, har činlo hi an ko liil, kay lenge o Debleskro drom siklo vell, – ko liil, hoy o rashay Hilkiya an o baro Debleskro kheer hatsas.

2. Familjakro liil 15:8

Oun har o Asa kava rakepen shounas, hoy o Debleskro rakepaskro, o Asarya, glan-vi penas, vas les zoor. Oun yob moukas dran ko tselo them Youda oun Benyamin oun dran kol forya, hoy yob dren las ap i berge Efrayim kol djoungele figuren krik te anell, hoy i menshe an-mangan. Oun yob moukas o sonakaskro bob neves te krell, kay soungepaskro koova o baro Debleske rhačedo vell. Kova his tardo glan i bari glanstouni isema o baro Debleskro kherestar.

2. Familjakro liil 33:8

Oun me kamau te djan i Israelitarya bouder gar krik dran kava them, kay me dom lengre phourende, yaake rah yon halauter krenna, hoy me lenge penom, oun miro tselo drom djan, oun mire laba rikrenn oun pal miro čačepen djivenn, yaake har sikras len o Mose.”

2. Familjakro liil 34:33

Oun o Yosia vitsras i tsele djoungele rhorhene deblen dran o tselo them vin, kay i Israelitarya djivan, oun kras, te mangan le halauter o baro Debles an, kay lengro Devel hi. Yaake rah, har o Yosia djivas, moukan le gar o baro Debles, ko Debles, koles ninna lengre phoure an-mangan.

Jesaja 31:6

T'mer Israelitarya, rissrenn trouyel pash o baro Debleste, kolestar t'mer yaake dour tele peran!

Jeremia 15:19

Doleske penell o baro Devel: Te rikreh tou tout ap mande, rikrau me man ap toute, oun tou ačeh miro rakepaskro. Te rakreh tou, hoy mishto hi, oun rakreh gar, hoy či-moldo hi, hal tou miro mouy. Yon hounte venn pash toute, tou djas gar pash lende!

Jeremia 15:4

I tsele menshe ap i phoub denn i vasta pral o shero khetne, te dikenn yon kova. Koya hi koy phagi koleske, hoy ko baro ray Manasse an Yerusalem kras. Leskro dad hi o Hiskiya, ko baro ray pral Youda.

Jeremia 18:11

Oun kanna Yeremia, pen kol menshenge an Youda oun kolenge, kay djivenn an Yerusalem: Kova penell o baro Devel: Djinenn, man hi an o dji, te dap t'men i phagi, oun kamau bibarht pral t'mende te anell. Doleske djan tele hakeno peskro čilačo dromestar! Oun djivenn i vavar djipen!

Jeremia 24:9

Me anau savi bibarht pral lende, te ačell i menshenge an i tsele themma ap kay phoub o rakepen krik. Kote, kay len tradau, venn le sapaske oun praasepaske. Te kamell yek o vavares te praasell, penell lo: Touke te djal har kol menshenge dran Yerusalem oun Youda!

Jeremia 25:5

Yob moukas t'menge te penell: “Djan tele, hakeno leskro čilačo dromestar! Moukenn t'maro čilačo koova! Te venn pale ap o čačo drom, nay ačenn an ko them, hoy dom me t'mende oun t'mare phourende, kanna oun hako tsireske.

Jeremia 3:1

O baro Devel penas: Te bičras i morsh peskri romyat krik, oun yoy djal pash i vavar morsheste, nay lell yob lat gar pale. Palle vals ko them pale-čiddo. Tou dal tout trouyel boudentsa, oun kameh pale pash mande te vell?

Jeremia 3:12

Dja koy oun de kol laba gole ap kolende, kay djivenn an o norden oun pen: “Tou Israel, kay djal mandar krik, am pale”, penas o baro Devel. Palle kamau bouder gar rhoyedo ap t'mende te dikell. Man hi i dji t'menge, oun kamau gar hako tsiro rhoyedo te vell ap t'mende.

Jeremia 3:14

Avenn pale, t'mer čave, kay nashan mandar krik, penell o baro Devel. Me hom t'maro ray. Me kamau t'mendar te lell yekes dran hako foro oun douy dran haki familya, oun kamau t'men an Sion te anell.

Jeremia 3:22

Avenn pale pale, t'mer kay djan t'menge mandar! Oun me kamau lauter bistrell, hoy kran. Dik, mer vah pash toute. Tou hal o baro Devel, maro ray.

Jeremia 35:15

Me bičrom t'menge pale te pale mire rakepangre, kay mange boudrenn, oun moukom t'menge te penell: Djan tele, hakeno peskro čilačo dromestar! Moukenn t'maro čilačo koova, oun nashenn bouder gar moule deblenge palla, te mangenn len an! Palle nay ačenn an kava them, hoy me t'menge oun t'mare phourenge dom. T'mer dan gar yak ap mire laba oun shounan gar ap mande.

Jeremia 36:3

Te shounenn i menshe dran Youda, havi bibarht kamau pral lende te anell, nay vell, te moukenn le pengro čilačo drom oun venn pale pash mande, te nay lap lengri doosh oun lengro čilačepen lendar krik.

Jeremia 4:4

Rikrenn t'men ap i laba, hoy t'mentsa vin krom! Oun krenn t'mare djia mange pre, t'mer menshe an Youda oun Yerusalem. Te krenn kova gar, vell miri rholi pral t'mende har yag, oun rhačella yaake, te nay krell kek koy yag vin.

Jeremia 7:3

Kova penell o baro Devel, ko ray pral o bolepen oun i phoub, – yob hi o Israeleskro Devel: Moukenn t'maro phouro drom oun t'maro phouro djipen, palle moukau t'men an kava them te djivell.

Jeremia 7:5

Moukenn t'maro phouro drom oun t'maro phouro djipen, oun avenn lačo ap hakeneste!

Jeremia 7:7

Palle kamau me hako tsiro pash t'mende djivell ap kay platsa, an kava them, hoy me t'mare phourende dom.

Ezekiel 11:18

Te venn le kote khere, vitsrenn le kol tsele rhorhene deblen oun djoungele figuren vin dran o them.

Ezekiel 18:13

Te patsell lo love vin, lell lo peske boudeder love pale. Nay ačell savo mensho djido? Na-a! Koon savo djoungelo koova kras, hounte merell. Yob hounte lell peskri phagi!

Ezekiel 43:9

Kanna mangenn le bouder gar vavar deblen an. Oun pengre moule bare rayen rikrenn le dour mandar. Oun me djivau mashkral lende hako tsireske.

Hosea 14:1

I menshe an o foro Samaria lenn pengri phagi. Yon moukan pen či te penell pengro Deblestar. Doleske venn le o rhareha maredo. Oun lengre tikne čave venn moulo dino. Oun i djouvya, kay lenn i čavo, venn pre činle.

Hosea 2:2

Palle venn i menshe dran o them Youda oun i menshe dran o them Israel khetne. Oun khetne rodenn le penge yek pralstounes vin, te vell lo o ray pral lende. Oun yon djivenna an o tselo them. Havo baro dives vell ko dives, kay djal yaake, har o lab Yesreel kharell!

Hosea 7:16

Yon rissrenn pash i debleste, koles kek zoor hi. Yon hi har i bango bogo, koleha kek faylo kote djal, kay te djal lo. Lengre pralstoune hi bare mouyengre. Doleske venn le maredo o rhareha. Palle san i Egiptarya pral lende.

Joel 2:12

“Ninna kanna”, penell o baro Devel, “nay moukenn t'maro čilačo drom oun venn pash mande. Avenn t'maro tselo djiyeha, rhan či oun rovenn, denn gole i bibarhtyatar!

Zakarie 1:4

Ma avenn har t'mare phoure! Glan boud bersha penan lenge mire rakepangre mire laba oun penan: Kava penell o baro Devel, ko ray pral o bolepen oun i phoub: Moukenn t'mare čilače dromma! Ma krenn bouder gar čilačo koova! Yon shounan gar ap mande oun kran gar, hoy lenge penom.

5. Mose 27:15

“Praasedo vell kova, kay krell pes i sasterni figura, ninna i kashteni figura, te mangell lo lat čorrhanes an! Savi figura kerdi mensheskre vastentsa hi djoungeles glan o baro Debleskre yaka.” Oun i tsele menshe hounte penenn: Amen!

5. Mose 4:30

An ko tsiro, hoy vella, kay ap t'mende ko tselo koova vas, hoy t'menge penom, an kol djoungele phare divessa venn t'mer pale pash t'maro baro Debleste, oun krenn, hoy yob t'menge penell.

Josua 24:14

Oun o Yosua penas doureder: “Pash halauter, hoy krenn, rikrenn t'menge o baro Debles glan i yaka! Mangenn les an i djoudjo oun čačo djiyeha! Čivenn i rhorhene deblen krik, kolen t'mare phoure an-mangan, har his le ap i vavar rig o panyestar Eufrat oun an o them Egiptia. Mangenn kokres o baro Debles an!

Čačepangre 10:16

Oun yon vitsran kol vavar deblen pendar krik oun mangan o baro Debles an. Koy khaytas les, te vell o Israeleske yaake pharo kerdo.”

1. Samuel 7:3

Kote penas o Samuel ap lende: “Te kamenn t'mer t'maro tselo djiyeha pale ap o baro Debleskro drom te djal, palle čivenn i rhorhene deblen t'mendar krik, ninna i debletsa Astarte! Patsenn ap o baro Debleste, oun mangenn les kokres an oun kek vavares! Palle lell yob t'men vin dran i vasta i Filistarendar.”