Jeremia 24:10 - O Debleskro Lab 2024 (Sinte-Manouche)

¹⁰ Me anau kourepen, bok oun nasslepen mank lende, bis te kek lendar pral ačas an kava them, hoy dom len oun lengre phourende.

O Debleskro Drom 2021 (Sinte)

¹⁰ Me anau kurepen, bok un nasslepen mank lende, bis te kek lendar pral atchas an kau them, hoi dom len un lengre phurende.

Jeremia 24:10 Iomraidhean Croise

1. Rajengro liil 14:15

Oun o baro Devel dell i menshende Israel dava, te trissenn le, har trissell i shilftikro khass an o pani. Oun o baro Devel tserdell i Israelitaryen vin dran kava lačo them, hoy das yob lengre phourende. Oun i Israelitarya venn tradedo ap i vavar rig o panyestar Eufrat. Yon rhoyran o baro Debles, har kran le penge save figure, hoy sikrenn i debletsa Ashera.

Jesaja 51:19

Kal douy koova van ap toute: Tiro them vas paash dino oun tire forya tele-phagedo. Boud tire menshendar meran i bokatar oun an o kourepen. Oun kek hi koy, te rovell lo touha, te penell lo touke lače laba.

Jeremia 14:12

Yon nay rikrenn pen pale o rhapastar, oun rovenn ap mande yaake boud har kamenn le, me shounau len gar. Ninna te rhačrenn yon mange firhen oun rhapen, dikau gar lačes ap lende. Me marau len an o kourepen, ninna i bok oun o nasslepen marenn le.

Jeremia 15:2

Oun te poučenn yon toutar: Kay djas mer, pen lenge: O baro Devel penell: Ap koneste o merepen vella, ap koleste vell lo. Koon moulo dino vella i rhareha, kova vell moulo dino. Pral koneste i bok vella, kova merella i bokatar. Koon pandlo vella, kova vell pandlo.

Jeremia 16:4

Lendar hounte merenn ap pharo nasslepen, oun kek rovell pral lende oun paskrell len. Yon ačenn čiddo ap i harhetikri phoub har firhengro foul. Vavar merenn an o kourepen. Oun ninna vavar merenn i bokatar. Oun i čirkle oun i divye firhe rhan len pre.

Jeremia 19:7

Hoy kol menshe an o them Youda oun an Yerusalem penge glan lenn, moukau me gar te vell. Me moukau kolen pral lende te vell, kay kamenn len te marell, oun krau, te venn le moulo dino o rhareha. Oun kol moulen dau i čirklende oun i divye firhende rhapaske.

Jeremia 21:9

Koon an kava foro ačella, hounte merella an o kourepen, i bokatar, oun ap i pharo nasslepen. Koon vin djala oun pash kol Kaldearya nashella, kay troul t'maro foro tardo hi, kova ačell djido. Leske ačell či har peskro djipen.

Jeremia 27:8

Kanna penau t'menge, te hounte krenn t'mer, hoy kamell o baro ray dran Babilonia t'mendar, yaake har hounte krell i gouroum, koles i kasht troul leskri meen hi, kova, hoy leskro ray kamell. Hako them peskre menshentsa, hoy kamell kova gar te krell, koles dau i phagi. Leskre menshe hounte merenn an o kourepen, i bokatar oun dran nasslepen, bis te moukau o Neboukadnezares ko them dren te lell.

Jeremia 29:17

O baro Devel, ko ray pral o bolepen oun i phoub penell: Me bičrau kourepen, bok oun nasslepen mank lende, oun krau lentsa, har te vans le djoungele fayge, hoy nay rhal kek.

Jeremia 29:18

O kourepen, i bok oun o nasslepen lenn len palla. Oun i menshe dran i tsele themma ap kay phoub denn i vasta khetne pral o shero, te dikenn le len. An hako them, kay tradau len, dikenn le ap lende har ap praasede menshende, kolendar darenn le. Oun yon denn shol pral lende oun praasenn len.

Jeremia 32:24

I Babilonarya hi troul o foro tardo, oun čivan phoub pre, te krenn le i drom, te nay djan le an o foro dren. Kava drom djal bis pash o foreste. Sik hounte perell o foro an lengre vasta. Oun i menshendar koy dren merenn boud i bokatar oun ap o djoungelo nasslepen. Oun vavar venn maredo o rhareha. Yaake har tou kova penal, yaake vas ninna; tou nay dikeh kokres, har hi.

Jeremia 32:25

Oun tou, baro Devel, miro ray, peneh ap mande: Gin touke i kotar them, oun playse kol love, te vell lo toute! Oun le morshen pashel, te dikenn le halauter, har tou gineh ko kotar them. Kova penal, ninna te vell kava foro an o vast i menshendar dran o them Babilonia dino!

Jeremia 34:17

Doleske penell o baro Devel: T'mer shounan gar ap mande oun moukan t'mare phralen oun phenyen gar vin te djal, kay ninna Israelitarya hi har t'mer, doleske moukau me, o baro Devel t'men te djal, te venn maredo o rhareha, merenn ap o djoungelo nasslepen oun i bokatar. Te dikenn i menshe an tsele themma ap i phoub, hoy t'mentsa djal, denn le i vasta pral o shero khetne.

Jeremia 42:17

Hi koon hi: Kova kay krell pes ap o drom te djal lo an o them Egiptia, oun te djivell lo kote, kova merell o rhareha, i bokatar oun o djoungelo nasslepah. Oun kek ačell djido lendar. Oun kek nay nashell dran koy bibarht, hoy kamau me pral lende te anell.

Jeremia 42:22

Doleske shounenn oun djinenn: Mank t'mende hi save, kay venn maredo o rhareha, vavar merenn i bokatar oun o djoungelo nasslepah kote, kay djan koy, te djivenn kote.

Jeremia 5:12

Yon penan rhorhepen pral o baro Debleste, oun penan: Kova krell yob gar! Yaake djoungelo djal menge gar! Kourepen oun bok vell gar pash mende.

Jeremia 9:15

Me tradau len krik pash menshende, kay prindjrenn yon gar, vitar gar lengre phoure, oun kamau o rharo pal lende bičrell, bis te yon lauter moulo hi.

Jeremia 9:16

O baro Devel, ko ray pral o bolepen oun i phoub, penell: Denn garda ap kova, hoy vella! Denn kol djouvyen gole, kay i baro ropen krenna! Bičrenn pal kolende, kay hayvenn ropaskre gilya te givenn!

Ezekiel 33:27

Yaake peness tou lenge: Kava penell o baro Devel, maro ray: Pash miro djipen dau man sovel, halauter, kay an kol tele phagede forya djivenn, venn maredo o rhareha. Oun kolla, kay vin ap o them djivenn, venn khetne dandedo i divye firhendar. Oun kolla, kay khatrenn pen an zorele barrengre khera oun an i phoub, kolla merenn ap i djoungelo nasslepen.

Ezekiel 6:11

Oun o baro Devel, miro ray, penas ap mande: De an tire vasta oun stake tire heryentsa zoreles pre, oun de vin gole: Havi bibarht vell pral i menshende Israel dran ko boud djoungelo koova, hoy yon kran! O rhareha oun i bokatar oun ap i pharo nasslepen hounte merenn le.

Ezekiel 7:15

Glan o foro hi kol lourde, kay kamenn i Israelitaryen te marell. An o foro hi i pharo nasslepen oun bok. Koon vin glan o foro hi, kova vell o rhareha maredo. Oun koon an o foro dren hi, merell ap o pharo nasslepen oun i bokatar.

5. Mose 28:21

O baro Devel moukell yek nasslepen pal o vavar ap t'mende te vell, bis te bouder kek t'mendar djivell an ko them, an koleste t'mer van, te lenn les t'menge dren.

Debleskro tsiro 6:8

Oun me dikom i grayes. Kova his parno har i moulo. Oun kova, kay pre beshdo his, koleskro lab his “Moulo.” Oun o merepen vas pal leste. Oun les vas i zoor dino, te marell lo i menshen ap o starto kotar i phoubyatar. O rharo, i divye firhe, i bok oun o nasslepen marenn len.