Jeremia 20:5 - O Debleskro Lab 2024 (Sinte-Manouche)

⁵ Ko tselo bravlepen an kava foro dau me kolen, kay len vin randenn. I tsele love, hoy i menshe an Yerusalem dran pengri boudi khetne anan oun lengro kouč koova oun o tsele bravlepen kol rayendar pral o them Youda lenn le pentsa oun anenn les an o them Babilonia.

O Debleskro Drom 2021 (Sinte)

⁵ Ko tselo brawlepen an kau foro dau me kolen, kai len win randenn. I tsele lowe, hoi i menshe an Jerusalem dran pengri budi khetne anan un lengro kutch koowa un o tsele brawlepen kol rajendar pral o them Juda lenn le pentsa un anenn les an o them Babilonia.

Jeremia 20:5 Iomraidhean Croise

2. Familjakro liil 36:10

Oun har o bersh trouyel his, moukas les o Neboukadnezar an o foro Babilon te anell, oun moukas leha boud kouč koova dran o baro Debleskro kheer te anell, oun čivas leskro kakes, o Sedekya, pral o them Youda oun o foro Yerusalem, te vell lo baro ray.

Jesaja 39:6

Ko tsiro vella, kay halauter an o them Babilonia anlo vella, hoy an tiro kheer hi, oun hoy tire phoure khetne čivan bis ap kava dives. Oun či ačell kate. Kova penell o baro Devel.

Jeremia 12:12

Pral ko nango pralstouno them venn kol kourepangre, kay denn lauter khetne. O baro Devel anas len kay, te kourenn le pen i menshentsa an o tselo them, yek rigyatar bis ap i vavar. Oun kek nay nashell peske lendar.

Jeremia 15:13

[O baro Devel penas:] Youda, me kamau te vell tiro tselo bravlepen touke čoredo, yaake playsreh tou ko čilačepaske, hoy kral an tiro tselo them.

Jeremia 3:24

Har mangam ko djoungelo debles Baal an, nashram lauter, hoy mare phoure penge khetne lan, har terne hams: bakre, groumya, čave oun ča.

Jeremia 32:24

I Babilonarya hi troul o foro tardo, oun čivan phoub pre, te krenn le i drom, te nay djan le an o foro dren. Kava drom djal bis pash o foreste. Sik hounte perell o foro an lengre vasta. Oun i menshendar koy dren merenn boud i bokatar oun ap o djoungelo nasslepen. Oun vavar venn maredo o rhareha. Yaake har tou kova penal, yaake vas ninna; tou nay dikeh kokres, har hi.

Jeremia 39:2

An o deesh-te-yekto bersh, kay o Sedekya baro ray his, ap o enyato dives an o starto čon, phagan yon an o foro dren.

Jeremia 39:8

Kol lourde dran Babilonia rhačran o baro rayeskro kheer oun kol tsele menshengre khera an o foro Yerusalem, oun dan o foreskre massurya tele.

Jeremia 4:20

Yek foro pal i vavar vell dino. O tselo them denn le paash. Ap yek kopo hi mire oun plarhtene khera khetne dino.

Ropaskre gilja 1:10

Oun yon čivan pengre vasta ap lakro tselo kouč koova. Yoy hounte dikas peske yakentsa, har i vavar menshe an lakro Debleskro kheer dren djan. Oun tou, baro Devel, penal, te hounte djan yon gar kote dren.

Ropaskre gilja 1:7

An kava tsiro, kay i menshenge dran Yerusalem djoungeles djal, oun yon kate te kote tradedo hi, vell lenge ko boud lačo koova an o shero, hoy len an o phouro tsiro his. Har yon an i vasta kol čilačendar peran, vas lenge kek ap i rig. Kol vavar menshe dikan ap lende tele, oun san, har o foro tele djas.

Ropaskre gilja 4:12

Kanna vas, hoy i bare raya pral i themma gar patsans, vitar gar i tsele menshe ap kay phoub: Lourde dran vavar themma, kay kaman maro them dren te lell, djan an i voudya o forestar Yerusalem dren.

Ezekiel 22:25

Tire raya hi mank toute har leve, kay denn gole, har dandrenn le firhen khetne. Yon marenn menshen, čorenn penge bravlepen khetne, oun krenn, te nashrenn boud romya an o them pengre romen.

Daniel 1:2

Oun o baro Devel, maro ray, das o Yoyakimes, ko baro rayes pral o them Youda, an o vast o baro rayestar dran o them Babilonia. Ninna ko shoukar koova, hoy an o Debleskro kheer his, kolestar peras an leskre vasta. Oun yob anas kova an o them Shinar, an o kheer leskro deblestar. Oun čivas les pash ko bravlepen leskro deblestar pashel.

Hosea 13:15

Ninna te hi o Efrayim mank peskre phralende har i zenelo rouk, hoy hidjrell lače roukengre, bičrell o baro Devel i tato dourho, hoy vell kotar, kay o kham pre djal. Dran o moulo tato them vell lo, oun krell, te venn i tsele panya trouk. Oun yob lell leskro tselo bravlepen lestar krik, – ko tselo kouč koova.