Jeremia 2:36 - O Debleskro Lab 2024 (Sinte-Manouche)

³⁶ Har sik djal tou kay te koy, te rodess touke menshen, kay krenn pen touha khetne? O them Egiptia nay vell tout gar feteder ap i rig har o them Assour.

O Debleskro Drom 2021 (Sinte)

³⁶ Har sik djal tu kai te koi, te rodess tuke menshen, kai krenn pen tuha khetne? O them Egiptia nai well tut gar feteder ap i rig har o them Assur.

Jeremia 2:36 Iomraidhean Croise

2. Familjakro liil 28:16

An ko tsiro peran i Edomarya pale an o them Youda dren, kouran pen i menshentsa koy oun lan boud lendar pandles pentsa krik. Yaake bičras o baro ray Ahas morshen pash o baro rayeste an o them Assour, te vell yob leske ap i rig.

Jesaja 20:5

Palle lenn kolla bari daar oun traash, kay patsan, te venn i lourde dran Etiopia lenge ap i rig, oun kay sharan pen, te denn i Egiptarya yak ap lende.

Jeremia 2:18

Hoy hi tout kolestar, te djah an o them Egiptia, oun kameh koy dran o pani Nil te piyell? Oun hoy hi tout kolestar, te djah tou an o them Assour oun kameh dran o pani Eufrat te piyell?

Jeremia 2:23

Har nay peneh tou: Me krom man gar pale-čiddo? Me nashom gar kol deblenge palla, hoy kharenn Baal. Dik ap toute, hoy tou kreh an i tala! Ma biste, har djival! Har i khamela, kay hi bipandlo, nasheh tou trouyel,

Jeremia 2:33

Har sik hatseh tou i drom, te less touke i vavar pirnes! Oun yaake djas tou pale te pale ap čilače dromma.

Jeremia 22:20

T'mer menshe dran Yerusalem, djan pre ap i berga Libanon, oun denn gole! Rovenn ap i berge Bashan! Oun denn zoreles gole ap i berge Abarim! T'mare tsele mala, kay kote djivan, van dino, oun hi bouder gar koy.

Jeremia 22:22

Tire pralstoune venn krik anlo, har te vans le krik phourdedo i zorelo dourhestar. Oun tire mala hounte djan pandles an i vavar them. Yaake vell ladj pral toute, oun tou veh sapaske i vavarenge. Kova vell pral toute tiro tselo čilačepaske.

Jeremia 31:22

Har rah kameh te nashess trouyel, tou, miri čay, kay moukal miro drom? O baro Devel krell čomone neves ap i phoub: I romni hi pash peskro romeste.

Jeremia 37:7

Kova penell o baro Devel, kay o Israeleskro Devel hi: Pen o baro rayeske dran o them Youda, kova kay bičras t'men pash mande, te poučenn man: Kol lourde o Faraestar, kay djan vin dran pengro them, te venn le ap t'mari rig, kolla djan pale khere an o them Egiptia.

Jeremia 46:12

Tiri ladj vas an i vavar themma vin gole dino. Halauter shounan tiro ropen. Tire zorele kourepangre peran yek pral o vavar, oun ačan yek pash o vavareste čiddo.

Ropaskre gilja 4:17

Pale te pale dikan mare yaka pen trouyel pal yekeste, kay menge ap i rig vell. Oun kek vas. Ko them, ap koleste dikam, nay las men gar dran i bibarht vin.

Ropaskre gilja 5:6

Mer hounte rikras mare vasta i themma Egiptia oun Assour koy, te vell men i kotar maro, te bokas gar.

Ezekiel 16:28

Tou lal gar doha, oun loubral kolentsa dran o them Assour trouyel. Oun ninna kova his touke gar doha.

Ezekiel 29:7

Te tapran le pengre vastentsa ap toute, phagal oun dal lenge an i rig čourye. Oun te rikran le pen ap toute, phagal, oun yon doukran pengro doumo.

Hosea 10:6

Ava, ko terno gouroum vell an o them Assour anlo, oun kote vell lo o baro rayeste, o Yareb, dino. Havi ladj o Efrayimeske! Havi ladj vell ap i Israelitarya, kay patsan, te hi le yaake gosevo!

Hosea 12:1

O baro Devel penell: O rhorheno rakepen i menshendar an o them Efrayim hi troul mande. O kheer Israel rhorhell man vavar deblentsa. Ninna i menshe an o them Youda rikrenn pen gar ap mande, ko čačo Debleste, kay rikrell peskro lab.

Hosea 14:3

Lenn kal laba t'mentsa, oun avenn pale pash o baro Debleste, oun penenn leske: Le mari tseli doosh mendar krik, oun shoun maro mangepen! Palle kamah tout te sharell mare čipyentsa.

Hosea 5:13

Har dikas o Efrayim peskro nasslepen oun o Youda peskro doukepen, djas o Efrayim an o them Assour, oun poučas kote o baro rayestar, te vell lo leske ap i rig. Kova nay vell t'menge gar ap i rig, vitar gar nay krell lo t'maro doukepen sasto.

Hosea 7:11

O Efrayim hi har i dineli tauba, kay moukell pes sik te kharell. Ap yek dives kharell lo i Egiptaryen, te venn le leske ap i rig, o vavar dives nashell lo an o them Assour.