Jeremia 18:23 - O Debleskro Lab 2024 (Sinte-Manouche)

²³ Tou baro Devel, djineh, hoy len mantsa glan hi, kay kamenn le man moulo te dell. Ma biste lenge lengro čilačepen! Ma le lengri doosh lendar krik! Mouk len glan toute khetne te phagell, te vell tiri rholi pral lende!

O Debleskro Drom 2021 (Sinte)

²³ Tu baro Dewel, djineh, hoi len mantsa glan hi, kai kamenn le man mulo te dell. Ma biste lenge lengro tchilatchepen! Ma le lengri doosh lendar krik! Muk len glan tute khetne te phagell, te well tiri choli pral lende!

Jeremia 18:23 Iomraidhean Croise

Debleskri gili 119:126

Kanna hi o tsiro, kay o baro Devel hounte krell čomone. Yon peran tiro dromestar tele.

Debleskri gili 35:4

Mou vell ladj oun praasepen ap kolende, kay kamenn miro merepen! Mou venn le pale-čiddo oun ladjenn pen, kolla, kay rodenn miri bibarht!

Debleskri gili 56:8

Miro Devel, kameh len kek phagi te dell lengro čilačepaske? De kal menshen an tiri rholi khetne!

Debleskri gili 59:5

Ninna te krom me kek čilačepen, nashenn le kay, te denn le man moulo. Ste pre! Ab oun dik les touke kokres an!

Jesaja 10:3

Hoy kamenn t'mer te krell ap ko dives, kay vell t'mari phagi pral t'mende? Ap ko dives, kay vell i bibarht foun doural pral t'mende? Pash koneste kamenn t'mer palle te nashell? Oun kay moukenn t'mer palle t'maro bravlepen?

Jesaja 2:9

Doleske vell hakeno tiknes kerdo, oun hakeno hounte ladjell pes. Ma biste koy doosh, hoy le ap pende anan!

Jeremia 11:23

An ko bersh, kay dau i menshende an Anatot i phagi, oun anau i bibarht pral lende, ačell kek lendar djido.

Jeremia 15:15

Baro Devel, tou djineh halauter! Ma biste man, oun ab ap miri rig! De kolen lengro čilačepen pale, kay man palla lenna! Rike tiri rholi ap lende gar yaake rah pale, te vap gar maredo! Tou djineh, me hom touke koy. Doleske čingrenn le ap mande.

Jeremia 17:18

Mouk ladj pral kolende te vell, kay man palla lenn, oun gar pral mande! Yon hounte trashenn pen, oun gar me! Mouk ko dives te vell, kay vell koy bibarht ap lende! Oun phage len an kotya!

Jeremia 17:4

Oun t'mer hounte djan dran kava them, hoy dom t'men hako tsireske. Oun me krau, te venn t'mer boudepangre kolenge, kay rikrenn t'men tele an i them, kay prindjrenn gar. Miri rholi hi har i yag, hoy gar bouder vin djala.

Jeremia 18:18

Koy hi menshe, kay penenn: Avenn, te rakras koy pral, havo čilačepen mer nay krah ap o Yeremia. Men hi doha rashaya, kay nay sikrenn men maro drom, oun doha goseve, kay nay penenn menge, hoy te kras, oun doha Debleskre rakepangre, kay nay penenn menge o Debleskre laba. Mer tapras les leskre labentsa, oun das či ap leskro rakepen!

Jeremia 26:11

Oun i rashaya oun i rhorhene rakepangre penan ap i pralstunende oun i vavar menshende, kay hi koy: “Kava morsh hounte merell; yob rakras djoungeles pral kava foro, har shounan t'mer t'mare kandentsa.”

Jeremia 37:15

I pralstoune van rhoyedo ap o Yeremia, oun moukan les dava te dell, oun vitsran les an o stilepen an o kheer o morshestar Yonatan. Kova his i morsh, kay hayvas lila te činell; dran koleskro kheer kran le i stilepen.

Jeremia 38:4

Kote rakran kol pralstoune o baro rayeha oun penan: Mouk kava morshes, o Yeremia te marell; yaake har yob rakrella, lell lo i zoor kol lourdendar krik, kay kate pash mende pral ačan an kava foro. Oun yaake djal ninna i tsele menshenge an kava foro. Kava morsh rodell gar, hoy i menshenge mishto hi. Na-a, yob anell len an i bibarht.

Jeremia 6:15

Yon hounte ladjans pen ko djoungelo koveha, hoy yon kran. Kova krenn le gar. Yon ladjenn gar. Yon djinenn gar, hoy ladj hi. Doleske venn yon maredo khetne kol vavarentsa. Te vau me, oun dau len i phagi, ačell kek lendar djido, penell o baro Devel.

Jeremia 6:21

Doleske penell o baro Devel: Me kamau kal menshenge boud barra an o drom te čivell, te perenn i morsha oun lengre čave koy pral. Oun ninna kolla, kay djivenn pash lende, oun lengre mala venn maredo.

Jeremia 7:20

Doleske penell o baro Devel, maro ray: Miri bari rholi vell pral kava foro, pral i menshende oun pral i firhende, pral kol rouka an o veesh oun pral ko djob an kava them. Miri rholi hi har i yag, hoy kek nay krell vin.

Jeremia 8:12

Yon hounte ladjans koleske hoy yon kran, koveha man rhoyran. Kova krenn le gar. Yon ladjenn gar. Hoy ladj hi, djinenn le gar. Doleske venn yon maredo khetne kol vavarentsa. Te vau me, oun dau len i phagi, hounte perenn le, penell o baro Devel.

Ropaskre gilja 3:60

Tou dikeh, har yon kamenn man čilačepen pale te dell, oun tou prindjreh, hoy an lengro shero trouyel djala, oun hoy kamenn le mantsa te krell.

Ropaskre gilja 3:61

Baro Devel, tou shouneh lengro praasepen, oun halauter, hoy le khetne rakrenna, te krenn le mantsa.

Louka 21:22

An kol divessa vell o Debleskri rholi ap i menshende tele. Palle vell lauter čačo, hoy an o Debleskro lab činlo hi.

Remarja 2:5

Oun tou kameh gar pash leste te vell. Tiro dji hi har bar. Doleske vell o Debleskri rholi baro oun bareder, hoy ap toute vella ap ko dives, kay hi o Devel o čačepaskro ray oun rakrell o čačepen vin pral i tsele menshende.