Jeremia 18:16 - O Debleskro Lab 2024 (Sinte-Manouche)

¹⁶ Doleske vell lengro them har i moulo them, kay le daar lenna. Oun kolenge, kay dikenn kova, ačell o rakepen krik. Oun yon denn i vasta pral o shero khetne.

O Debleskro Drom 2021 (Sinte)

¹⁶ Doleske well lengro them har i mulo them, kai le daar lenna. Un kolenge, kai dikenn kowa, atchell o rakepen krik. Un jon denn i wasta pral o shero khetne.

Jeremia 18:16 Iomraidhean Croise

1. Rajengro liil 9:8

Oun kava kheer vell tele phagedo. Oun halauter, kay djan kote oun dikenn kova, lenge ačell o rakepen krik i trashatar, oun yon penenn: Hoske kras o baro Devel savo koova kava themeha oun kava khereha?

2. Familjakro liil 29:8

Doleske vas i rholi o baro Deblestar pral o them Youda oun o foro Yerusalem. Oun yob moukas mentsa savo koova te krell, te ačell kol vavar menshenge, kay kova dikenn, o rakepen krik i trashatar, oun yon rissrenn pengre yaka krik. Oun mer vam lenge sapaske, har t'mer t'mare yakentsa dikenna.

Debleskri gili 109:25

Kolla, kay anan doosh ap mande pre, san pral mande. Te dikenn le man, rissrenn le pengre yaka.

Debleskri gili 22:7

I kirmo hom me oun bouder kek mensho. I menshe praasenn man, oun dikenn tele ap mande.

Debleskri gili 44:14

Tou kral, te hounte ladjas men glan i menshende, kay djivenn an i themma troul mende; yon sanenn pral mende oun praasenn men.

Jesaja 37:22

Kava hi ko lab, hoy o baro Devel ap leste penell: Dik, har o foro Sion pral toute sal! An leskre yaka či-moldo hal. Har i terni čay o Yerusalem hi, oun kamell te djinell toutar či.

Jesaja 6:11

Oun me poučom: “Har rah, ray?” Oun yob penas: “Bis te bouder kek menshe an i forya djivenn, vitar kek mensho an i khera, oun ko harhetikri phoub har i moulo them vas.”

Jeremia 19:8

Me kamau savi bari bibarht pral kava foro te anell, kay hakeneske, kay dikell kova, o rakepen krik ačella oun yob pral leste sala.

Jeremia 25:9

Doleske moukau kol lourden te vell dran i themma, kay kote čiddo hi, kay norden hi. Lengro pralstouno hi o baro ray, o Neboukadnezar, dran o them Babilonia. Koles rodom vin, te krell yob, hoy kamau. Kolla perenn pral t'mende oun t'maro them, ninna pral kol tsele themma kay trouyel. Kal themma moukau yaake paash te dell, te ačell či har barra pral hako tsireske. Oun i vavar menshenge, kay kova dikenn, ačell o rakepen krik i trashatar, oun yon denn i vasta pral o shero khetne.

Jeremia 29:18

O kourepen, i bok oun o nasslepen lenn len palla. Oun i menshe dran i tsele themma ap kay phoub denn i vasta khetne pral o shero, te dikenn le len. An hako them, kay tradau len, dikenn le ap lende har ap praasede menshende, kolendar darenn le. Oun yon denn shol pral lende oun praasenn len.

Jeremia 42:18

Doleske penell o baro Devel, ko ray pral o bolepen oun i phoub, kay o Israeleskro Devel hi: Te djan t'mer an o them Egiptia, vell miri zoreli rholi yaake pral t'mende har vas li pral i menshende an o foro Yerusalem. An o them Egiptia han har praasede menshe. Pral kolende denn le i vasta khetne pral o shero. Yon san pral t'mende. Oun te kamenn le yekes te praasell, penenn le: Mou djal touke har i Israelenge an o them Egiptia! Oun kava them, kay kanna han, dikenn t'mer bouder gar.

Jeremia 44:12

Me moukau kekes te djivell kolendar, kay ačan djido an o them Youda, oun kay djan an o them Egiptia, te djivenn le kote. Yon halauter hounte merenn kote an o them Egiptia. O rhareha venn le maredo, oun i bokatar merenn le: i tikne oun i bare. Te dikenn vavar menshe, har lenge djal, hi le lenge har praasede menshe, kolendar darenn le. Yon san pral lende. Oun te kamenn le yekes te praasell, penenn le: Mou djal touke har i Israelenge an o them Egiptia!

Jeremia 49:13

Me, o baro Devel, dom man pash mande kokres sovel, te vell t'maro foro Bozra i foro, kolestar i menshe i trashatar pengro shero krik rissrenn. Pral koleste ladjenn le pen, yaake paash dino vell ko foro. Te kamell yek o vavares te praasell, penell lo: Mou djal touke har o foreske Bozra! Ninna i tsele vavar foryendar an o them Edom ačell či pral har barra hako tsireske!

Jeremia 49:17

Me kamau o them Edom yaake paash te krell, kay hakeneske, kay dikell kova, o rakepen krik ačella, oun yob pral kova sala, har kava themeske djas.

Jeremia 50:13

Miri rholi vell yaake pral o foro Babilon, te djivell nay kote kek mensho bouder. Či har barra ačell lestar pral. Hakeneske, kay dikell kova, ačell o rakepen krik. Yob trissell peskro shero pral i tseli bibarht hoy kava foro tapras.

Jeremia 51:37

Či te ačell o forestar Babilon har barra, oun divye djoukle djivenn kote. Kolenge, kay dikenn ko foro, ačell o rakepen krik i trashatar. O foro vell lenge sapaske. Oun kek mensho djivell bouder kote.

Jeremia 51:43

I vavar forya an o them hi paash dino. O them Babilonia vas i moulo tato them kek panyeha, i divyo trouk them, kay kek mensho djivell, oun kek mensho ap i raysa djal.

Jeremia 9:11

Me poučom: Baro Devel, hoske rhačell ko them oun vell moulo, yaake kay nay djal kek bouder koy trouyel? Koon hi gosevo oun hayvell kova? Ap koneste penal tou kova, yaake te penell yob kova i vavarenge?

Ropaskre gilja 1:12

T'menge halauterenge, kay nashenn kate ap o drom, penau: Hadenn t'mare yaka oun dikenn! Hi yek doukepen har miro doukepen, hoy pral mande vas? O baro Devel anas les pral mande ap ko dives, kay leskri zoreli rholi pral mande vas.

Ezekiel 12:19

Oun pen ap i Israelitarya, kay hi pash toute an kava them: Kava penell o baro Devel, maro ray, pral kolende, kay djivenn an o foro Yerusalem an o them Israel: Boud čilačo koova krenn le: Yek rikrell o vavares tele. Doleske vell ko dives, kay rhan le pengro maro daryah, oun piyenn pengro pani trisslepah i trashatar. Lengro them vell i mouklo them, kay či ačell.

Ezekiel 27:36

I parepangre dran vavar themma nay patsenn gar, hoy touha djas, kay tou yaake sik tele djal oun bouder gar koy hal.

Ezekiel 36:3

Doleske pen ap i berge, hoy vella! Pen: Kava penell o baro Devel, maro ray: Hi čačo, yon kran, te van t'mer i moulo them. Haki rigyatar van le oun stakran o them khetne. Oun menshe dran i themma troul t'mende van oun lan t'maro them penge. Oun i menshe rakrenn djoungeles pral t'mende.

Ezekiel 6:14

Oun me hadau miro vast ap lende oun krau lengro them paash, te vell ko tselo them mank o moulo divyo them Youda oun o foro Ribla i mouklo them. Hako forestar, kay le djivan, ačell či har barra. Palle dikenn oun hayvenn le, te hom me, o baro Devel.

3. Mose 26:32

Me krau te vell t'maro them i moulo them. Oun kolla, kay kouran pen t'mentsa, oun venn, te djivenn le koy, lenge ačell o rakepen krik, te dikenn le kova.

3. Mose 26:43

Glan kova hounte djan le dran ko them vin, te ačell o them čiddo, oun nay lell pale nevi zoor an yaake boud bersha, hoy leske gar dren rikedo van. Oun i Israelitarya hidjrenn pengri phagi tele. Yon djivan gar pal miro čačepen, oun kolestar, hoy lendar kamom, kaman le či te djinell.

Micha 6:16

Ko čilačo koova, hoy kol raya, o Omri oun o Ahab, t'menge glan kran, kova kran t'mer ninna. Oun hoy yon penan, kova kran t'mer ninna. Doleske krau me dran t'maro foro i moulo foro. Oun pral t'mende, kay kote djivenn, san i vavar menshe. Bari ladj vell pral t'mende.

Mateo 27:39

Oun kolla, kay kote pashel van, sikran i goushteha ap o Yezouseste, oun praasan les.

Markus 15:29

Oun kolla, kay kote pashel van, sikran i goushteha ap leste, oun praasan les, oun penan: “Tou kamal o Debleskro baro kheer tele te phagell, oun an triin divessa pale pre te čivell.

5. Mose 28:59

Te shounenn t'mer gar ap leste, dell o baro Devel t'men oun t'mare čaven, oun bičrell t'menge boud doukepen oun pharo nasslepen, ko yek gomme djoungleder har ko vavar. Oun kova ačell i rah tsiro ap t'mende.

5. Mose 29:23

Palle penenn i menshe dran i tsele vavar themma: “Hoske kras o baro Devel kava kau themeha? Hoske vas lo yaake rhoyedo?”