Jeremia 10:12 - O Debleskro Lab 2024 (Sinte-Manouche)

¹² Yob, o baro Devel, kras i phoub peskri zoryah. Dran peskro gosvepen čivas lo i phoub zoreles tardo, oun kras o bolepen koy pral.

O Debleskro Drom 2021 (Sinte)

¹² Job, o baro Dewel, kras i phub peskri sorjah. Dran peskro goswepen tchiwas lo i phub soreles tardo, un kras o bolepen koi pral.

Jeremia 10:12 Iomraidhean Croise

1. Mose 1:1

Glan i rah rah tsiro kras o Devel o bolepen oun i phoub.

1. Mose 2:5

Ap ko tsiro, har o baro Devel, maro ray, i phoub oun o bolepen kras, his kek rouka ap i phoub, vitar kek zenlepen. O baro Devel, maro ray, das kek brishin ap i phoub. Oun his kek mensho koy, kay boudras ap i phoub.

1. Familjakro liil 16:26

I debla i vavar menshendar hi rhorhene debla. O baro Devel hi kova, kay o bolepen kras.

Hiob 26:7

O Devel kras o bolepen bourhles pral kova, kay či hi, oun pandas i phoub kote pre, kay či hi.

Hiob 37:18

nay kreh tou o bolepen bourhles pral i phoub, har yob kova kras, te vell o bolepen zoreles har i dikepaskri?

Hiob 9:8

Yob kokres kras o bolepen bourhles pral i phoub, oun djal pral o baro pani.

Debleskri gili 104:2

Har i baya čival i bari momeli troul toute. Tou tserdal o bolepen bourhlo har i bari plarhta,

Debleskri gili 104:24

Baro Devel, har baro oun boud hi kova, hoy tou halauter kral! Har goseves kral tou halauter! I phoub hi pherdo o tselo koova, hoy tou kral.

Debleskri gili 119:90

Tiro čačepen ačell yaake rah har menshe koy hi. Tou kral i phoub oun yoy ačella tardo.

Debleskri gili 24:2

Yob kras lat oun čivas lat pral o baro pani, oun rikras lat zoreles pral i panya.

Debleskri gili 33:6

Dran o lab o baro Deblestar vas o bolepen kerdo. Dran o dourho, hoy dran leskro mouy djas, van i tsele bolepangre momlia kerdo.

Debleskri gili 65:7

Tiri zoryah čival tou i berge zoreles ap i phoub, oun čival tiri bari zoor troul toute har i ripen.

Debleskri gili 78:69

Kote pre čivas lo peskro kheer, dour pral djal lo pre – har o bolepen, oun hi zoreles tardo har i phoub, hoy lo kras hako tsireske.

Debleskri gili 93:1

O baro Devel hi o baro ray. Raylepen oun zoor hi troul leste har i ripen. Yob kras i phoub yaake te hi li zoreles tardo.

Gosewe laba 3:19

O baro Devel kras i phoub o gosvepah, oun o bolepen yaake, har yob djinas, kay kova mishto his.

Gosewe laba 30:4

Koon djas pre an o bolepen oun pale tele? Koon las o phourdepen an peskre vasta? Koon pandas i tsele panya an i baya? Koon penas, har dour i phoub te djal? Har kharell lo? Har kharell leskro čavo? Djineh tou kova?

Jesaja 37:16

“Baro Devel, tou ray pral o bolepen oun i phoub, tou hal o Israeleskro Devel, oun hal pral i bolepangre beshdo. Tou kokres hal o Devel pral i tsele themma ap kay phoub. Tou kral o bolepen oun i phoub.

Jesaja 40:22

Yob hi kova, kay hi o ray pral i tseli phoub. Oun kolla, kay ap i phoub djivenn, hi glan leste har stepangre. Yob hi kova, kay čivas o bolepen pral i phoub har i bourhli plarhta, har te krell yek i plarhteno kheer, te nay djivell lo dren.

Jesaja 42:5

O baro Devel hi maro ray, kova, kay o bolepen kras, oun har i plarhta bourhles kras. Ninna i phoub kras lo, oun lauter hoy li vin anell. Oun i menshen ap late dell lo o dourho, oun djipen kolende, kay ap late djivenn. Yob penell:

Jesaja 44:24

Kava penell o baro Devel, kova, kay ginas tout vin dran i bibarht, oun kova, kay tout kras har gomme gar boldo hals: Me, o baro Devel hom kova, kay lauter kras, Me kokres krom o bolepen bourhlo pral i phoub, Oun har me i phoub zoreles pre čivom, his kek kote pash mande.

Jesaja 45:12

Me hom kova, kay kras i phoub, oun ko menshes, kay ap late hi, ninna. Mire vastentsa krom o bolepen bourhles, oun kol tsele momlia ap leste penom me, kay le venn.

Jesaja 45:18

O baro Devel hi o Devel, kay o bolepen kras. Yob hi o Devel, kay i phoub kras oun zoreles pre čivas. Yob kras lat gar yaake, te nay djivell či koy pre. Na-a, yob kras lat yaake, te vell djipen ap late. Yob penell: Me hom o baro Devel, oun dell kek vavar Devel har man!

Jesaja 48:13

Mire vastentsa krom i phoub, oun čivom o bolepen bourhles pral i phoub. Me dom len gole, oun yon his koy tardo.

Jesaja 49:8

Kava penell o baro Devel: Har his o tsiro mishto, shounom ab tiri gole. Har vas ko dives, kay lom tout vin dran i bibarht, vom ap tiri rig. Oun me dom yak ap toute. Me lom tout: – te vess i drom, kay nay venn i menshe dran hake themma pash mande, – te čivess pale o them pre tardo, – te dess tou lende kol kotya them, hoy lenge hi, oun kanna mouklo hi,

Jeremia 10:13

Te dell yob gole, vell boud pani khetne an o bolepen; i volke moukell yob te vell foun doural, oun moukell yag pral oun tele karye te dell an o brishin. Ninna o phourdepen vell vin dran peskro kheer.

Jeremia 10:16

Har vavarčandes hi ko Devel, koles o Yakobeskre čave an-mangenna! Yob hi kova, kay kras halauter. Oun i Israelitarya hi leskre menshe. Yob kharell: o baro Devel, ko ray pral o bolepen oun i phoub.

Jeremia 14:22

Kek devel, koles i menshe an vavar themma an-mangenna, nay bičrell brishin! Vitar gar dell o bolepen dran peste brishin! Na-a, maro baro Devel, tou hal kova, kay krell savo koova. Doleske dikah ap toute.

Jeremia 27:5

Miri bari zoryah krom kay phoub oun i menshen oun firhen, kay ap i phoub hi. Oun me dau len, koneste kamau.

Jeremia 32:17

Baro Devel, miro ray, tou kral o bolepen oun i phoub dran tiri bari zoor oun tiro zorelo vasteha. Oun či hi koy, hoy nay kreh gar.

Zakarie 12:1

Kava hi o lab, hoy penas o baro Devel pral o Israel: Kova penell o baro Devel, kay kras o bolepen bourhlo oun čivas i phoub zoreles tardo, oun das o menshes o dourho.

Johanni 1:3

Khetne leha kras o Devel o bolepen oun i phoub. Či hi koy, hoy gar leha kerdo vas.

Kolossarja 1:16

Dran leste vas lauter kerdo, hoy hi an o bolepen oun ap i phoub, kova, hoy dikah, oun hoy gar dikah. Mank lende hi bare raya oun i zorele pralstoune oun lauter, kay hi len penepaske mashkral o bolepen oun i phoub. Lauter van dran leste, oun van leske kerdo.