Jakobo 3:17 - O Debleskro Lab 2024 (Sinte-Manouche)

¹⁷ Ko gosvepen, hoy o Deblestar vella, hi vavarčandes. I mensho, kay hi les kava gosvepen, kova djivell i djoudjo djipen. Yob kamell te djivell lo lačes i vavarentsa khetne. Yob hi kamlo oun lačo. Les hi i dji i vavarenge, oun krell boud lačo koova. Yob moukell pes gar ap yekeskri rig te tserdell. Les hi gar douy čipya.

O Debleskro Drom 2021 (Sinte)

¹⁷ Ko goswepen, hoi o Deblestar wella, hi wawartchandes. I mensho, kai hi les kau goswepen, kowa djiwell i djudjo djipen. Job kamell te djiwell lo latches i wawarentsa khetne. Job hi kamlo un latcho. Les hi i dji i wawarenge, un krell bud latcho koowa. Job mukell pes gar ap jekeskri rig te tserdell. Les hi gar dui tchipja.

Jakobo 3:17 Iomraidhean Croise

1. Rajengro liil 3:12

Doleske krau yaake har tou kova mandar mangal. Me dau tout i gosevo dji, te hayvess halauter, hoy glan toute vella. Yaake his pash kekeste glan toute. Oun pal toute vell vitar kek, har tou hal.

1. Rajengro liil 3:28

Oun an o tselo them Israel shounan le ko čačo lab, hoy o baro ray hatsas. Oun yon dikan pre ap o baro rayeste, oun yon hayvan, kay o gosvepen o Deblestar an leste his, te nay dell lo i menshenge lengro čačepen.

1. Rajengro liil 3:9

Doleske mangau tout, de man i dji, hoy shounella, hoy tou peneh, te nay rakrap o čačepen vin pral i menshende, oun te hayvap, hoy mishto oun hoy gar mishto hi. Har nay dap hakeneste tire boud menshendar peskro čačepen, tou te deh kova mande gar?”

1. Familjakro liil 22:12

Mou dell lo tout gosvepen, te djiness, hoy te kress. Yob krell tout ray pral Israel, te djas ap leskro drom.

1. Familjakro liil 22:9

Dik, i čavo vell touke boldo, yob vell i morsh, kay djinell kek kourepen. Me krau te kourell pes kek leha kolendar halauterendar, kay troul t'mende djivenn. Yaake rah har yob djivell, nay djivenn i Israelitarya kek kourepah oun marepah. Doleske de les o lab Salomo.

Hiob 28:12

Koon nay penell mange, kay nay vell o gosvepen hatslo? Kay nay hatsah vin, har te djivas i gosevo djipen?

Hiob 28:23

O Devel kokres hi kova, kay djinell o drom, hoy anell pash o gosvepen. Oun yob kokres djinell, kay o gosvepen khere hi.

Hiob 28:28

Yob penas ap o mensheste: Savo mensho hi gosevo, kay rikrell pes o Debles glan i yaka pash kova, hoy lo krell. Savo mensho hayvas, har te djivell lo o gosevo djipen, kay rikrell pes pale o čilačepastar.

2. Mose 36:2

O Mose kharas o Bezalel oun o Oholiab pash peste, ninna kol tsele vavaren, kay o baro Devel gosvepen an lengro dji das oun vasta, te boudrenn le mishto, oun kay van pendar, te krenn le koy boudi.

Gosewe laba 2:6

O baro Devel hi kova, kay dell gosvepen. Lestar vell, te djinell oun hayvell i mensho boud koova.

Jesaja 2:4

Oun yob vell o čačepaskro ray, kay krell o čačepen vin mashkral i menshende dran i vavar themma, oun penell lenge, te moukenn le pengro čingepen. Oun kolla lenn palle pengre rhare oun vitsepaskre čourya, oun krenn lendar harhetikre koola, kolentsa boudrenn le nay an i phoub oun činenn i drakengre kashta tele. Oun palle kourenn pen i menshe dran yek them bouder gar i menshentsa dran i vavar them. Oun kek sikrell i vavaren bouder, har te marenn le pen.

Jesaja 32:6

Ko dinelo mensho rakrell dinlepen. Oun an leskro dji hi djounglepen. Yob rakrell douy čipyentsa, oun kova, hoy lo pral o baro Debleste penell, hi gar čačo. Kolen, kay bokenna, dell lo či te rhal, oun kolen, kay troush hi, moukell lo gar te piyell.

Jesaja 40:11

Yob dell yak ap lende har i bakrengro dell yak ap peskre bakre oun dell len te rhal, oun lell i terne bakren an peskre moussya, oun hidjrell len an peskri baya. Oun kolla, kay len terne hi, lenge djal lo lačes trouyel.

Daniel 1:17

Oun kol star terne morshen das o Devel i baro gosvepen, te hayvan le lila an boud rakepen te draverell. Ninna hayvan le pen vin an boud koova. Oun o Daniel hayvas ninna te penell, hoy sounya oun dikepen kamenn te penell.

Maleachi 2:9

T'mer rikran t'men gar ap miro drom, oun dikan ap o mensheste, har an-diklo yob hi, har penan leske, hoy te krell lo. Doleske krom t'men pale-čiddo, oun čivom ladj ap t'mende glan i tsele menshende an Israel.

Maleachi 3:3

Yob krell har yek, kay krell o roup djoudjo an i yag. Yob krell i rashayen dran o kheer Levi yaake djoudjo, har sonakay oun roup djoudjo kerdo venna. An ko tsiro anenn yon o baro Debleske save firhen, hoy čačo hi glan leskre yaka.

Mateo 23:28

Yaake han t'mer. Te dikenn t'men i menshe, patsenn le, te han lače oun čače menshe. An t'mende hi lauter rhorhepen oun čilačepen.

Mateo 5:8

Barhtele hi kolla, kay hi len i djoudjo dji. Yon dikenn o Debles pengre yakentsa.

Mateo 5:9

Barhtele hi kolla, kay krenna, te vell kek čingepen mank i menshende. O Devel kharell len peskre čave.

Louka 21:15

Me dau t'men ko gosvepen, oun penau t'menge, hoy t'mer hounte penenn. Oun palle djinenn le bouder gar, hoy te penenn le.

Louka 6:36

T'men hounte vell hakeneske i baro dji, yaake har o Debles hakeneske i baro dji hi.

Johanni 1:14

Ko lab vas i mensho, oun djivas pash mende. Oun mer dikam leskro raylepen oun leskri zoor, kay o Devel peskro čaves das. Kova his pherdo lačepen oun čačepen.

Johanni 1:47

Har o Yezous dikas, kay o Natanael vas, penas yob: “Dikenn, koy vell i čačo Israelitari. Oun kek rhorhepen hi an leste.”

Bičepangre 11:24

O Barnabas his i lačo morsh. Yob his pherdo Debleskro Dourho. Oun les his i baro patsepen. Oun boud van patslo ap o ray Yezouseste.

Bičepangre 9:36

An o foro Yoppe djivas i patsli. Lakro lab his Tabita ap hebretikes oun Dorkas ap grichtikes. Koya kras boud lačo koova, oun das boud love kol čorvelende.

Remarja 12:18

Yaake boud har djala oun ap t'mende hi, djivenn lauterentsa kamles khetne!

Remarja 12:9

An t'maro kamlepen hounte vell kek rhorhepen! Moukenn o čilačepen oun krenn o lačepen!

Remarja 15:14

Mire phrala, me djinau čačepah, t'maro dji hi pherdo lačepen. Oun t'mer djinenn lauter, hoy o Devel t'mendar kamella. Yaake nay sikrell ko yek o vavareste o čačo drom.

1. Korintarja 12:8

Ko yekes dell o Debleskro Dourho i gosevo lab, oun i vavares, te hayvell lo, hoy o Devel kamella. Oun yob penell kova i vavarenge doureder. Hi yek Debleskro Dourho, kay kova lauter krella.

2. Korintarja 10:1

Me, o Paulo, rakrau t'mentsa kamles oun lačes, yaake har o Yezous Kristo kamles oun lačes hi. Hi menshe mank t'mende, kay penenna: “Me te hom pash t'mende, nay rakrau kek triin laba. Te hom dour t'mendar krik, palle rakrau zorele labentsa.”

2. Korintarja 6:6

Maro djipen sikrella, te ham o Debleskre boudepangre. Mer djivah i djoudjo djipen oun djinah, hoy o Devel kamella. Mer vah gar khino an mare djia, ham kamlo, oun krah, hoy o Debleskro Dourho menge penella. Oun an maro kamlepen hi kek rhorhepen.

2. Korintarja 7:11

T'menge his ropaske pral ko koova, hoy mank t'mende djas, oun o Devel dikas lačes ap t'mende. Kanna dikenn, havo lačo koova dran kova vas: T'mer kamenn lauter mishto te krell, oun kamenn te sikrell, te hi t'men kek doosh. T'mer van rhoyedo pral koleste, kay ko koova kras. Oun t'men his daar miri rholyatar. O tselo djiyestar kaman t'mer kova te krell, hoy mishto hi an mire yaka. Doleske dan t'mer koles i phagi, kay doosh ap leste his. Yaake sikran, kay his t'men kek doosh pral ko koova.

2. Korintarja 9:10

O Devel, kay dell o harhes i djob, ninna o maro rhapaske, kova dell t'men ninna, oun krell boudeder dran kova, hoy t'men hi, yaake te vell boud lačepen dran kova, hoy t'mer krenna.

Efesarja 5:9

Lauter kolla, kay ap leskro drom djana, krenn kova, hoy lačo oun čačo hi, oun penenn o čačepen.

Filiparja 1:11

Oun ko boud lačo oun čačo koova, hoy t'mer kran, krell o Debles bares. Kova kran t'mer an i zoor, hoy o Yezous Kristo das t'men.

Filiparja 4:8

Pale penau t'menge, mire phrala, rakrenn pral kova, hoy lačo oun čačo hi, hoy djoudjo hi, hoy kamlo hi, hoy mishto hi pash i menshende! Ava, rakrenn pral lauter kova, hoy shoukar hi oun vell sharedo!

Kolossarja 1:10

Palle djivenn t'mer yaake, te vell o Devel sharedo, oun krenn lauter, hoy hi lačo oun mishto glan leskre yaka. Oun dran t'maro djipen vell boud lačo koova. Oun t'mer prindjrenn o Debles hako tsiro feteder.

1. Tessalonikarja 2:7

Mer ham o Yezous Kristeskre bičepangre oun nay penams t'menge zoreles, hoy te krenn. Kova kram gar. Na-a, mer hams kamlo ap t'mende, har i day ap peskre čavende.

1. Timoteo 5:21

Me penau touke zoreles glan o Debleste, oun glan o Yezous Kristeste, oun glan kol Debleskre bolepangre, te rikress tout ap ko koova, hoy me touke kanna penom! Pash hakeneste dja pal o čačepen! Ma tserde yekes glan o vavareste!

2. Timoteo 2:24

Kova, kay boudrell o Debleske, hounte čingrell pes gar. Na-a, yob hi kamlo ap hakeneste, oun hayvell mishto i menshende o Debleskro drom te sikrell. Yob vell gar rhoyedo ap lende,

Tito 1:15

Kolla, kay o Yezous lengri doosh lendar las, kolla hi djoudjo oun erligo glan o Debleste. Kolenge dell či, hoy hi pale-čiddo. Kolla, kay gar ap leste patsenn, kolla hi pale-čiddo glan o Debleste. Kolenge hi lauter pale-čiddo. Lengro dji hi čilačo, oun yon hayvenn bouder gar, hoy mishto oun čačo hi.

Tito 3:2

te rakrenn le gar djoungeles pral vavarende, oun te rodenn le kek čingepen! Na-a! Yon hounte venn o djiyestar lačo oun kamlo ap i tsele menshende.

Hebrearja 12:11

Ap ko tsiro, kay lah i phagi, kamah kova gar. Na-a, kova doukell men. Pal ko tsiro hayvah, kova his menge mishto. Oun mare djia venna pale barhtelo, oun mer djivah boudeder an o čačepen glan o Debleste, har glan ko tsiro.

Hebrearja 12:14

Krenn lauter, te vell t'men kek čingepen i vavar menshentsa! Čivrenn o tselo čilačepen dran t'mende vin! Kek mensho dikell o Debles, te moukell lo o čilačepen an peste te djivell.

Jakobo 1:17

Lauter, hoy hi mishto oun lačo, vella o Deblestar an o bolepen. Yob kras o kham oun o čon oun i bolepangre momlia. Kolla krenn, te vell dives oun rat, oun yon venn yek tsiro diklo oun i vavar tsiro gar diklo. O Devel hi gar yaake. Yob ačell, har yob hi.

Jakobo 1:5

Te djinell yek t'mendar gar, hoy o Devel lestar kamella, palle nay mangell lo o Debles, te sikrell yob leste kova. O Devel hi lačo, oun yob dell o djiyestar, ninna te veh tou boud kope pash leste.

Jakobo 2:13

Ma bistrenn! Vell yek dives, kay rakrell o Devel o čačepen vin pral t'mende. Te hi yekes kek dji i vavareske, koleske hi o Debles vitar kek dji. Kones hi i dji i vavarenge, koles hounte vell kek daar ap ko dives, kay rakrell o Devel o čačepen pral i menshende vin.

Jakobo 2:4

Kova vals yaake, har te penans: “Ko raylo hi feteder har ko čorvelo.” Te dikenn t'mer yaake ap t'mare phralende, hi kova čilačo.

Jakobo 3:15

Savo gosvepen vell gar o Deblestar. Kova vell o menshestar oun o bengestar.

Jakobo 4:8

Avenn pash o Debleste! Yaake vell yob ninna pash t'mende. Ap t'mende, kay kran čilačo koova, penau me: Krenn t'mare vasta djoudjo! Ap t'mende, kay djan ap douy dromma, penau me: Moukenn ko čilačo drom, oun djan ap o Debleskro drom!

1. Petro 1:22

T'mer shounan ap o čačo lab, oun čivan o čilačepen dran t'maro djipen krik. Kanna nay kamenn t'men čačepah har phrala oun phenya. Moukenn gar tele, te kamenn t'men o tselo djiyestar!

1. Petro 2:1

Doleske moukenn hako čilačo koova! Ma rhorhenn! Ma rakrenn douy čipyentsa! Ma zilverenn! Rakrenn kek djoungelo koova pral kekeste!

1. Petro 2:18

T'mer boudepangre, shounenn ap t'mare rayende, ap kolende, kay lačo oun kamlo hi oun ninna ap kolende, kay čilačo hi.

1. Johanni 3:18

Mire čave, mer te kras gar bare laba te penah, kay kamah i menshen i djiyestar. Na-a, o čačo kamlepen dikenn le ap kova, hoy yek o vavareske krella.

1. Johanni 3:3

Oun hakeno, kay kova patsella, rikrell peskro dji djoudjo, te vell kek doosh ap leste, yaake har ap o Yezous Kristeste kek doosh hi.