Hosea 5:10 - O Debleskro Lab 2024 (Sinte-Manouche)

¹⁰ I pralstoune an o them Youda lan penge o themestar, hoy i Israelenge his. Yon hi har kolla, kay čivenn kol barra i kotar krik, hoy sikrenn har baro yekeskro kotar phoub hi. Doleske čorau miri rholi pral lende vin har pani.

O Debleskro Drom 2021 (Sinte)

¹⁰ I pralstune an o them Juda lan penge o themestar, hoi i Israelenge his. Jon hi har kolla, kai tchiwenn kol barra i kotar krik, hoi sikrenn har baro jekeskro kotar phub hi. Doleske tchorau miri choli pral lende win har pani.

Hosea 5:10 Iomraidhean Croise

Debleskri gili 32:6

Doleske mangenn tout lauter kolla an, kay tiro hi, an ko tsiro, kay taprell len i daar. Palle, te venn i bare panya, nay taprenn le len gar.

Debleskri gili 69:24

Lengre yaka te venn korelo, te nay dikenn le bouder či! Le lendar lengri zoor, te djan le bango.

Debleskri gili 88:17

Tiri rholi vas pral mande har i yag. Tire dava phagenn man.

Gosewe laba 17:14

Mouk tele o čingepah yaake rah har lo gomme tikno hi! Čingepen hi har pani, hoy dran i phoub vin phagell. Mouk tele glan kova yob zorleder vell!

Gosewe laba 22:28

Ma čip kol phoure barra krik, hoy sikrenn har baro tiro them hi, oun hoy tire phoure kote čivan.

Jesaja 1:23

Tire pralstoune hadan pen pral mande oun djan khetne i čorepangre. Oun hakeno lendar moukell pes te ginell. Oun kol čave, kolen kek day oun kek dad hi, kolenge krenn le kek čačepen vin. Oun ko koova kol djouvyendar, kolengro rom meras, moukenn le gar glan pende te vell.

Ezekiel 22:22

Yaake har o roup an o bob gar ačell hoy lo his, yaake djal t'menge, te vell o foro Yerusalem har i bob t'menge. Oun t'mer dikenn oun hayvenn palle, te hom me o baro Devel, kay čoras peskri rholi pral t'mende vin.

Ezekiel 7:8

Sik čorau miri rholi pral t'mende vin. Oun djau rholyah t'mentsa trouyel, bis te miri rholi trouyel hi. Me rakrau o čačepen pral t'mende vin, oun t'mer lenn t'mari phagi. Ko tselo djoungelo koova, hoy kran, anau ap t'mare sherya pale.

Mateo 7:27

Har das zorelo brishin, oun boud pani vas, oun i zorelo dourho phourdas ap ko kheer, koy peras ko tselo kheer khetne.”

Louka 6:49

Koon shounell mire laba, oun krell kova gar, hoy me penaua, hi har i mensho, kay kras peskro kheer ap i čik, oun gar ap i zorelo baro bar. Oun o baro pani vas, oun o tselo kheer peras khetne. Oun i bibarht his baro.

5. Mose 19:14

An ko tsiro, kay djivenn an ko them, hoy t'maro baro Devel t'men dell, te lenn les t'menge dren, palle hounte čivess gar kol barra ap i rig, hoy sikrenn har baro hi ko kotar them kolestar, kay langs toute djivell. Kolla his tire phoure, kay čivan kol barra koy.

5. Mose 27:17

“Praasedo vell kova, hoy i barra ap i rig čivell, hoy sikrenn har baro o vavareskro kotar them hi.” Oun i tsele menshe hounte penenn: Amen!