Hosea 13:15 - O Debleskro Lab 2024 (Sinte-Manouche)

¹⁵ Ninna te hi o Efrayim mank peskre phralende har i zenelo rouk, hoy hidjrell lače roukengre, bičrell o baro Devel i tato dourho, hoy vell kotar, kay o kham pre djal. Dran o moulo tato them vell lo, oun krell, te venn i tsele panya trouk. Oun yob lell leskro tselo bravlepen lestar krik, – ko tselo kouč koova.

O Debleskro Drom 2021 (Sinte)

¹⁵ Ninna te hi o Efrajim mank peskre phralende har i senelo ruk, hoi hidjrell latche rukengre, bitchrell o baro Dewel i tato ducho, hoi well kotar, kai o kham pre djal. Dran o mulo tato them well lo, un krell, te wenn i tsele panja truk. Un job lell leskro tselo brawlepen lestar krik, – ko tselo kutch koowa.

Hosea 13:15 Iomraidhean Croise

1. Mose 41:23

Pal lende van efta vavar halme dran i phoub vin. Kolla hidjran djob, hoy his gar pesso. I tato dourho, hoy phourdas dran o moulo tato them, kras len sano oun trouk.

1. Mose 41:52

Oun o douyto čaves das yob ko lab Efrayim oun penas: O Devel das man čaven an o them, kay djas mange gar mishto.

1. Mose 41:6

Pal lende van efta vavar halme dran i phoub vin. Kolla hidjrenn djob, hoy hi gar pesso. I tato dourho, hoy phourdas dran o moulo tato them, kras len trouk.

1. Mose 48:19

Leskro dad kamas gar oun penas: “Me djinau, čava, me djinau. Ninna kolestar venna yaake boud menshe, te vell lendar yek natsyona. Leskro terneder phraal vell bareder har yob. Lestar venna yaake boud menshe, te venn lendar boud natsyone.”

1. Mose 49:22

O Yosef hi har i terno rouk pash o pani, hoy hidjrell boud roukengre. Leskre kashta venn baro oun djan pral i pre-čidde barra, kay lo tardo hi.

Hiob 18:16

Yob hi har i rouk: Tella merell leskro drab tele, oun pral venn leskre patria djelto.

Debleskri gili 1:4

Yaake hi i čilačentsa gar. Yon hi har čik, hoy i dourho krik phourdell.

Debleskri gili 109:13

Kre, te merenn kolla vin, kay pal leste venna. Leskre čavengre čaven venn kek čave bouder, yaake te vell lengro lab bistedo.

Jesaja 14:21

Tire morsh čave hounte merenn! Avenn oun denn len moulo! Yon hounte merenn ko čilačepaske, hoy lengre phoure kran, te nay hadenn le pen gar bouder, oun lenn i phoub penge dren oun krenn penge forya koy pre.

Jesaja 17:13

Ava, har bare divye panya venn le sik. Koy čingrell o Devel ap lende, oun yon nashenn penge, oun venn tradedo har o phouss, hoy phourdell i zorelo dourho pral o them, oun har patria, hoy phourdell lo trouyel.

Jesaja 27:8

Na-a, yob das len lengri phagi, har yob len pestar krik bičras. Dran lengro them van le krik tradedo har i zorelo dourheha, hoy kotar phourdell, kay o kham pre djal.

Jesaja 41:16

Tou vitsreh len pre, oun i dourho hidjrell len krik, oun i phourdepen phourdell len kate te kote. Palle veh barhtelo pral tiro baro Debleste, oun shareh tout tiro Debleha, kay o Israeleskro čačo Devel hi.

Jeremia 20:5

Ko tselo bravlepen an kava foro dau me kolen, kay len vin randenn. I tsele love, hoy i menshe an Yerusalem dran pengri boudi khetne anan oun lengro kouč koova oun o tsele bravlepen kol rayendar pral o them Youda lenn le pentsa oun anenn les an o them Babilonia.

Jeremia 4:11

An ko tsiro vell kol menshenge an Yerusalem penlo: I zorelo tatepen vell dran kol berge dran o moulo tato them pash t'mende. Kova hi kek phourdepen, hoy phourdell o phouss oun o čik krik,

Jeremia 4:12

na-a, ko phourdepen, hoy lenge bičrau, hi boud zorleder. Palle dau len lengri phagi.

Jeremia 51:1

Kava penell o baro Devel: Dik, me bičrau i dourho, hoy anell o merepen pral o them Babilonia oun pral kolende, kay kote djivenna – kolla, kay hadan pen pral mande.

Jeremia 51:36

Doleske penell o baro Devel ap o foro Yerusalem: Dik, me kamau tiro koova an miro vast te lell. Me krau, te vell lengro lengsto pani Eufrat trouk, oun te nashell an lengre vavar panya bouder kek pani.

Ezekiel 17:10

Yaake vell o bour gar baro, ninna te vas lo an i phoub čiddo. Te vell o zorelo tato dourho foun kotar, kay o kham pre djal, oun phourdell ap leste, merell lo tele, ap koy platsa, kay vas yob an i phoub čiddo.

Ezekiel 19:12

Koy vas i rhoyedo vast, oun tserdas les vin dran i phoub, oun vitsras les tele. Oun i tato dourho, hoy vas foun kotar, kay o kham pre djal, moukas leskre drake trouk te vell. Leskre zorele kashta van tele phagedo, te meran le tele oun van an i yag rhačedo.

Daniel 11:8

Ninna lell lo lengre deblen oun figuren oun lengro kouč koova, hoy dran roup oun sonakay hi, oun anell kova an o them Egiptia. Oun palle moukell lo bershenge tele ko baro rayestar pral o them Syria.

Hosea 10:1

O Israel hi har i sasto drakengro rouk, ap koleste boud drake bares venn. Oun har i menshe bravelo oun bravleder van, kran le penge boud oun boudeder altare i rhorhene deblenge. Kote, kay o them o lačeder his, čivan le i shoukar bare barra lenge pre.

Hosea 2:3

Penenn t'mare phralenge, te hi le mire menshe, oun ap t'mare phenya, te krau me miro dji lenge pre.

Hosea 4:19

I zorelo dourho taprell len oun hidjrell len krik. Oun ladj vell ap lende doleske, kay maran yon firhen kol rhorhene deblenge.

Hosea 9:11

Efrayim, tiro raylepen djal peske, har i čirklo peske djal. I djouvya venn bouder gar vavarčandes, oun anenn bouder kek čaven ap i phoub.

Jona 4:8

Oun har o kham ap o bolepen tardo his, moukas o baro Devel i tato phourdepen dran o moulo them te vell, oun o kham das yaake čourye ap o Yoneskro shero, te nashras lo peskri zoor. Oun yob kamas te merell oun penas: “Miro merepen hi mange mishto, boudeder har te djivap!”

Nahum 2:9

Halauter nashenn dran o foro Ninive har pani, hoy dre-pandlo his, vin nashell, te vell o voudar pre kerdo. Ačenn tardo! Ačenn tardo! denn le gole pal lende. Kek rissrell pes!

5. Mose 33:17

Leskri zoor hi yaake baro har i gouroumeskri zoor. Kolla, kay lestar venna hi har shinga i divye gourmendar. Kolentsa tradenn le i menshen dran vavar themma bis an i doureder themma ap i phoub. Kova krenn i menshe, kay venna o Yosefeskre douy čavendar: kol 10.000 (deesh-zerya) dran o kheer Efrayim, oun kol zerya dran o kheer Manasse.