Haggai 2:2 - O Debleskro Lab 2024 (Sinte-Manouche)

² Pen ap o Zorobabel, ko pralstuneste pral o them Youda, koleskro dad o Shealtiel hi, oun ap o baro rashayeste, o Yeshoua, koleskro dad o Yozadak hi, oun ap i tsele menshende, kay pral ačan an o them:

O Debleskro Drom 2021 (Sinte)

² Pen ap o Serubbabel, ko pralstuneste pral o them Juda, koleskro dad o Shealtijel hi, un ap o baro rashajeste, o Jeshua, koleskro dad o Jozadak hi, un ap i tsele menshende, kai pral atchan an o them:

Haggai 2:2 Iomraidhean Croise

Esra 1:8

Oun o Cyrus, ko ray pral Persia, das halauter an o vast kolestar, kay pral o bravlepen his. Leskro lab his Mitredat. Oun o Mitredat činas kol tsele koola an i liil, oun das ko liil o Sheshbazar. Kova his o pralstouno pral o them Youda.

Esra 2:63

Oun ko moskro penas lenge, te nay rhan le gar o rhapen, hoy kokres i rashayenge his, yaake rah bis te i rashay vas oun vin hatsas, hoy i barra Momeli oun Čačepen pral kava koova penan.

Esra 3:2

Oun o Yeshoua, koleskro dad o Yozadak his, kras pes ap i boudi khetne peskre phralentsa, kol rashayentsa, oun o morsheha Zorobabel, koleskro dad o Shealtiel his, oun leskre phralentsa. Oun yon kran i nevi sasterni rhačepaskri, te nay rhačrenn le firhen koy pre o Israeleskro Debleske, yaake har činlo hi an o liil o Debleskro morshestar, o Mosestar.

Nehemia 8:9

Oun i tsele menshe rovan, har shounan le kol laba, hoy an o Moseskro liil tardo his. Oun o Nehemia, kova his o moskro pral o foro Yerusalem, oun o rashay Esra, kova his o sikepaskro, oun kol Levitarya, kay i menshenge penan, hoy o Debleskro lab kamell te penell, kolla penan ap lauterende: “Kava dives hi i baro dives o baro Debleske, kay t'maro Devel hi. Doleske moukenn t'mare djia gar phares te vell! Oun ma rovenn!”

Haggai 1:1

An o douyto bersh, har o Darius o baro ray his, ap o ersto dives an o shobto čon, penas o baro Devel laba ap peskro rakepaskro, o Haggay, te penell yob kal laba doureder ap o Zorobabel, koleskro dad o Shealtiel his, oun ap o Yeshoua, koleskro dad o Yozadak his. O Zorobabel his o pralstouno pral o them Youda, oun o Yeshoua his o baro rashay.

Haggai 1:12

Oun o pralstouno, o Zorobabel, koleskro dad o Shealtiel his, oun o baro rashay, o Yeshoua, koleskro dad o Yozadak his, kolla shounan kol laba. Ninna shounan len kol tsele menshe, kay his gar pandles krik anlo. Kol laba penas lenge o Debleskro rakepaskro, o Haggay, koles lengro baro Devel pash lende bičras. Oun i menshe lan kol laba an o dji, oun trashan o baro Deblestar.

Haggai 1:14

Oun o baro Devel čivas lenge an o dji, te boudrenn le ap o baro Debleskro kheer. Oun yaake vas o Zorobabel, ko pralstouno pral o them Youda, koleskro dad o Shealtiel his, oun o Yeshoua, ko rashay, koleskro dad o Yozadak his, oun kol tsele menshe, kay gar pandles krik anlo van, te boudrenn le ap o kheer o baro Deblestar, ko rayestar pral o bolepen oun i phoub.