Ester 2:18 - O Debleskro Lab 2024 (Sinte-Manouche)

¹⁸ Oun o baro ray kras i baro rhapen i tsele rayenge oun pralstunenge, te vell i Ester hadedo. Oun i tsele themenge moukas lo love palla, hoy yon leste hounte dans. Oun moukas djob čičeske vin te dell, yaake har bare raya krenna.

O Debleskro Drom 2021 (Sinte)

¹⁸ Un o baro rai kras i baro chapen i tsele rajenge un pralstunenge, te well i Ester hadedo. Un i tsele themenge mukas lo lowe palla, hoi jon leste hunte dans. Un mukas djob tchitcheske win te dell, jaake har bare raja krenna.

Ester 2:18 Iomraidhean Croise

1. Mose 29:22

Oun o Laban penas hakeneske an ko foro, te venn le koy ap i biyab. Oun yob kras i bari biyab.

Nehemia 8:11

Oun i Levitarya rakran lačes ap i menshende oun penan: “Ačenn kanna! Kava dives hi i Debleskro dives. Moukenn t'mare djia gar yaake phares te vell!”

Ester 1:7

O pipen vas vin čoredo an khore dran sonakay, kolendar his kek har o vavar. Oun das boud rayeskri mool, boudeder har boud. O baro ray rikras lat gar pale.

Ester 9:22

te bistrenn le gar, kay an kol divessa i bibolde vin lino van dran i čilače vasta, oun kay kava o čon hi, kay vas barht dran lengre douka, oun sapen dran lengro ropen. Doleske hounte rikrenn le kol divessa bares, oun venn khetne, rhan oun piyenn oun hi barhtelo. Oun yek te dell o vavareste lačo rhapen. Oun ninna i čorvele hounte venn gar bistedo oun hounte lenn čomone.

Kamlepaskri gili 3:11

T'mer ča dran o foro Yerusalem, avenn vin! T'mer ča dran Sion dikenn o baro rayes, o Salomes! Dikenn leskri rayeskri stadi, hoy leskri day leske ap o shero čivas, ap ko dives, kay lo romedineras, oun leskro dji i barhtyatar bashras.

Kamlepaskri gili 5:1

Me vau an miri baar, heyo, miri pirni. Oun lau mire soungepaskre roukengre, kashta oun patria. Oun rhau miro goudlo gvin, oun piyau miri mool oun miro thoud. Rhan, mala, oun piyenn! Oun venn mate an t'maro kamlepen!

Mateo 22:2

“Te dell o Devel i menshen gole, te venn le pash leste, hi kova yaake har pash i baro rayeste, kay kras peskro čaveske i bari biyab.

Markus 6:21

Koy vas i dives, kay hi mishto i Herodiake. O Herodes vas i bersh phoureder oun moukas i baro rhapen te krell. Pash ko rhapen van i pralstoune pral peskro them, ninna i pralstoune lourde. Oun i bravele dran o them Galilea his ninna koy.

Louka 14:8

“Te penell yek ap toute: Am ap i biyab! palle besh tout gar ap o feteder beshepaskro kote! Nay vell yek morsh, kay hi bareder har tou.

Debleskro tsiro 11:10

I menshe ap i phoub hi barhtelo, oun givenna oun khelenna. Oun yek bičrell o vavareske shoukar koova. Yaake barhtelo hi le, te hi kol douy Debleskre rakepangre moulo, kay doukran kolen, kay ap i phoub djivenna.

Debleskro tsiro 19:9

Oun o bolepaskro penas ap mande: “Čin an ko liil: Barhtele hi kolla, kay kharedo van, te venn le ap o terno bakreskro biyab. Kal laba hi čačepah o Debleskre laba,” penas lo ap mande.

1. Samuel 25:8

Pouč tire boudepangre, kolla penenn les touke! Yaake ab lačes ap kal morshende! Kava dives hi i baro dives touke! De men, tire boudepangren oun tiro males David, hoy tout pash o vast hi!”