Efesarja 4:16 - O Debleskro Lab 2024 (Sinte-Manouche)

¹⁶ Yob rikrell len khetne yaake, te vell yek patslo i vavareha khetne anlo. Oun yek patslo hidjrell o vavares yaake, har les i zoor hi. Mer te ham yaake kamlo, ko yek ap o vavareste, palle vell o Debleskri familya baro oun zorelo.

O Debleskro Drom 2021 (Sinte)

¹⁶ Job rikrell len khetne jaake, te well jek patslo i wawareha khetne anlo. Un jek patslo hidjrell o wawares jaake, har les i soor hi. Mer te ham jaake kamlo, ko jek ap o wawareste, palle well o Debleskri familja baro un sorelo.

Efesarja 4:16 Iomraidhean Croise

Johanni 15:5

Me hom ko drakengro rouk. Oun t'mer han kol kashta. Koon ačell an mande oun me an leste, dran koleste vell boud lačepen. T'mer te han gar mantsa khetne, nay krenn t'mer či.

Remarja 12:4

I menshes hi yaka, vasta, pire. Oun hako kotar krell gar i emligi boudi.

1. Korintarja 10:17

Mer rhah yek maro. Doleske hi men yek djipen khetne o Yezouseha, ninna te ham boud patsle.

1. Korintarja 13:13

Kanna ačenna menge kalla triin: – O patsepen ap o Debleste; – i barht, te djinah mer, te vell lauter mishto; – o Debleskro kamlepen. O bareder kol trinendar hi o Debleskro kamlepen.

1. Korintarja 8:1

T'mer poučan mandar: “Nay rhah mer, kay patslo ham, ko mass, hoy vas glan i figura anlo, hoy mangenn le an, har te vals li i devel?” Hi čačo, mer halauter ham gosevo oun djinah čomone pral kava koova. Koon patsell, te hi les boud gosvepen, kova patsell sik, te hi lo bareder har ko vavar. Koon o djiyestar o vavares kamella, koles krell yob zorelo oun gar tikno.

Galatarja 5:22

Kones hi o Debleskro Dourho an peskro dji, dran koleste vella lačepen: Les vell o Debleskro kamlepen oun barht an o dji. Yob kamell kek čingepen. Yob rikrell lauter vin. Yob hi lačes ap i vavarende. Les hi i baro dji i vavarenge. Kova, hoy yob penell, ap kova rikrell pes yob.

Galatarja 5:6

O Yezous Kristeske molell či, te hi i morsh ap o mass činlo, vitar gar, te hi lo gar činlo. Kova, hoy hi boudeder moldo har lauter, hi o patsepen. Ko patsepen dikah mer ap o kamlepen, kay yekes hi i vavareske.

Efesarja 1:4

Har o bolepen oun i phoub gar koy his, rodas lo men vin, te djas ap o Yezouseskro drom. Yob rodas men vin, te dell lo men i djoudjo dji, te hatsell lo kek doosh ap mende. Yaake boud kamas lo men,

Efesarja 3:17

Me mangau lestar ninna, te djivell o Yezous Kristo an t'mende dran t'maro patsepen, oun te kamenn t'mer o Debles oun ninna yek o vavares o djiyestar. Palle han t'mer har i rouk, koleskre draba djan dour an i phoub. Oun t'mer han har i kheer, hoy zoreles tardo hi.

Efesarja 3:7

Kava lačo lab penau i menshenge. O Devel his mange lačo, te das lo man kay boudi. Ninna das lo man i zoor, te krap kova.

Efesarja 4:12

Lauter kolla krenn pengri boudi, te venn i tsele patsle zoreles an o patsepen, oun te hayvenn le o Debleskri boudi mishto te krell.

Efesarja 4:15

Mer hounte djivas an o čačepen oun penas o čačepen i menshenge. Maro kamlepen hounte vell kek rhorheno kamlepen. Yaake vah mer boud oun boudeder har o Yezous Kristo. Kova hi o pralstouno pral lauterende, kay patsenn ap leste.

Filiparja 1:9

Oun me mangau o Deblestar, te vell t'maro kamlepen bareder oun bareder, te hayvenn, hoy o Devel kamella, oun te djinenn, hoy te krenna.

Kolossarja 2:19

Yon rikrenn pen gar ap o Yezous Kristeste, ko ray pral i tsele patslende. Yaake har i kokale i menshes khetne rikrenna, yaake rikrell yob i patslen khetne pash leste, oun dell len lauter, hoy len hounte vell djipaske. Oun yon venna baro oun zorelo an o patsepen yaake, har o Devel kova kamella.

Kolossarja 2:2

Kova krau, te venn t'mer zoreles an t'maro dji, oun rikrenn khetne an o kamlepen. Ninna kamau, te hayvenn t'mer mishto o Debleskro drom, hoy i menshe i rah tsiro gar djinan. Ko drom hi o Yezous Kristo.

1. Tessalonikarja 1:3

Hako tsiro, kay parkrah men pash leste, vell menge kova an o shero, hoy t'mer leske krenna an o patsepen oun an o kamlepen ap i menshende, oun har t'mer moukenn gar tele, te dikenn ap ko dives, kay vell maro ray, o Yezous Kristo, pale.

1. Tessalonikarja 2:13

Doleske moukah gar tele, te parkras men pash o Debleste, te patsan t'mer o Debleskro lab, hoy t'menge penam. Oun t'mer hayvan, ko lab vell čačepah o Deblestar oun gar i menshendar. Oun t'maro djipen sikrella, te patsenn t'mer ap ko lab.

1. Tessalonikarja 3:12

T'menge mangau me maro rayestar, o Yezousestar, te vell t'maro kamlepen baro oun bareder mashkral t'mende oun i vavar menshenge ninna. Yaake baro hi ninna maro kamlepen t'menge.

2. Tessalonikarja 1:3

Mire phrala, mer hounte parkras men t'menge pash o Debleste hako tsiro, yaake boud lačepen shounam t'mendar. T'maro patsepen vell baro oun bareder. Oun pash t'mende lauterende vell o kamlepen bareder, kay yek o vavareske hi.

1. Timoteo 1:5

Lauter, hoy peneh tou lenge pral o patsepen, hounte sikrell lende, te vell lengro kamlepen dran i djoudjo dji, oun te vell len i patsepen, an koleste kek rhorhepen hi, oun te krenn le lauter yaake, har lengro dji lenge penella.

1. Petro 1:22

T'mer shounan ap o čačo lab, oun čivan o čilačepen dran t'maro djipen krik. Kanna nay kamenn t'men čačepah har phrala oun phenya. Moukenn gar tele, te kamenn t'men o tselo djiyestar!

1. Johanni 4:16

Mer hayvam ko čačo kamlepen, hoy o Debles menge hi. Oun mer patsah, te kamell men o Devel čačepah! O Devel hi pherdo kamlepen. Koon an o Debleskro kamlepen ačella, kova ačella o Debleha, oun o Devel ačell leha.