Daniel 5:7 - O Debleskro Lab 2024 (Sinte-Manouche)

⁷ Oun o baro ray das zoryah gole oun penas, te anenn le i dravepangren pash leste, ninna kolen, kay an i bolepangre momlia draverenn oun kolen, kay i moulen poučenn. Oun yob moukas kol siklenge dran o foro Babilon te penell: “Hakeno, kay nay draverella, hoy koy činlo hi, oun mange nay penella, hoy kova kharella, kova vell rido an rayengre lole koola, oun lell koy pashel i sonakaskri verkli troul peskri meen. Oun yob vell o triinto pralstouno an miro them.”

O Debleskro Drom 2021 (Sinte)

⁷ Un o baro rai das sorjah gole un penas, te anenn le i drawepangren pash leste, ninna kolen, kai an i bolepangre momlia drawerenn un kolen, kai i mulen putchenn. Un job mukas kol siklenge dran o foro Babilon te penell: “Hakeno, kai nai drawerella, hoi koi tchinlo hi, un mange nai penella, hoi kowa kharella, kowa well rido an rajengre lole koola, un lell koi pashel i sonakaskri werkli trul peskri meen. Un job well o triinto pralstuno an miro them.”

Daniel 5:7 Iomraidhean Croise

1. Mose 41:8

Taysarlakro daras yob. Oun yob moukas i tsele dourkepangre oun goseve an o them Egiptia te kharell. Oun o baro ray penas lenge, hoy yob souni das. Oun kek his koy, kay penell nashte, hoy koy souni leske penella.

Ester 3:1

Pal i tsiro hadas o baro ray Ahasveros i morshes pral i tsele pralstunende, kay pash leste hi. Ko morsh kharas Haman. Leskro dad his o Hammedata i menshendar Agag.

2. Mose 7:11

Kote moukas o Farao i goseve morshen oun i dourkepangren gole te dell. Oun kol egiptikre dourkepangre kran emligo koova an pengri zoor.

Gosewe laba 1:9

Kova hi touke har i shoukar stadi ap tiro shero, har i verkli troul tiri meen.

Kamlepaskri gili 1:10

Tire čamya hi shoukar mank i kanengre, oun tiri meen hi shoukar an verklia dran mirklia.

Jesaja 47:13

Boud goseve penan touke, hoy te kress, yaake te val khino kol boud labendar. Mou venn le kanna oun lenn tout dran i bibarht vin, kolla, kay draverenn an i bolepangre momlia, te djinenn le, hoy vella, oun hako nevo čon touke penenn, hoy pral toute vell.

Jeremia 50:35

O baro Devel penell: O rharo mou vella pral o them Babilonia, oun pral o foro Babilon peskre pralstunentsa oun goseve morshentsa!

Ezekiel 16:11

Oun kouč koova čivom ap toute: Verklia troul tire moussya, oun troul tiri meen,

Daniel 1:20

Oun an hako koova, hoy o baro ray lendar poučas, his yon deesh kope gosveder oun hayvan boudeder har i tsele dourkepangre oun dravepangre an i tsele themma, kay o Neboukadnezar baro ray his.

Daniel 1:4

“Yon hounte venn sasto oun shoukar, gosevo oun siklo”, penas lo. “Ninna hounte hayvenn le pen an halauter mishto vin, oun nay hayvenn sik, yaake te nay boudrenn le mange an miro kheer. Oun lenge vell pashel anlo, har i Kaldearya rakrenn oun pengro rakepen činenn.”

Daniel 2:2

Oun o baro ray moukas khetne te kharell i tsele dourkepangren oun dravepangren, kolen, kay bengeskro koova krenn oun kolen, kay an i bolepangre momlia draverenn. Yon hounte penan leske, hoy leskri souni kamell te penell. Oun yon van oun his tardo glan leste.

Daniel 2:27

Oun o Daniel penas ap o baro rayeste: “Kova, hoy tou kameh te djinell, miro ray, kova nay penell touke kek siklo, kek dravepaskro, kek dourkepaskro oun kek, kay nay draverell an i bolepangre momlia.

Daniel 2:48

Oun o baro ray kras o Danieles baro, oun das les boud kouč koova. Oun yob čivas les pral o tselo them Babilonia, oun das les penepaske koy pral oun kras, te vell lo o pralstouno pral i tsele sikle morshende an o them Babilonia.

Daniel 2:6

T'mer te penenn mange koy souni oun hoy koya kamell te penell, palle krau me t'men braveles oun bares. Doleske penenn mange koy souni oun hoy koya kamell te penell.”

Daniel 4:14

I bolepangre, kay lauter an o yak lenn, rakran kova vin. Oun yon, kay venna o Deblestar, kamenn, te vell kova yaake, te dikenn i menshe, te hi o pralstouno Debles i zoor pral i rayengre themma, oun yob len koleste dell, koneste yob kamell. Koles, kay tikno hi mank i menshende, nay čivell yob pral lende.

Daniel 5:11

Koy hi i morsh an tiro them, an koleste hi o dourho i bolepangre deblendar. An kol divessa, har tiro dad o baro ray his, sikras pes, kay an leste yaake boud gosvepen hi har i deblen hi. Yob hayvell oun djinell, hoy kek vavar hayvell oun djinell. Oun tiro dad Neboukadnezar čivas les pral i tsele dourkepangre oun dravepangre oun pral kolende, kay an i bolepangre momlia draverenn, oun kay i moulen poučenn.

Daniel 5:15

Me moukom i siklen oun dravepangren glan mande te anell, te draverenn le kol laba, hoy koy činlo hi, oun te penenn le mange, hoy kolla kamenn te penell. Oun yon hayvan kova gar.

Daniel 5:16

Toutar shounom, te nay peneh tou, hoy kova kamell te penell, oun te nay čakreh tou pre, hoy kek djinell. Hayveh tou kanna kol laba te draverell, hoy kote činlo hi oun nay peneh mange, hoy kolla kamenn te penell, palle veh tou rido an rayengre lole koola, oun leh koy pashel i sonakaskri verkli troul tiri meen. Oun tou veh o triinto pralstouno an miro them.”

Daniel 5:29

Har o Daniel kol laba rakras, penas o Belsazar, te rivenn le les an lole rayengre koola, oun čivenn leske i sonakaskri verkli troul leskri meen. Oun yob hadas les, te vell lo o triinto pralstouno an o rayeskro them.

4. Mose 22:17

Me kamau touke bravlepen te dell. Oun hoy tou mange peneh, kamau me te krell. Am ap miri rig oun rake i bibarht vin pral kal menshende!”

4. Mose 22:7

Oun i phoureder kol menshendar Moab oun Midian djan khetne pash o Bileam. Oun love his an lengre vasta o dourkepaske. Oun yon van pash leste, oun penan leske kol laba, hoy o Balak penas.

4. Mose 24:11

Dja kanna touke! Dja an tiro them! Me kamom te dap tout boud bravlepen. O baro Devel kamas gar te dap tout bravlepen.”

1. Samuel 17:25

Oun yek penas ap o vavareste: “Dikal ko morshes, har kova pre vas? Kova vella, te praasell lo o Israel. Koon koles marella, koles kameh maro baro ray braveles te krell. Oun yob kamell les peskri čate te dell, oun leskro dadeskro kheer hounte dell leste bouder či kolestar, hoy le dren anenna.”