Daniel 11:18 - O Debleskro Lab 2024 (Sinte-Manouche)

¹⁸ Palle djal lo pash i panyeskre themma, oun lell lendar boud dren. Oun i pralstouno dran i vavar them čivell pes leske an o drom oun krell, te hounte rikrell lo peskro baro mouy. Oun leskro pre-phourdepen vell ap leste pale.

O Debleskro Drom 2021 (Sinte)

¹⁸ Palle djal lo pash i panjeskre themma, un lell lendar bud dren. Un i pralstuno dran i wawar them tchiwell pes leske an o drom un krell, te hunte rikrell lo peskro baro mui. Un leskro pre-phurdepen well ap leste pale.

Daniel 11:18 Iomraidhean Croise

Ester 10:1

Oun o ray Ahasveros čivas ap o them oun ap i panyengre themma i siyaan, hoy i menshe hounte playsrenna.

Jesaja 66:19

Oun me čivau i sikepen pre mank lende. Oun kolendar, kay djides ačan, bičrau me pash i menshende an themma Tarsis, Poul oun Loud, Meshek, Rosh, Toubal, Yavan oun pash kolende dour vergel o baro pani, kay mandar gomme či shounan, oun miro raylepen gomme gar dikan. Oun mire bičepangre penenn kol menshenge, har raylo me hom.

Jeremia 2:10

Djan pral o baro pani pash i panyeskre themma, kay kol Kitarya djivenn, oun dikenn t'men trouyel! Bičrenn morshen an o them Kedar oun lenn i menshen kote ninna an o yak! Krenn yon savo koova har t'mer kran?

Jeremia 31:10

Shounenn, t'mer menshe dran vavar themma, hoy o baro Devel penell! Djan pral o baro pani pash i panyeskre themma, oun rakrenn kote leskre laba! Penenn: Kova, kay tradas o Israel an boud themma, kova lell len pale khetne oun dell garda ap lende har i bakrengro ap peskre bakre garda dell.

Ezekiel 27:6

Tire lengste činle kashta his dran cipresstikro kasht, hoy dran o them Kittim lino vas. Dren čiddo an kol kashta his elefantikro dand. Dran o them Bashan vas aichtikro kasht. Kolestar činan le kol kashta, kolentsa o shiffo tserdedo vell.

Hosea 12:14

O baro Devel bičras peskro rakepaskres, te anell lo i Israelitaryen dran o them Egiptia vin. Oun leskro rakepaskro das yak ap lende.

Zefanja 2:11

Kanna krell o baro Devel lenge bari daar, te krell lo i rhorhene deblen ap i tseli phoub paash. Oun an hake themma vitsrenn pen i menshe glan leste tele, hakeno an peskro them.

Mateo 7:2

Te hi t'men i baro dji i vavarenge, hi o Debles ninna i baro dji t'menge. Hi t'men kek baro dji lenge, hi o Debles vitar gar i baro dji t'menge.

Čačepangre 1:7

Koy penas o Adoni-Besek: “Efta-deesh bare rayenge moukom i pesse goushte lengre vastendar tele te dell oun ninna i bare goushte lengre pirendar. Oun yon hounte rhan, hoy miri rhapaskri tele peras. Oun yaake har me les lentsa krom, yaake das les man o Devel pale.” Oun yon anan les an o foro Yerusalem. Oun kote meras lo.