Bičepangre 19:23 - O Debleskro Lab 2024 (Sinte-Manouche)

²³ Ap ko tsiro vas i baro čingepen an o foro Efesus pral o nevo patsepen ap o Yezouseste.

O Debleskro Drom 2021 (Sinte)

²³ Ap ko tsiro was i baro tchingepen an o foro Efesus pral o newo patsepen ap o Jesuseste.

Bičepangre 19:23 Iomraidhean Croise

Bičepangre 18:26

O Apollo djas an i biboldengri kangri, oun les his kek traash, te penell lo kote i biboldenge o Yezousestar. Har o Akvila oun i Priska les shounan, lan le les pash pende khere, oun sikran leste o Debleskro drom feteder oun boudeder.

Bičepangre 19:9

Koy his ninna menshe pashel, kay kaman o Yezousestar či te djinell oun kaman gar ap leste te patsell. Oun glan i menshende rakran le djoungelo koova pral o patsepen ap o Yezouseste. Koy moukas o Paulo kol vavar patslentsa i biboldengri kangri, oun rakras hako dives an ko sikepaskro kheer, kay o Tiranno o sikepaskro hi.

Bičepangre 22:4

Me lom kolen palla, kay djan ap o nevo drom – me lom len yaake palla, te marom len. Morshen oun djouvyen pandom, oun vitsrom len an o stilepen.

Bičepangre 24:14

Kava penau touke: Hi čačo, kay me djau ap ko nevo drom, hoy hi kolenge i rhorheno drom. Ap kava nevo drom mangau me ko Debles an, koles ninna mire phoure an-mangan. Oun me patsau halauter, hoy o Mose oun o Debleskre rakepangre an pengre lila činan.

Bičepangre 24:22

O Felix, kay boud djinas ko nevo dromestar, čivas o tselo koova ap o vavar dives, oun penas: “Te vell ko pralstouno lourdo Lisias pash mende, palle penau me, hoy me krau o Pauleha.”

Bičepangre 9:2

oun mangas kolestar lila, te nay djal lo an i biboldengre kangria an o foro Damaskus, te nay taprell yob kote kolen, morshen har djouvyen, kay ap o Yezouseskro drom djana, te anell lo len an o foro Yerusalem.

2. Korintarja 11:26

Ap miro drom an boud vavar forya oun themma his boud kope o merepen glan mire yaka. Me nay tassoms an i divye panya, oun kol čorepangre nay dans man moulo. Oun i bibolde, oun ninna kolla, kay kek bibolde hi, kolla lan man palla. An o moulo them oun an o baro pani, kay homs, his o merepen glan mire yaka, oun ninna, har homs mank kol phralende, kay hi kek čače phrala.

2. Korintarja 6:5

Ninna te denn le men dava, te vitsrenn le men an o stilepen, te lenn le men palla, dah mer gar pre. Mer marah men tele, oun della divessa, kay sovah gar oun rhah gar.

2. Korintarja 6:9

Pash yekeste ham prindjedo, pash i vavarende ham gar prindjedo. Ninna te hi o merepen glan mare yaka, ham gomme djido. Mer lam dava oun meram gar.