Bičepangre 13:50 - O Debleskro Lab 2024 (Sinte-Manouche)

⁵⁰ Koy djan i pralstoune bibolde pash kol bravele djouvyende, kay lan i biboldengro patsepen an, ninna pash kol pralstunende an ko foro, rakran lentsa oun kran, te van le rhoyedo ap o Pauleste oun ap o Barnabeste. Oun khetne lentsa lan le len palla oun tradan len dran ko foro vin.

O Debleskro Drom 2021 (Sinte)

⁵⁰ Koi djan i pralstune bibolde pash kol brawele djuwjende, kai lan i biboldengro patsepen an, ninna pash kol pralstunende an ko foro, rakran lentsa un kran, te wan le chojedo ap o Pauleste un ap o Barnabeste. Un khetne lentsa lan le len palla un tradan len dran ko foro win.

Bičepangre 13:50 Iomraidhean Croise

1. Rajengro liil 21:25

Čačepah, kek his koy har o Ahab, kay bikras pes, te krell lo o čilačepen glan i yaka o baro Deblestar. Oun leskri romni, i Isebel, his koya, kay anas les ap kava čilačo drom.

Jesaja 66:5

Shounenn, hoy o baro Devel penell, t'mer, kay glan leskro lab darenna. T'mer rikrenn pash mande, doleske rhoyrenn pen t'mare phrala pral t'mende, oun čivenn t'men pale, oun praasenn t'men oun penenn: Mou sikrell o baro Devel peskro barepen oun peskri zoor, te dikas mer, har yob t'men barhteles krell! Kolla hounte ladjenn pen palle.

Amos 7:12

Oun o Amazya penas ap o Amos: “Tou dikepaskro, dja touke, oun naash an o them Youda! Kote nay rakreh an o Debleskro lab, oun yon denn tout tiro maro.

Mateo 10:23

Te lenn le t'men an yek foro palla, palle nashenn an i vavar foro! Čačepah, me penau t'menge, t'mer venna gar an hako foro an o them Israel yaake rah har o Mensheskro Čavo gar pale vas.

Markus 15:43

vas o Yosef. Kova his dran o foro Arimatia, oun his yek kol pralstoune biboldendar, kolen penepaske his. Oun yob dikas ninna ap o Debleste, te vell ko tsiro, kay hakeno dikell, kay o Devel o baro ray hi. O Yosef las pes khetne, djas pash o Pilateste, oun mangas lestar, te dell lo les o moulo Yezouses.

Markus 5:17

Oun yon mangan o Yezousestar, te djal lo dran lengro them vin.

Bičepangre 13:43

Oun har i menshe dran i biboldengri kangri vin djan, nashan boud lendar o Pauleske oun o Barnabeske palla. Kolla his bibolde oun save, kay lan i biboldengro patsepen an. Oun o Paulo oun o Barnabas rakran boudeder lentsa oun penan lenge: “Rikrenn ap ko patsepen, kay o Devel i doosh kolendar krik lella, kay patsenn ap leskro čaveste.”

Bičepangre 13:45

Har i bibolde kol boud menshen dikan, zilveran le ap kol douyende. Yon čingran ap o Pauleste, oun rakran i djoungele laba pral leste.

Bičepangre 14:19

Koy van bibolde dran i forya Antiochia oun Ikonion an kava foro. Kolla lan boud menshen ap pengri rig, lan barra, vitsran i barrentsa ap o Pauleste, tserdan les dran o foro vin, oun dikan ap leste, oun penan: “Kova hi moulo.”

Bičepangre 14:2

Kol bibolde, kay van gar patslo, penan, te vals kova gar čačo, hoy o Paulo penas, oun kran, te van kolla, kay kek bibolde hi, rhoyedo ap i patslende.

Bičepangre 14:4

I menshe an ko foro djinan gar, koneske te patsenn le. His save, kay rikran kol biboldentsa khetne. Vavar rikran pen ap o Yezouseskre bičepangre.

Bičepangre 14:5

Kova djas yaake dour, kay čivan pen i bibolde khetne kolentsa, kay kek bibolde hi. Oun khetne lengre pralstunentsa kaman le ap kol douyende pre te djal, te denn le len i barrentsa moulo.

Bičepangre 16:14

Koy his i djouvel, kay mangas kote o Debles an. Yoy his i bikepaskretsa oun bikras ripya dran lolo than. Koya kharas Lydia. Yoy his dran o foro Tiatira. Kolake kras o ray Yezous o dji pre. Oun yoy shounas, hoy o Paulo penas, oun vas patslo.

Bičepangre 17:12

Boud lendar van patslo, ninna boud bravele griche, djouvya har morsha.

Bičepangre 17:13

Har shounan kol bibolde an o foro Tessalonika, te penas o Paulo ninna i menshenge an o foro Berea o Debleskro lab, van le kote oun kran čingepen. Yon kaman, te venn i menshe rhoyedo ap lende.

Bičepangre 17:17

Yob rakras an i biboldengri kangri ap i biboldende, oun ninna ap kol grichende, kay lan o biboldengro patsepen an. Oun hako dives rakras lo mashkral an o foro ap kol menshende, kay yob kote dikas.

Bičepangre 17:4

Mank i biboldende his save, kay patsan kova, hoy o Paulo lenge penas. Oun yon rikran pen ap i rig o Paulestar oun o Silasestar. Ninna boud, boud griche, kay lan o biboldengro patsepen an, patsan kova, hoy o Paulo penas. Mank lende his ninna boud an-dikle djouvya.

Bičepangre 18:7

Yob djas peske, oun vas an o kheer yekestar, kay las i biboldengro patsepen an. Leskro lab his Titio Yusto. Koleskro kheer his pash i biboldengri kangri.

Bičepangre 2:5

Ap ko tsiro his an o foro Yerusalem bibolde dran boud themma, kay mangan o Debles an.

Bičepangre 21:27

Har his kolla efta divessa trouyel, dikan i bibolde dran o them Asia o Paules an o Debleskro baro kheer. Oun yon kran, te van boud menshe rhoyedo ap leste. Oun yon tapran les,

Bičepangre 28:17

Pal triin divessa das o Paulo kol pralstoune bibolden pash peste gole. Har yon lauter khetne his, penas o Paulo ap lende: “T'mer morsha, mire phrala, mare menshenge krom či, hoy čilačo his. Vitar gar rakrom djoungeles pral kova, hoy mare phoure menge penan. Oun ninna te krom lenge kek čilačepen, čivan le man stildo an o foro Yerusalem, oun dan man an i Remaryengre vasta.

Bičepangre 6:12

Yon kran kol tsele menshen divyo, ninna kol biboldengre phoureden oun čačepangren. Oun yon van ap leste pre, tapran les, oun anan les glan i pralstoune biboldende.

Bičepangre 8:1

His mishto an o Sauleskre yaka, te maran le les. Pal ko dives lan le i patslen zoreles palla an o foro Yerusalem. Oun i patsle nashan an o them Youdea oun an o them Samaria. I Yezouseskre bičepangre ačan an o foro Yerusalem.

Remarja 10:2

Me djinau čačepah, yon krenn boud koova o tselo djiyeha o Debleske. Ninna te krenn le kova, djinenn le čačepah gar, hoy o Devel kamella.

2. Korintarja 11:26

Ap miro drom an boud vavar forya oun themma his boud kope o merepen glan mire yaka. Me nay tassoms an i divye panya, oun kol čorepangre nay dans man moulo. Oun i bibolde, oun ninna kolla, kay kek bibolde hi, kolla lan man palla. An o moulo them oun an o baro pani, kay homs, his o merepen glan mire yaka, oun ninna, har homs mank kol phralende, kay hi kek čače phrala.

1. Tessalonikarja 2:14

Mire phrala, t'mare menshe lan t'men palla. Yaake djas t'menge har kol patsle biboldenge an o them Youdea. Lengre menshe, i bibolde, lan len ninna palla.

2. Timoteo 3:11

Tou djineh, har lan le man palla an i forya Antiochia, Ikonion oun Listra. Oun tou djineh, have douka yon mange kran. Oun kova lauter rikrom vin. Oun dran lauter kova las man o ray Yezous vin.