Amos 8:11 - O Debleskro Lab 2024 (Sinte-Manouche)

¹¹ I tsiro vella, penell o baro Devel, maro ray, koy bičrau i bok an o them. Kaya hi kek bok pal maro oun kek troush pal pani. Na-a, kaya hi i bok pal o lab o baro Deblestar, te shounenn le les.

O Debleskro Drom 2021 (Sinte)

¹¹ I tsiro wella, penell o baro Dewel, maro rai, koi bitchrau i bok an o them. Kaja hi kek bok pal maro un kek trush pal pani. Na-a, kaja hi i bok pal o lab o baro Deblestar, te shunenn le les.

Amos 8:11 Iomraidhean Croise

2. Familjakro liil 15:3

Boud bersha prindjran i Israelitarya o čačo Debles gar. Len his kek rashay, kay sikras lende o Debleskro drom, oun kek Debleskro lab, hoy penas lenge, har te djivenn le.

Debleskri gili 74:9

Kek sikepen hi bouder kay, hoy men sikrell, te hal tou pash mende. Kek Debleskro rakepaskro hi bouder kay. Oun kek djinella, har rah kova yaake ačell.

Gosewe laba 29:18

Te hi kek Debleskro rakepen koy, palle venn i menshe divyo oun bipandlo. Barhtelo hi kova, kay shounell ap o Debleskre laba.

Jesaja 5:6

Oun me moukau ko them čiddo, har lo hi. I rouka venn gar pale činlo, oun i phoub gar trouyel vitsedo. Palle venna soubyengre bourra oun soubyengro zenlepen bares koy pre. Oun me penau o brishineske, te perell lo gar koy tele.

Ezekiel 7:26

Bibarht pal bibarht vell. Pale te pale shounenn le, havo djoungelo koova vas. Čičeske djan le pash o Debleskre rakepangre, oun poučenn lendar, hoy o baro Devel sikras len. Vitar gar i rashaya nay penenn lenge, hoy te krenn le. Oun i phoureder djinenn kek drom vin dran o merepen.

Hosea 2:3

Penenn t'mare phralenge, te hi le mire menshe, oun ap t'mare phenya, te krau me miro dji lenge pre.

Micha 3:6

Doleske vell pral t'mende kali rati. T'mer dikenn bouder kek dikepen. Kek lab o Deblestar vell t'men. O kham djal tele t'menge, oun o dives hi t'menge har i rati.

Mateo 9:36

Oun har yob kol boud menshen dikas, khaytan le les. Yon his leske har bakre, kay hi len kek bakrengro, kay ap lende garda della. Yon his khino, oun len his bouder kek zoor an lende.

1. Samuel 28:15

Oun o Samuel poučas o Saulestar: “Hoske lal tou man dran miro sopen vin, oun moukal man pre te vell?” Oun o Saul penas: “Me hom an bari daar! I Filistarya djan an o kourepen te marenn le pen mantsa. Oun o baro Devel djas peske mandar, oun rakrell gar bouder ap mande. Leskre rakepangren hi kek lab mange, vitar gar rakrell lo mantsa an sounya. Kote moukom me tout pale gole te dell, te peness mange, hoy me hounte krap!”

1. Samuel 28:6

Oun o Saul poučas o baro Debles, hoy te krell lo. Oun kova penas leske či, das les kek souni, rakras gar leha kol tikne barrentsa, hoy vitsedo van, te sikrenn le, hoy kerdo hounte vella. Vitar gar nay penas leske i Debleskro rakepaskro, hoy te krell lo.

1. Samuel 3:1

An ko tsiro, har boudras o terno Samuel o baro Debleske tel o rashayeste, o Eli, rakras o baro Devel gar boud kope ap yekeste. His vitar gar boud kope, kay dikas yek i Debleskro dikepen.