Amos 6:14 - O Debleskro Lab 2024 (Sinte-Manouche)

¹⁴ “Doleske”, penell o baro Devel, ko ray pral o bolepen oun i phoub, “bičrau i natsyona, hoy djal ap t'mende, kay han dran o kheer Israel. Kolla menshe lenn t'maro them dren foun Lebo-Hamat bis pash o lengsto pani an o telstouno them.”

O Debleskro Drom 2021 (Sinte)

¹⁴ “Doleske”, penell o baro Dewel, ko rai pral o bolepen un i phub, “bitchrau i natsjona, hoi djal ap tumende, kai han dran o kheer Israel. Kolla menshe lenn tumaro them dren fun Lebo-Hamat bis pash o lengsto pani an o telstuno them.”

Amos 6:14 Iomraidhean Croise

1. Rajengro liil 8:65

Oun ap ko tsiro his kol bare divessa, kay djivenn i Israelitarya an patyengre khera. Oun o Salomo khetne kol tsele Israelentsa rikran kol bare divessa. His boud menshe kote khetne dran o tselo them, foun Lebo-Hamat bis pash koy tala mank Israel oun Egiptia. Efta divessa his le khetne glan maro baro Debleste, oun koy pal pale efta divessa. Kolla his khetne deesh-te-star divessa.

2. Rajengro liil 14:25

O Yerobeam las kol themeskre kotya pale dren, hoy vavar lenge krik lan, yaake te vas o them Israel pale khetne, ko forestar Hamat bis pash o Londo Baro Pani. Yaake vas čačo, hoy penas o baro Devel, o Israeleskro Devel, ap peskro boudepaskro, o Yona, koleskro dad o Amitay his, dran o foro Gat-Hefer. Oun o Yona, ko Debleskro rakepaskro, penas kova i Israelenge doureder.

2. Rajengro liil 15:29

An ko tsiro, har o Peka ko baro ray pral o them Israel his, vas o Tiglat-Pileser, ko baro ray pral o them Assour, oun peras an o them Israel dren oun las peske kol forya Iyon, Abel-Bet-Maaka, Yanoa, Kedesh, Hazor, Gilead oun dran o them Galilea ko tselo them Naftali. Oun moukas kol menshen, kay kote djivenn, krik te anell an o them Assour.

2. Rajengro liil 17:6

Oun har o Hoshea an o enyato bersh baro ray his, las o baro ray pral o them Assour o foro Samaria dren, oun anas i menshen dran Israel pandles krik an o them Assour, oun moukas len te djivell an o them Hala oun pash o lengsto pani Habor an o them Gosan, oun an i forya, kay i Medarya djivan.

Jesaja 7:20

An ko tsiro bičrell o Devel o baro rayes dran o them Assour. I vavar rigyatar o panyestar Eufrat kharell lo les kay, te vell lo har i čouri, hoy činell t'mare balla tele ap o shero oun ap i herya. Oun ninna i čora činell lo tele.

Ezekiel 47:20

Oun kote, kay o kham tele djal, djal o them Israel bis pash o Mashkralstouno Baro Pani, bis pre vergel o foro Hamat. Yaake dour djal o them Israel ap koy rig, kay o kham tele djal.

Hosea 10:5

I menshe an o foro Samaria darenn, te vell ko sonakaskro terno gouroum krik lino, hoy hi tardo an o foro Bet-Aven. Yon rovenna har pal yekeske, kay meras. Leskre rashaya trissenna troul leskro shoukapen, te vell lo lestar krik lino.

Amos 3:11

Doleske penell o baro Devel, maro ray, ap i menshende an Samaria: Kourepangre venn troul t'maro them, pandenn les dren, phagenn i zorele massurya tele, oun randenn t'mare khera vin.