5. Mose 17:8 - O Debleskro Lab 2024 (Sinte-Manouche)

⁸ Te vell čomone glan i čačepangre anlo, hoy hi yaake phares lenge, te djinenn le gar, hoy te krenn, – savo koova, te das yek i vavares moulo, oder doukas les, oder čingepen pral kova, hoy o yekeske oder o vavareske hi, palle krenn t'men ap o drom oun djan ap koy platsa, hoy t'maro baro Devel peske vin rodell.

O Debleskro Drom 2021 (Sinte)

⁸ Te well tchomone glan i tchatchepangre anlo, hoi hi jaake phares lenge, te djinenn le gar, hoi te krenn, – sawo koowa, te das jek i wawares mulo, oder dukas les, oder tchingepen pral kowa, hoi o jekeske oder o wawareske hi, palle krenn tumen ap o drom un djan ap koi platsa, hoi tumaro baro Dewel peske win rodell.

5. Mose 17:8 Iomraidhean Croise

2. Samuel 15:2

Ninna djas o Absalom taysarlake ap o drom, oun vas pash o foreskro voudar. Oun te his yekes čingepen i vavareha oun doleske pash o baro rayeste djas, te rakrell yob o čačepen pral lende vin, palle das o Absalom les pash peste gole, oun poučas: “Dran havo foro hal tou?” Oun te penas kova: “Tiro boudepaskro hi kalla oun kolla menshendar dran Israel”,

1. Familjakro liil 26:29

Dran o kheer Yizhar lan le o Kenanya oun leskre morsh čave, te venn yon pralstoune oun čačepangre morsha an Israel.

2. Mose 18:15

Oun o Mose penas ap leste: “I menshe venn pash mande, te nay poučenn le o Deblestar, hoy yob lendar kamella.

2. Mose 18:26

Kolla rakran pral i menshende o čačepen vin. Pral i tikno čingepen rakran yon kokres o čačepen vin. Oun o bareder koova anan le glan o Mose.

2. Mose 21:20

Te dell yek peskro boudepaskres i kashteha, yaake te merell lo, palle lell lo i phagi. Kova vell ninna yaake kerdo pash i boudepaskretsa.

2. Mose 21:22

Te čingrenn pen douy morsha, oun i romni, hoy an vavar koova hi, lell i dap, yaake te nashrell li peskro ternepen, oun yoy vell pale sasto, palle hounte playsrell kova, hoy das lat koy dap, love. Glan i čačepangre hounte playsrell lo yaake boud love, har lakro rom mangella.

2. Mose 21:28

Te dell i groumni i morshes i dap, yaake te merell lo, palle vitsrenn i groumyat i barrentsa moules! Kova vell ninna yaake kerdo, te dell i groumni i djouvyat i dap, te merell li. Kek rhal o mass koy groumyatar! Oun koleske koy groumni hi, kova lell kek phagi.

2. Mose 22:2

Djas o kham pre, har phagas lo dren, hi koles, hoy les moules das, i doosh ap leskro rat. I čorepaskro hounte dell lauter pale, hoy yob čoras. Te nay krell yob kova gar, palle vell lo bikedo oun vell i pandlo boudepaskro.

2. Mose 22:8

Kote, kay douy morsha čingrenn pen pral i groumni, i bourika, i bakro, i ripen, ninna pral vavar koova, hoy nashedo vas, kote hounte venn kol douy glan o Debleste. Oun kones o Devel i doosh dell, kova dell ko vavares douy kope yaake boud pale.

Ezekiel 44:24

Te vell i čingepen glan lende anlo, hi yon i čačepangre morsha oun hounte penenn o čačepen vin, oun hounte djan pal mire čačepaskre laba. Oun yon hounte krenn, te venn mire bare divessa ap o čačo tsiro yaake dren rikedo, har me penom, te vell kova kerdo. Ninna denn le yak, te vell o Debleskro dives dren rikedo.

Haggai 2:11

Kova penell o baro Devel, ko ray pral o bolepen oun i phoub: Pouč i rashayen, hoy yon penenn an kava koova:

Maleachi 2:7

Kova hi i rashayengri boudi: Yon hounte penenn o Debleskro lab an o čačepen, te nay djan i menshe pash lende, te kamenn le te djinell, hoy o baro Devel lendar kamella. I rashaya hi i bičepangre o baro Deblestar, ko rayestar pral o bolepen oun i phoub.

4. Mose 35:11

hounte rodenn t'mer forya vin, kay nay hakeno dren djala, kay naashepaskro hi, oun yekes moulo das, oun kamas kova gar.

4. Mose 35:16

Te das yek i vavares mit i kotar saster yaake, te merell yob, hi lo i marepaskro oun hounte vell moulo dino.

5. Mose 1:17

Oun dikenn gar koy pre, koon glan t'mende tardo hi! Shounenn i tiknen oun i baren! Ma darenn kekestar! Krenn yaake o čačepen vin, har te krals kova o Devel! Savo koova, hoy t'menge phares hi, kova anenn pash mande, te shounap me kova.”

5. Mose 12:11

Palle hi vavarčandes har kanna: Palle anenn kova, hoy denn o baro Debleste, ap koy platsa, hoy yob peske vin rodas, te vell lo kote an-mangedo. Kote anenn lauter, hoy me t'menge penau: kol firhen, hoy kamenn leske te marell, save, hoy venn leske tseles rhačedo oun save, hoy rhan khetne. Kote anenn ninna o deshto kotar kolestar, hoy dren anan, oun ko vavar koova, hoy glan činlo hi, oun kova hoy denna yaake har t'men sovel dan.

5. Mose 12:14

Kokres ap koy platsa, hoy o baro Devel vin rodell an t'maro them, kote anenn kol firhen, hoy kamenn leske te rhačrell, oun kote krenn halauter, hoy me t'menge penau.

5. Mose 12:5

Mangenn o baro Debles ap i platsa an, hoy yob peske vin rodell mashkral an o them Israel, te djivell lo kote. Kote djan, te mangenn les an.

5. Mose 19:17

palle venn kol douy, kolen čingepen pentsa hi, pash o baro Debleskro kheer, glan i rashayende oun glan i čačepangre morshende, kolla an kol divessa koy hi.

5. Mose 19:4

Savo foro hi koleske, kay das yekes moulo oun kamas kova gar, oun les his kek rholi ap leste. Kova nay nashell koy, te ačell lo djido.

5. Mose 21:5

Palle stakrenn i rashaya dran o kheer Levi glan. Kolen rodas t'maro baro Devel vin, te krenn le leskri boudi, oun te rakrenn le leskri barht vin pral i menshende. Oun an i čingepen oun pal i marepen rakrenn le o čačepen vin.

5. Mose 25:1

Te vell i čingepen mashkral morsha pre, oun yon glan čačepangre morshende stakrenn, oun o čačepen vell vin kerdo, palle vell pral koleste, kay an o čačepen his, glan halauterende vin rakedo, te hi yob an o čačepen. Oun pral koleste, koles doosh his, vell glan halauterende vin rakedo, te hi les doosh.