5. Mose 17:2 - O Debleskro Lab 2024 (Sinte-Manouche)

² Te shounenn t'mer i morshestar, i djouvyatar an yek foro t'mendar, hoy t'maro baro Devel t'men dell, oun kova oder koya krell sau koova, hoy an i yaka t'maro baro Deblestar djoungelo hi, oun phagell koy sovel, hoy t'mer leske dan,

O Debleskro Drom 2021 (Sinte)

² Te shunenn tumer i murshestar, i djuwjatar an jek foro tumendar, hoi tumaro baro Dewel tumen dell, un kowa oder koja krell sau koowa, hoi an i jaka tumaro baro Deblestar djungelo hi, un phagell koi sowel, hoi tumer leske dan,

5. Mose 17:2 Iomraidhean Croise

2. Rajengro liil 18:12

Kova lauter vas pral i Israelitarya doleske, kay yon gar shounan ap i laba lengro baro Deblestar, oun rikran pen gar ap kova, hoy yob lentsa vin kras; oun ap halauter, hoy o Mose, o baro Debleskro boudepaskro lenge penas, yon shounan gar koy pre, oun djivan gar koy pal.

2. Rajengro liil 21:3

Yob čivas kol moulne platse pale pre, kay i moule deblenge firhe rhačedo van. Kol platse das leskro dad, o Hiskiya, khetne. Oun o Manasse moukas rhačepangre te krell, kay firhe rhačedo venn o debleske Baal, kay i rhorheno devel hi. Oun yob kras i debletsa Ashera, har ko baro ray pral o them Israel, o Ahab, kova ninna kras. Oun yob mangas i bolepangre momlia an oun vitsras pes glan lende tele.

Hiob 31:28

Kova vals i doosh, hoy hounte vals glan o čačepangre morshende anlo. Koleha phoukroms ap o Debleste an o pralstunepen.

2. Mose 22:19

Kova, hoy dell i vavar debleske i firho temerl, oun gar o baro Debleske, kova vell infam.

2. Mose 22:20

Ma krenn kolen o djipen phares, kay hi vi-themarya pash t'mende! Oun moukenn len gar čičeske t'menge te boudrell! Bistrenn gar, te hans t'mer ninna vi-themarya an o them Egiptia.

Jeremia 31:32

Kova hi gar har kova, hoy lengre phourentsa vin krom, har lom len pash o vast oun lom len dran o them Egiptia. Kol laba, hoy lende dom, te rikrenn le pen ap lende, phagan le, ninna te hom me lenge i lačo ray.

Jeremia 34:18

Kol pralstoune pral o them Youda oun pral Yerusalem oun pral o rayeskro kheer, ninna i rashaya oun kol tsele vavar, yon his koy pashel, har o terno gouroum an douy kotya činlo vas. Oun yon djan mashkral kol douy kotya vergel, te sikrenn le, te kamenn le kova te rikrell, hoy lentsa vin krom. Oun yon rikran pen gar ap kova, oun rikran kol laba gar dren, hoy yon pen glan mande sovel dan. Doleske kamau ap lende yaake te krell, har ap ko terno gouroum kerdo vas.

Ezekiel 16:38

Oun me dau tout savi phagi, har kol djouvya lenna, kay rhorhran pengro romes oun maran i menshes. Oun me moukau miri zoreli rholi pral toute te vell.

Hosea 6:7

Yaake sik har van le an o them dren pash o foro Adam, rikran le pen bouder gar ap kova, hoy me, o baro Devel lentsa vin krom, oun moukan man.

Hosea 8:1

O baro Devel penell: Phourde zoreles an i phourdepaskri! Har i adlari venn le pral miro them. Kolla kay kote djivenn, rikran pen gar ap kova, hoy lentsa vin krom, oun hadan pen pral mire laba.

3. Mose 20:2

Pen ap i Israelitarya: Koon t'mendar yek peskre čavendar o rhorheno debleste, o Molok, das, kova hounte merell. I tsele menshe hounte vitsrenn les i barrentsa moulo. Kova hi ninna yaake, te krell sau koova i vi-themari, kay pash t'mende djivell.

3. Mose 26:15

oun krenn gar, hoy t'mendar kamau, oun djivenn gar pal miro čačepen, oun rikrenn yaake gar dren, hoy t'mentsa vin krom,

3. Mose 26:25

Me moukau kourepen an t'maro them vin te phagell, oun dau t'men pale, te rikran gar dren, hoy mantsa vin kran. Oun te khatrenn t'mer t'men palle an t'mare forya, palle bičrau i pharo nasslepen mashkral t'mende, oun dau t'men an i vasta kolendar, kay kourenn pen t'mentsa.

5. Mose 17:5

palle lenn ko morshes oder koy djouvyat, oun anenn len vin glan t'maro foro, oun vitsrenn barra ap lende bis te hi le moulo.

5. Mose 29:18

Kek te vell mank t'mende kava dives, kay shounell har kava praasepen vin rakedo vell, oun penell koy pashel an peskro dji: “Kova hi gar mange. Mange djal mishto, ninna te djau pal miro shero.” Kova vals djoungeles t'menge halauterenge, i lačenge har i čilačenge.

5. Mose 29:25

Oun yon mangan vavar deblen an, oun vitsran pen glan lende tele, save deblen, kolen yon gar prindjran oun kolendar yob lenge gar penas, te mangenn le len an.

5. Mose 31:20

Me anau len an ko them, yaake har man sovel dom glan lengre phourende, te krap kova. Kova hi i them, an koleste boud thoud oun gvin hi. Oun yon rhan oun venn čalo oun thoullo. Oun kote nashenn le vavar deblenge palla, oun mangenn kolen an. Oun ap mande dikenn le tele, oun phagenn koy sovel, hoy le mantsa dren djan.

5. Mose 4:23

Kanna denn t'men yak, te bistrenn gar, hoy t'maro baro Devel t'mentsa vin kras! Ma krenn t'menge i figura čomonestar, hoy mangenn an, har te vals i devel. T'maro baro Devel penas t'menge zoreles, te krenn kova gar.

Hebrearja 10:28

An o phouro tsiro his yaake: Ko mensho hounte meras, kay djivas gar yaake, har an o Moseskre lila činlo hi. Te dikan douy, triin menshe ko čilačo koova, hoy ko mensho kras, hounte meras yob. Oun kekes hounte khaytas yob.

Josua 7:11

O Israel anas bari doosh ap peste! Yon rikran pen gar ap mire laba, hoy lenge penom, te hounte rikrenn le. Oun yon lan kolestar, hoy mange his oun čoran les oun čivan les čorrhanes pash pengro koova pashel.

Josua 7:15

Oun ko morsh, pash koleste kova hatslo vell, hoy o baro Debleske hi, kova vell rhačedo: yob oun halauter, hoy les hi. Yob kras gar, hoy o baro Devel i Israelentsa vin kras, oun anas yaake i bari ladj ap o Israel.”

Čačepangre 2:20

Kote rhačras i rholi o baro Deblestar pral o Israel pre. Oun yob penas: “Kal čilače menshe rikran pen gar ap mire laba, hoy me lengre phourende dom, oun shounan gar ap mande.

Čačepangre 6:31

O Yoash penas ap lauterende, kay kote tardo his: “Kamenn t'men o debleske Baal te kourell? Kamenn t'mer ap leskri rig te vell? Koon pes leske kourell, kova merell gomme an kay rat. Te hi lo i devel, palle krell lo peske peskro čačepen vin. Koya his leskri rhačepaskri, hoy vas paash dino.”