5. Mose 15:6 - O Debleskro Lab 2024 (Sinte-Manouche)

⁶ Yob rikrell peskro lab, hoy lo t'mende das, oun dell t'men yaake boud, te nay patsenn t'mer love i menshenge dran vavar themma. T'mer hounte patsenn t'menge kekestar love. T'mer venn i raya pral i menshende an boud vavar themma. Pral t'mende vell kek vavar them o ray.

O Debleskro Drom 2021 (Sinte)

⁶ Job rikrell peskro lab, hoi lo tumende das, un dell tumen jaake bud, te nai patsenn tumer lowe i menshenge dran wawar themma. Tumer hunte patsenn tumenge kekestar lowe. Tumer wenn i raja pral i menshende an bud wawar themma. Pral tumende well kek wawar them o rai.

5. Mose 15:6 Iomraidhean Croise

1. Familjakro liil 17:27

Kanna čip tiri barht pral mande oun mire menshende, te ačenn le glan toute hako tsiro. Ap koneste tou tiri barht čival, ap koleste ačell tiri barht čiddo hako tsireske.”

2. Familjakro liil 9:26

Oun yob his o baro ray pral i tsele rayende pral i themma mank o baro pani Eufrat oun o them, kay i Filistarya djivan oun bis pash o them Egiptia.

Esra 4:20

Ninna his zorele bare raya an o foro Yerusalem, kay his i raya pral halauter, hoy ap i vavar rig o panyestar Eufrat djivella, yaake kay vas lenge hounte themeskre love dino, ninna foreskre love oun vavar koova.

Nehemia 9:27

Doleske dal tou len an o vast kolendar, kay lenge i pharo djipen kran. Oun har len bari daar his, dan le gole ap toute. Oun tou shounal len dran o bolepen, oun kral tiro dji lenge pre, oun bičral lenge morshen, kay len vin lan dran i čilače vasta.

Debleskri gili 112:5

Mishto djal koleske, kay krell peskro dji pre, oun patsell i vavaren vin, oun krell peskro koova yaake har čačo hi.

Debleskri gili 37:21

O čilačo patsell peske love, oun playsrell gar pale. Kova, kay an o čačepen tardo hi, krell peskro dji pre oun della.

Debleskri gili 37:26

O tselo tsiro krell yob peskro dji pre oun patsella, oun ap leskre čavende vell o Debleskri barht diklo.

Gosewe laba 22:7

O bravelo hi o ray pral o čorveleste. Oun kova, kay patsell peske love, hounte boudrell koleske, pash koleste yob siyaan hi.

Louka 6:35

Me penau t'menge: Avenn lačes kolenge, kay hi čilačo ap t'mende! Krenn kolenge lačepen! Patsenn t'mare love vin ap kolende, kay t'mer gar djinenna, te lenn t'mer lendar čomone pale! Te krenna t'mer kova lauter, palle dell o Devel t'men peskro bravlepen an o bolepen, oun t'mer venn o baro Debleskre čave. O Devel hi ninna lačes ap kol menshende, kay čilače hi, oun kay parkrenn pen gar pash leste.

5. Mose 28:44

Yon patsenn t'menge love, t'mer patsenn lenge nay kek love. Yon venn o shero, t'mer venn o pori.