5. Mose 13:6 - O Debleskro Lab 2024 (Sinte-Manouche)

⁶ Oun ko rakepaskro, ninna kova, koles kol sounya hi, yob hounte vell maredo. Yob kamas t'men t'maro baro Deblestar krik te anell, kolestar, kay anas t'men vin dran o them Egiptia oun las t'men vin dran o pandepen. Ko mensho kamas te djan t'mer tele o dromestar, hoy t'maro baro Devel penas, te hounte djan ap leste. Oun t'mer hounte vitsrenn vin o čilačepen, hoy mashkral t'mende hi.

O Debleskro Drom 2021 (Sinte)

⁶ Un ko rakepaskro, ninna kowa, koles kol sunja hi, job hunte well maredo. Job kamas tumen tumaro baro Deblestar krik te anell, kolestar, kai anas tumen win dran o them Egiptia un las tumen win dran o pandepen. Ko mensho kamas te djan tumer tele o dromestar, hoi tumaro baro Dewel penas, te hunte djan ap leste. Un tumer hunte witsrenn win o tchilatchepen, hoi mashkral tumende hi.

5. Mose 13:6 Iomraidhean Croise

1. Mose 16:5

Koy penas i Saray ap o Abram: “Kay bibarht, hoy man hi, hi tiri doosh. Me dom tout miri boudepaskretsa, te vell li tiri romni. Kanna, kay yoy hayvella, kay vell li day, hom me bouder či moldo an lakre yaka. O baro Devel mou vell miro čačepaskro ray.”

2. Samuel 1:26

Miro phraal Yonatan, miro kamlo maal, me rovau pral toute. Man his bari barht pral toute. Tiro malengro kamlepen his mange feteder har i djouvyengro kamlepen.

1. Rajengro liil 18:40

Oun o Eliya penas ap lende: “Taprenn kol rashayen o deblestar Baal! Kek te nashell peske!” Oun yon tapran len, oun o Eliya anas len tele pash o pani Kishon oun maras len kote.

2. Rajengro liil 11:18

Palle djan i tsele menshe dran o them Youda an o kheer ko deblestar Baal, oun kran kol tsele figure paash, hoy les sikran. Oun kol rhačepangre, kay firhen oun vavar koova leske rhačedo van, phagan le tele. Oun glan kol rhačepangre maran le leskro rashayes, o Mattan. Oun o rashay Yoyada bičras klisten, te denn le yak ap o baro Debleskro kheer.

2. Familjakro liil 15:13

Oun hakeno, kay kamals o baro Debles, kay o Israeleskro Devel hi, gar te rodell, hounte vals maredo, o tikno oun o baro, morsh oun djouvel.

2. Familjakro liil 23:17

Palle djan i tsele menshe dran o them Youda an o kheer ko deblestar Baal, oun kran o kheer paash. Oun kol rhačepangre, kay firhen oun vavar koova leske rhačedo van, phagan le tele, ninna kol figure, hoy an-mangedo van. Oun glan kol rhačepangre maran le o Mattan, ko rashayes o deblestar Baal.

Hiob 31:27

Miro dji rissras pes gar čorrhanes pash lende, te vitsroms me lenge i vasteskri čoum koy!

2. Mose 13:3

Oun o Mose penas ap i tsele menshende: “Kava dives an o čon Abib djan t'mer vin dran o them Egiptia. Kote, kay t'mer pandle boudepangre hans, las t'men o baro Devel peskro zorelo vasteha vin. Rikrenn kava dives an t'mare shere! Oun rhan kek shoutlo maro!

2. Mose 32:27

Oun yob penas ap lende: “O baro Devel, o Devel pral o Israel, penell t'menge: Lenn hakeno peskro rharo, oun djan pral koy tseli platsa, kate te kote! Hakeno lell peskro phrales, peskro males, oun koles, kay langs leste djivell, oun dell les moulo.”

Gosewe laba 18:24

Dell mala, kay anenn tout an i bibarht. I čačo maal rikrell boudeder ap toute har i phraal.

Gosewe laba 5:20

Miro čavo, hoske rodeh tiri barht pash i vavareskri romni? Hoske kameh i vavar romyat trouyel te taprell?

Jeremia 28:15

Oun o Yeremia penas ap o Hananya: “Shoun, Hananya! O baro Devel bičras tout gar. Tou kral, te patsenn kal menshe rhorhepen.

Jeremia 28:16

Doleske penell o baro Devel: Tiro rakepah anal i menshen o Debleskro dromestar krik. Doleske lau tout krik i phoubyatar. Kava bersh mereh tou.”

Jeremia 44:3

Oun kova krom doleske, kay yon boud čilačepen kran, oun yon man rhoyedo kran, har mangan le vavar deblen an, oun rhačran lenge soungepaskro koova. Kolla his save debla, kolen yon glan kova gar prindjran, vitar gar t'mer oun vitar gar t'mare phoure.

Zakarie 13:3

Te penell savo morsh doureder, te hi leskro rakepen o Deblestar, palle penenn leskro dad oun leskri day ap leste: “Tou hounte meress! Tou rakral rhorhepen an o lab o baro Deblestar.” Oun leskro dad oun leskri day, denn les moulo čourye, doleske, kay rakras lo rhorhepen an o baro Debleskro lab.

2. Korintarja 5:16

Doleske dikah kanna bouder gar yaake ap i mensheste har an o tsiro, har hams gomme gar patslo. Ninna prindjrah mer o Yezous Kristes kanna vavarčandes har an ko tsiro, har djivas lo ap i phoub.

Galatarja 2:4

His vavar morsha koy. Yon kran, har te vans le patsle. Yon kaman te dikell, har kol patsle djivenna, kay bouder gar ap o Moseskre laba pandlo hi. Mer, kay ham bouder gar pandlo ap kol laba, djivah kanna pal o Yezouseskre laba. Oun kol morsha, kay djivenn gar pal o Yezouseskre laba, kaman, te vas mer pale pandlo ap o Moseskre laba.

Efesarja 4:14

Palle ham bouder gar har tikne čave, kay lauter patsenna, kava dives yaake oun ko vavar dives vavarčandes. Oun mer shounah bouder gar ap kolende, kay rhorhenna, oun kamenn men o čačo dromestar tele te anell.

5. Mose 11:32

Yaake denn yak ap halauter, hoy o baro Devel t'mendar kamell, oun ap leskre tsele čačepaskre laba, hoy me t'menge kava dives penau. Oun djivenn koy pal!

5. Mose 13:2

Te stell mashkral t'mende i rakepaskro pre, kay penell, te hi les i lab o Deblestar, oder i vavar, koles sounya hi, oun yob penell i debleskro sikepen oder i baro koova glan-vi,

5. Mose 13:7

Nay vell, te rakrell yek čorrhanes ap toute: Mer djas oun mangas vavar deblen an, kolen gar prindjreh, vitar gar tire phoure prindjran! Kova nay hi tiro phraal, tiro čavo oder tiri čay, tiri romni oder tiro maal, koles o djiyestar kameh.

5. Mose 17:12

Te hi yek koy, kay hi yaake pre-phourdo, te shounell lo gar ap o rashayeste, kay krell i boudi o baro Debleske, oder ap o čačepaskro morsheste, palle hounte vell ko morsh maredo. T'mer hounte lenn o čilačepen dran Israel vin.

5. Mose 18:20

Te phourdell pes i Debleskro rakepaskro pre, oun penell i rakepen an miro lab, hoy me leske gar penom, te hounte rakrell lo, savo rakepaskro hounte merell. Ninna te rakrell yob an o lab i vavar deblestar, hounte merell lo.

5. Mose 19:19

palle krenn leha kova, hoy kamas yob peskro phraleha te krell. Yaake lenn t'mer o čilačepen mashkral t'mende krik.

5. Mose 21:21

Oun i tsele morsha dran ko foro hounte vitsrenn barra ap leste, bis te hi lo moulo. Yaake vitsrenn t'mer o čilačepen dran t'mende vin. Oun i tsele Israelitarya hounte shounenn kolestar oun darenn.

5. Mose 22:21

palle hounte vell li vin anlo glan o kheer lakro dadestar. Oun i morsha dran ko foro vitsrenn barra ap late, bis te mouli hi li. Yoy kras i vi-ladjedo koova mank i Israelitarya, har loubras li trouyel an peskro dadeskro kheer. Yaake čivenn t'mer o čilačepen mank t'mende vin.

5. Mose 24:7

Te vell i morsh tapedo, kay i vavar Israelitares čoras oun leha krell, har te vals lo i ginlo boudepaskro, oder yob bikras les, palle hounte vell ko čorepaskro moulo dino. T'mer hounte čivenn o čilačepen mashkral t'mende vin.

5. Mose 28:54

I morsh t'mendar, koles hako tsireske doha ap halauter his, oun rayles djivas, ninna kova rhal peskre čaven, oun dikell pherdo zilvepen ap peskro phraleste oun ap peskri romyate oun ap peskro vavar čaveste, hoy leske gomme ačas, te lenn yon či ko massestar. Či vavar har kava mass ačas leske leskro tselo bravlepastar. Yaake baro hi koy daar oun koy bok an t'mare tsele forya, kay han dren pandlo kolendar, kay kourenn pen t'mentsa.

5. Mose 29:18

Kek te vell mank t'mende kava dives, kay shounell har kava praasepen vin rakedo vell, oun penell koy pashel an peskro dji: “Kova hi gar mange. Mange djal mishto, ninna te djau pal miro shero.” Kova vals djoungeles t'menge halauterenge, i lačenge har i čilačenge.

5. Mose 8:14

palle denn yak, te venn gar pre-phourdo, oun bistrenn t'maro baro Debles, koles, kay anas t'men vin dran o them Egiptia, kay t'mer pandle boudepangre hans.

Kolossarja 2:4

Kova penau t'menge, te anell t'men kek rhorhene labentsa kava dromestar tele.

Josua 7:13

Ste pre, oun kre, te venn i menshe pale erligo glan mande! Pen lenge: Krenn t'men djoudjo, te nay venn glan o Debleste taysarlake! Me, o baro Devel, hom o Israeleskro Devel oun penau t'menge: Mank t'mende, t'mer Israelitarya, hi čomone, hoy miro hi. Doleske nay venn t'mer bouder gar zorelo pral kolende, kay kourenn pen t'mentsa, yaake rah, har anan t'mer ko koova gar dran t'mende krik.

2. Petro 2:1

Glan i rah tsiro his rhorhene rakepangre an o them Israel, kay kran, har te bičras len o Devel. Yaake venna ninna mashkral t'mende rhorhene sikepangre, kay sikrenn t'men i rhorheno drom, kay anell t'men krik o Deblestar. Kol sikepangre denn o Yezouses, maro rayes, bourhoste, kay playsras peskro rateha lenge, te lell lo len dran o čilačepen vin. Yon nashenn an pengri bibarht.

Debleskro tsiro 12:9

Oun o baro lolo sap vas vin vitsedo. Yob hi ko phouro sap, hoy kharella ninna Beng oun Satan, ko rhorheno, kay tserdell i menshen ap i tseli phoub ap peskro drom. Yob vas tele vitsedo ap i phoub, oun leskre kourepangre leha.

Čačepangre 10:6

Oun i Israelitarya kran pale kova, hoy čilačes his glan o baro Debleskre yaka. Oun yon mangan i vavar deblen an: ko debles, kay kharell Baal, oun i debletsa, kay kharell Astarte, oun kol deblen, kay mangenn kol menshe an, kay djivenn an Syria, an Sidon, an Moab, an Ammon oun an Filistia. Oun i Israelitarya moukan o baro Debles oun mangan les bouder gar an.

Čačepangre 2:13

Oun yon moukan o baro Debles oun mangan o debles Baal an oun ninna i debletsa Astarte.

Čačepangre 20:13

Kanna denn kol morshen vin, kol či-molden dran o foro Gibea, te nay das len moulo, yaake te nay vitsras o čilačepen dran o Israel vin.” I Benyaminarya kaman gar ap pengre phralende, kol vavar Israelitaryen, te shounell,

Čačepangre 5:8

Mire menshe rodan penge vavar debla! Kote vas o kourepen glan lengre voudya. Oun pash 40.000 (star-deesh-zerya) morsha an Israel vas kek rharo hatslo, vitar kek shilto.

1. Samuel 18:1

Oun pal kol laba, hoy o David o Sauleha rakras, las o Yonatan i kamlepen o Davideske an o dji, oun yob kamas les peskro tselo djiyeha har peskro djipen.

1. Samuel 18:3

Oun o Yonatan oun o David dan pen sovel, te hi le mala. O Yonatan kamas les boudeder har peskro djipen,

1. Samuel 20:17

Oun o Yonatan mangas o Davides: “De tout kate sovel, te ačess miro maal.” O Yonatan kamas o Davides har peskro djipen.