4. Mose 18:7 - O Debleskro Lab 2024 (Sinte-Manouche)

⁷ Tou oun tire čave, t'mer han mire rashaya, te krenn t'mari boudi pash o Debleskri rhačepaskri oun dren an o kouč isema, hoy pal o voudar dran o kouč kotar than hi. Kay boudi dom me t'men. Te vell yek vavar pash o Debleskro koova, hoy koy dren hi, hounte merell lo.

O Debleskro Drom 2021 (Sinte)

⁷ Tu un tire tchawe, tumer han mire rashaja, te krenn tumari budi pash o Debleskri chatchepaskri un dren an o kutch isema, hoi pal o wudar dran o kutch kotar than hi. Kai budi dom me tumen. Te well jek wawar pash o Debleskro koowa, hoi koi dren hi, hunte merell lo.

4. Mose 18:7 Iomraidhean Croise

Debleskri gili 115:10

T'mer rashaya dran o kheer Aron, rikrenn t'men ap o baro Debleste! Yob vell ap t'mari rig, oun rikrell peskre vasta pral t'mende.

2. Mose 28:1

Mouk tiro phrales, o Arones, oun leskre morsh čaven glan toute te anell. Kolen rodom vin dran i vavar Israelitarya, te venn le mange rashaya: o Nadab, o Abihu, o Elazar oun o Itamar.

2. Mose 29:9

Palle čip lenge o pereskro pandepen trouyel oun čip i rashayengre stadja ap lengre shere, te venn le mange rashaya hako tsireske. Oun yaake aneh tou len an lengri boudi:

Ezekiel 44:15

Kol rashaya dran o kheer Levi, kolengro phouro dad o Zadok his, yon ačenn mire rashaya, oun nay boudrenn mange. Har i Israelitarya mandar tele peran, kran yon pengri boudi mishto an miro kheer. Doleske nay ačenn le mire rashaya oun nay anenn o thulepen oun o rat kol marede firhendar glan mande. Kava penell o baro Devel, maro ray.

Ezekiel 44:16

Yon nay venn an miro kheer dren, oun yon venn pash miri rhapaskri, te venn le mange koy oun boudrenn mange an miro kheer.

Ezekiel 44:8

T'mer kokres kran gar koy boudi an miro kheer. Na-a, t'mer lan vavar morshen, te krenn le t'menge koy boudi an miro kheer.

3. Mose 16:2

Pen tiro phraleske, o Aroneske, te djal lo gar hako tsireske an o kouč isema an o Debleskro kheer, te merell lo gar. An koy isema, hoy pal ko kotar than hi, sikrau me man an i folka pral ko sonakaskro pralstouno kotar, hoy ap o morhton čiddo hi, kay mire deesh laba dren hi.

4. Mose 1:51

Oun te djan t'mer doureder, čivenn kol Levitarya o Debleskro plarhteno kheer khetne. Oun te čivenn t'mer t'mare plarhtene khera pre, palle čivenn i Levitarya o Debleskro kheer pale pre. Hako vavar, kay vell pash o kheer, hounte merella.

4. Mose 18:20

Oun o baro Devel penas ap o Aroneste: Ap ko tsiro, kay venn i Israelitarya an lengro them, leh tou kek kotar phoub, hoy djal o dadestar ap o čaveste doureder, yaake har kova i vavar Israelitarya lenna. Me hom tiro, oun hom tiro bravlepen.

4. Mose 18:3

Oun kol vavar Levitarya hounte boudrenn touke, oun krenn koy boudi ap o tselo Debleskro kheer. O Debleskri rhačepaskri oun ko tselo Debleskro koova, koleha boudreh tou an o Debleskro kheer, kova taprenn le gar an, te merenn yon gar, oun t'mer lentsa.

4. Mose 3:10

Ap o Aroneste oun ap leskre čavende hounte peness tou, te denn yon yak, te krell kek vavar lengre rashayeskri boudi. Te vell i vavar, te krell lo kay boudi, hounte merell yob.”

4. Mose 3:38

Glan o Debleskro kheer, ap koy rig, kay o kham pre djala, hounte vell koy platsa o Moseske oun o Aroneske peskre čaventsa, te denn yon garda, te vell o Debleskri boudi mishto kerdo i tsele Israelenge. Oun te vell i vavar pash o Debleskro kheer, te krell lo kay boudi, hounte merell lo.

Mateo 10:8

Krenn i nasselen sasto, oun krenn i moulen djido! Oun kolla, kay i djoungelo nasslepen ap o mass hi, kolen krenn ninna sasto! Tradenn i bengen dran i menshende vin! Kay zoor dom t'men čičeske. Doleske krenn kova ninna čičeske, oun lenn kek love lendar!

Johanni 3:27

Koy penas o Yohanni ap lende: “Kek nay lell čomone, te das les o Devel kova gar.

Efesarja 3:8

Ninna te hom me o tikneder kol tsele patslendar, das lo man koy shoukar boudi, te djap pash kolende, kay hi kek bibolde, te penap lenge, havo baro bravlepen o Yezous Kristes lenge hi,

5. Mose 18:2

Kek them lenn i Levitarya an Israel har lengre phrala lenna. Kova hoy yon lenna, hi lengri boudi o baro Debleske. Yob kokres dikell ap lende, te hi len lauter, hoy len hounte vell. Yaake penas lo lenge.

Hebrearja 5:4

Kek morsh nay penella: Me vau baro rashay. Na-a, o Devel rodell les vin, yaake har yob glan i rah tsiro ninna o Arones vin rodas, te vell lo i baro rashay.

Josua 18:7

I Levitarya lenn kek kotar them mashkral t'mende. Lengro kotar hi, te nay venn le rashaya o baro Debleske. Oun i familye Gad oun Ruben oun i paash familya Manasse lan pengro kotar them ap i vavar rig o panyestar Yordan, ap koy rig, kay o kham pre djala. Kova das len o Mose, koles o baro Debleskro vast his.”

1. Petro 5:2

Denn garda ap i patslende, kay o Devel peske khetne anas! T'mer han har i bakrengre. Oun o Debleskre čave hi har bakre, hoy o Devel an t'mare vasta das. Denn len kova, hoy len hounte vella, te ačell lengro patsepen djido! Krenn kova o tselo djiyestar! Yaake kamell les o Devel. Krenn kova gar, har te vals i phari boudi, hoy hounte krenn! Krenn koy boudi dran o kamlepen oun gar, te venn t'mer playsedo!

1. Petro 5:3

Ma avenn raya pral i patslende! Sikrenn lende, har t'mer djivenna, te djivenn yon ninna yaake!

1. Samuel 2:28

Dran i tsele familye, kay venna kol deesh-te-douy Israeleskre čavendar, rodom me o kheer Aron vin, te venn kol morsha rashaya mange, te rhačrenn le mange firhen ap miri rhačepaskri, ninna te rhačenn le mange soungepaskro koova. Me dom len i rashayengre damdira, te rivenn le len, te venn le glan mande. Ninna dom len o čačepen, te rhan le ko massestar, hoy mange rhačedo vella.