4. Mose 15:3 - O Debleskro Lab 2024 (Sinte-Manouche)

^3-4 oun t'mer anenn i firhes t'mare groumyendar oun bakrendar rhačepaske o baro Debleske, hounte denn t'mer i rhapen koy pashel. Krenn kova pash hako firho, hoy mange anenn: pash ko firho, hoy vell tseles rhačedo mange; pash ko firho, hoy rhan t'mer khetne glan mande; pash ko firho, koleha i mensho sikrell, te das lo pes sovel, te dell lo man čomone; pash ko firho, hoy kamell i mensho pestar mande te dell; pash ko firho, hoy rhačrenn t'mer mange ap t'mare bare divessa. O lačo soungepen kol firhendar hi mishto mange. Ko rhapen, hoy anenn pashel, hounte vell yek kilogrammi lačo yarro, oun yek litari djet. Kova vell halauter khetne kerdo.

O Debleskro Drom 2021 (Sinte)

^3-4 un tumer anenn i vieches tumare grumjendar un bakrendar chatchepaske o baro Debleske, hunte denn tumer i chapen koi pashel. Krenn kowa pash hako viecho, hoi mange anenn: pash ko viecho, hoi well tseles chatchedo mange; pash ko viecho, hoi chan tumer khetne glan mande; pash ko viecho, koleha i mensho sikrell, te das lo pes sowel, te dell lo man tchomone; pash ko viecho, hoi kamell i mensho pestar mande te dell; pash ko viecho, hoi chatchrenn tumer mange ap tumare bare diwessa. O latcho sungepen kol viechendar hi mishto mange. Ko chapen, hoi anenn pashel, hunte well jek kilogrammi latcho jarro, un jek litari djet. Kowa well halauter khetne kerdo.

4. Mose 15:3 Iomraidhean Croise

1. Mose 8:21

Oun o baro Devel soungas ko lačo soungepen oun penas ap peste: “Me dau man sovel, te anau bouder gar havi bari bibarht pral i phoub doleske, hoy i menshe krenna. Djinau, o mensheskro dji hi čilačo foun tiknes pre. Me kamau bouder gar o tselo djipen ap i phoub te marell, yaake har krom.

Esra 7:17

Halauter kova le oun gin gosvepah kol loventsa gourma, bakre, terne bakre; koy pashel djob oun mool o Debleske; te nay vell kova lauter rhačedo ap i rhačepaskri an o kheer t'maro Deblestar an Yerusalem.

Debleskri gili 54:6

Tou, miro Devel, veh ap miri rig. Tou, miro ray, hal kova, kay man rikrella.

2. Mose 29:18

Oun rhače o tselo bakro ap i rhačepaskri, yaake te djal lauter pre an i yagakro dourho. Ko bakro hi mange, o baro Debleske, oun vell tseles rhačedo. Oun o lačo soungepen, hoy vell vin, soungell mange mishto.

2. Mose 29:25

Palle le les dran lengre vasta oun rhače les pre ap o Debleskri rhačepaskri pral ko vavar bakro, hoy tou tseles rhačral, yaake te djal kava lauter ninna pre an i yagakro dourho. Oun o lačo soungepen, hoy vell vin, soungell mange, o baro Debleske, mishto.

2. Mose 29:41

Kova kre taysarlakro oun rati ninna! Yaake aneh tou rhapen oun pipen o Debleske. Oun o lačo soungepen, hoy vell vin, te vell kova lauter rhačedo an i yag, soungella mishto o baro Debleske.

3. Mose 10:13

Kava rhapen hi tiro oun tire čavengro kotar kolestar, hoy o baro Debleste rhačedo vell. Doleske rhan les ap i Debleskri platsa. Yaake penas kova mange o baro Devel.

3. Mose 27:2

Pen ap i Israelitarya: Te das yek pes sovel, te dell lo man, o baro Debleste, i menshes, palle nay ginell lo koles pale vin.

3. Mose 7:16

Te das yek pes sovel te dell lo čomone o Debleste, oun anell doleske sau firho o Debleske, vell ko mass ko emligo dives rhalo. Te ačell čomone pral, nay rhan le les o vavar dives ninna. Yaake hounte vell ninna kerdo, te das yek i firho pestar o baro Debleste.

4. Mose 28:27

Oun hounte rhačrenn o baro Debleske douy terne morsh groumya, yek morsh bakro, oun efta yek-bershengre bakre, kay gar nasselo hi. Oun o lačo soungepen, hoy djal pre, te vell kova halauter rhačedo an i yag, soungella mishto o baro Debleske.

4. Mose 29:8

Ap ko dives rhačrenn o Debleske firhen. Oun o lačo soungepen, hoy djal pre, te venn le tseles rhačedo an i yag, soungella mishto o baro Debleske. Kalla hi kol firhe, hoy hounte rhačrenn: yek terni morsh groumni, yek morsh bakro, efta yek-bershengre bakre, kay gar nasselo hi.

4. Mose 6:15

Ninna anell lo i kashteni piri, kay merklia oun mare dren hi, kay kek shoutlo yarro dren hi: merklia dran lačo yarro oun djet, oun sane mare, kay djet pre maklo hi, ninna ko tselo rhapen dran yarro oun koy mool, hoy koy pashel hi, te vell lo dino o Debleske.

Mateo 3:17

Oun i rakepen dran o bolepen penas: “Kava hi miro čavo, koles me kamau. Pral leste hom me barhtelo.”

2. Korintarja 2:15

Te rakrah o lačo lab o Yezous Kristestar, hi o Devel barhtelo pral kova. Kova hi leske har i shoukar soungepen, hoy djal pash kolende, kay lenn o Debleskro djipen oun ninna pash kolende, kay djan nashedo.

2. Korintarja 2:16

Kolenge, kay djan nashedo, hi kova har i djoungeli khand, hoy anell len an o merepen. Kolenge, kay lenn o Debleskro djipen, hi kova i lačo soungepen, hoy anell len an o djipen. Kaya hi i bari boudi. Koon nay krell kova lauter mishto? Kek.

Efesarja 5:2

oun djivenn an o kamlepen, yaake har o Yezous Kristo peskro kamlepen mende sikras, har yob menge meras. Oun yaake das lo peskro djipen o Debleske. Oun o Devel dikas lačes ap leste.

5. Mose 12:11

Palle hi vavarčandes har kanna: Palle anenn kova, hoy denn o baro Debleste, ap koy platsa, hoy yob peske vin rodas, te vell lo kote an-mangedo. Kote anenn lauter, hoy me t'menge penau: kol firhen, hoy kamenn leske te marell, save, hoy venn leske tseles rhačedo oun save, hoy rhan khetne. Kote anenn ninna o deshto kotar kolestar, hoy dren anan, oun ko vavar koova, hoy glan činlo hi, oun kova hoy denna yaake har t'men sovel dan.

5. Mose 12:17

Kolestar, hoy o baro Debleske hi, ma rhan: ko deshto t'maro djobestar, molyatar oun djetestar, vitar gar kol groumya oun bakre, hoy i phoureder lengre dayendar hi, vitar gar kova koleske t'men sovel dan, oun kova hoy kamenn t'mendar kokres te dell, oun ko vavar koova, hoy glan činlo hi.

5. Mose 12:6

Oun kote anenn kol firhen, hoy kamenn leske te marell, save, hoy venn leske tseles rhačedo, oun save, kolengro rat leske rhačedo vell. Kote anenn ninna o deshto kotar kolestar, hoy t'menge dren anan, oun ko vavar koova, hoy glan činlo hi, oun kova hoy denna yaake, har t'men sovel dan, ninna kova, hoy hakeno pestar della, oun save bakre oun gourma, kay i phoureder lengre dayendar hi.

Filiparja 4:18

Kanna hi man lauter, hoy man hounte vell djipaske, oun boudeder har doha. O Epafrodito anas mange kova lauter, hoy t'mer mange bičran. Kova hi yaake, har te anans t'mer o Debleske lačo koova, hoy soungell mishto, oun kay dikell lo lačes pre oun hi barhtelo pral kova.