3. Mose 6:8 - O Debleskro Lab 2024 (Sinte-Manouche)

⁸ Yek lendar lell kolestar i vast pherdo yarro, kay djet dren hi, ninna ko tselo soungepaskro koova, hoy pral o yarro čiddo hi, oun moukell kova ap o Debleskri rhačepaskri pre te rhačrell. Yaake sikrell lo, te hi ko tselo rhapen o baro Debleske. Oun ko lačo soungepen, hoy vell vin, soungell mishto o baro Debleske.

O Debleskro Drom 2021 (Sinte)

⁸ Jek lendar lell kolestar i wast pherdo jarro, kai djet dren hi, ninna ko tselo sungepaskro koowa, hoi pral o jarro tchiddo hi, un mukell kowa ap o Debleskri chatchepaskri pre te chatchrell. Jaake sikrell lo, te hi ko tselo chapen o baro Debleske. Un ko latcho sungepen, hoi well win, sungell mishto o baro Debleske.

3. Mose 6:8 Iomraidhean Croise

3. Mose 1:3

Te kamell lo leske i groumni te anell, te vell li leske tseles rhačedo, palle hounte lell lo i morshkani groumni, hoy gar nasselo hi. Oun yob anell lat glan o voudar o Debleskro plarhteno kherestar, te dikell o baro Devel lačes ap leste.

3. Mose 1:7

Oun i rashaya dran o kheer Aron krenn i yag ap i rhačepaskri oun čivenn kasht ap koy yag,

3. Mose 6:7

Oun yaake hounte vell kerdo o yarreha, hoy o baro Debleske dino vell. I rashaya dran o kheer Aron anenn les glan o baro Debleste pash koy rhačepaskri.

3. Mose 6:9

Ko yarro oun ko djet, hoy pral ačell, kova hi o Aroneske oun leskre morsh čavenge. Te krenn le pengro maro kolestar, hounte čivenn le kek shoutlo yarro dren. Ap koy platsa glan o Debleskro plarhteno kheer hounte rhan le les. Kaya hi i Debleskri platsa. Kava rhapen dell o baro Devel lenge kolestar, hoy i menshe leske anan. Kova hi i Debleskro rhapen. Doleske nay rhan les kokres i rashaya, yaake har ninna ko mass kol firhendar, hoy venn maredo, te vell i doosh oun o pale-čiddo koova krik lino, oun o mass kol firhendar, hoy venn maredo, te vell i doosh pale mishto.