3. Mose 2:2 - O Debleskro Lab 2024 (Sinte-Manouche)

² Oun yob anell kova pash i rashayende dran o kheer Aron. Yek lendar lell i vast pherdo yarro o djeteha oun ko tselo soungepaskro koova, oun moukell kova ap i rhačepaskri te rhačrell. Kova sikrell, kay ko tselo rhapen, hoy anlo vas, o Debleske hi. Oun o lačo soungepen, hoy vell vin, soungell mishto o baro Debleske.

O Debleskro Drom 2021 (Sinte)

² Un job anell kowa pash i rashajende dran o kheer Aron. Jek lendar lell i wast pherdo jarro o djeteha un ko tselo sungepaskro koowa, un mukell kowa ap i chatchepaskri te chatchrell. Kowa sikrell, kai ko tselo chapen, hoi anlo was, o Debleske hi. Un o latcho sungepen, hoi well win, sungell mishto o baro Debleske.

3. Mose 2:2 Iomraidhean Croise

Nehemia 13:14

Dik, hoy kay krom, miro Devel! Ma biste ko lačepen, hoy krom ap tiro kheer, te vell koy boudi an leste mishto kerdo.

Nehemia 13:22

Oun me penom ap i Levitarya, te krenn le pen djoudjo o Debleske. Palle te venn le pash o foreskre voudya oun denn koy yak, te vell o Debleskro dives dren rikedo. Ninna kava biste mange gar, miro Devel. Oun dik lačes ap mande an tiro baro kamlepen.

2. Mose 30:16

Oun tou less kol love, hoy i Israelitarya tout denna, oun dess len kolende, kay ap o Debleskro plarhteno kheer boudrenna. Yaake bistrau i Israelitarya gar oun dikau lačes ap lende, te ačenn le djido.

Jesaja 66:3

Kova, kay mange i gouroum marell, marell ninna i menshes i rhorheno debleske. Kova, kay mange i terno bakro temerl dell, marell ninna i djoukles i rhorheno debleske. Kova, kay mange rhapen glan anell, anell ninna balengro rat i rhorheno debleske. Kova, kay mange soungepaskro koova rhačrell, parkrell pes ninna pash i rhorheno debleste. Yon djan pengre dromma yaake har yon les kamenna. Oun shoukar hi an lengre yaka, hoy an mire yaka djoungeles hi.

3. Mose 1:17

Palle taprell o rashay o čirkleskre moussya oun tserdell o čirkles pre, oun rhačrell les ap i kasht pral i yag, hoy ap i rhačepaskri hi. Yaake hounte vell i čirklo anlo glan o Debleste, hoy vell leske tseles rhačedo. Oun o lačo soungepen, hoy vell vin, soungell mishto o baro Debleske.

3. Mose 1:9

I bouke oun i herya hounte van thodo. Kova krell ko morsh, kay anas ko firhes. Oun o rashay moukell halauter ap i rhačepaskri pre te rhačrell. Yaake hounte vell i firho anlo glan o Debleste, hoy vell leske tseles rhačedo. Oun o lačo soungepen, hoy vell vin, soungell mishto o baro Debleske.

3. Mose 2:16

O rashay lell i kotar kol djobendar oun djetestar tele, oun rhačrell kova khetne ko tselo soungepaskro koova. Kova hi i sikepen, kay ko tselo djob, hoy anlo vas, o baro Debleske hi.

3. Mose 2:9

Oun o rashay lell čomone lestar oun rhačrell les ap i rhačepaskri. Kova sikrell, kay ko tselo rhapen, hoy anlo vas, o Debleske hi. Oun o lačo soungepen, hoy vell vin, soungell mishto o baro Debleske.

3. Mose 24:7

Čip lačo soungepaskro koova ap kal mare. Ko soungepaskro koova vell rhačedo o baro Debleske, oun yaake vell siklo, te hi kal mare o baro Debleske.

3. Mose 4:31

Oun o tselo thulepen činell lo tele, yaake har činell lo o thulepen tele ko firhestar, hoy yek o Debleske anell, te rhan le les khetne glan leste. Oun ko rashay rhačrell kal thoulle kotya ap o Debleskri rhačepaskri, te vell i lačo soungepen vin, hoy baro Debleske mishto soungella. Yaake krell o rashay, te vell lauter pale mishto mank ko mensheste oun o baro Debleste. Oun o baro Devel bistrell leskri doosh.

3. Mose 5:11

Te hi kova, kay doosh ap peste anas, yaake čorvelo, te nay anell lo gar douy taube, palle anell lo yek kilogrammi lačo yarro o baro Debleske, te vell leskri doosh krik lino. Yob hounte čivell kek djet pre, vitar kek soungepaskro koova. Kava hi i rhapen, hoy o Debleske anlo vell, te vell i doosh krik lino.

3. Mose 5:12

Yob anell ko yarro pash o rashayeste, oun o rashay lell i vast pherdo, oun moukell kava ap i rhačepaskri te rhačrell o baro Debleske. Kava sikrell, kay ko tselo rhapen, hoy anlo vas, o baro Debleske hi. Kava hi i rhapen, hoy o baro Debleske anlo vell, te vell i doosh krik lino.

3. Mose 6:15

Oun ko rashay dran o kheer Aron, kay pal Aroneskro merepen o pralstouno rashay vell, kava krell kova, oun rhačrell ko tselo rhapen ap i rhačepaskri. Yaake hounte vell kava kerdo o baro Debleske hako tsireske.

4. Mose 5:18

Oun yob hounte anell koy djouvyat glan o baro Debleste, oun krell lakre balla pre, oun čivell ko yarro an lakro vast, te vell diklo, rhorhras li peskro romes, rhorhras li les gar. Oun an peskro vast lell ko rashay ko djoungelo nasselo pani.

4. Mose 5:26

Oun yob rhačrell yek vast pherdo yarro ap o Debleskri rhačepaskri, te sikrell lo, te hi o tselo yarro o baro Debleske. Oun pal kova dell lo koya djouvyat ko pani pipaske.

Bičepangre 10:4

Koles his daar, har yob dikas les, oun penas ap leste: “Hoy kameh tou mandar, ray?” Oun kova penas ap leste: “O Devel shounas, har tou les an-mangal. Oun yob dikas ko lačepen, hoy tou kral i čorvelenge. Oun yob bistras kova gar.