3. Mose 16:15 - O Debleskro Lab 2024 (Sinte-Manouche)

¹⁵ Palle marell yob koy morsh bouzni, te vell i doosh oun o pale-čiddo koova i menshendar Israel krik lino. Oun yob djal ko rateha pal i voudar dran than an i kouč isema, oun krell ko rateha yaake, har lo les ko rateha ko gouroumestar kras. Yob vitsrell peskro goushteha čomone ap o pralstouno kotar, hoy ap o morhton čiddo hi, oun ap koy platsa glan o morhton.

O Debleskro Drom 2021 (Sinte)

¹⁵ Palle marell job koi mursh busni, te well i doosh un o pale-tchiddo koowa i menshendar Israel krik lino. Un job djal ko rateha pal i wudar dran than an i kutch isema, un krell ko rateha jaake, har lo les ko rateha ko gurumestar kras. Job witsrell peskro gushteha tchomone ap o pralstuno kotar, hoi ap o mochton tchiddo hi, un ap koi platsa glan o mochton.

3. Mose 16:15 Iomraidhean Croise

3. Mose 16:2

Pen tiro phraleske, o Aroneske, te djal lo gar hako tsireske an o kouč isema an o Debleskro kheer, te merell lo gar. An koy isema, hoy pal ko kotar than hi, sikrau me man an i folka pral ko sonakaskro pralstouno kotar, hoy ap o morhton čiddo hi, kay mire deesh laba dren hi.

3. Mose 4:21

Kova, hoy kava gouroumestar pral ačas, anell yob vin, krik dran koy platsa, kay i menshe hi, oun rhačrell les yaake har yob kova rhačras, hoy ko gouroumestar pral ačas, hoy yob peskri doshake maras. Yaake hounte vell i gouroumeha kerdo, hoy maredo vell, te vell i doosh i tsele Israelendar krik lino.

3. Mose 4:5

Oun o pralstouno rashay lell o ratestar oun hidjrell les an o plarhteno kheer.

4. Mose 17:11

Oun o Mose penas ap o Aroneste: “Le koy piri, dja pash o Debleskri rhačepaskri oun čip yag lestar an koy piri, oun čip soungepaskro koova koy pre, oun dja sik pash i tsele menshende, oun rhače ko soungepaskro koova, te vell lengri doosh krik lino! O baro Debleskri rholi vas ap lende, oun lengri phagi hi kay.”

4. Mose 28:15

Koy pashel hounte anenn i morsh bouzni o baro Debleske, te vell t'mari doosh krik lino. Kova halauter vell pash kol firhe oun ko yarro oun koy mool, hoy vell hako dives o Debleske anlo.

Hebrearja 2:17

Doleske hounte vas o Yezous an lauter yaake, har leskre phrala, te vell les i baro dji lenge, oun te vell lo lenge i čačo baro rashay glan o Debleste, te mangell lo leskre menshenge, te lell yob i doosh lendar krik.

Hebrearja 5:3

Doleske hounte marell lo ninna peske i firhes, oun anell les glan o Debleste, te vell leskri doosh krik lino, yaake har yob i vavar menshenge firhen marella, oun glan o Debleste anella.

Hebrearja 6:19

Kava patsepen rikrell maro djipen, yaake har rikrell i zorelo saster i shiffo, te djal lo gar ap o pani nashedo. Oun kova, ap koleste patsah oun dikah, kova hi o Yezous. Yob djas glan mende pash o Debleste an o bolepen, yaake har djas o baro rashay an o phouro tsiro an o Debleskro kheer. Oun yaake vas o Yezous hako tsireske savo baro rashay, har glan i rah tsiro o Melkisedek his.

Hebrearja 7:27

Yob hi gar har kol vavar bare rashaya, oun hounte anell gar hako dives i maredo firhes o Debleske, te vell peskri doosh krik lino. Ninna hounte anell lo gar i vavar menshenge marede firhen o Debleske, te vell lengri doosh krik lino. Na-a, yob kokres das peskro djipen an o merepen yek kopo hako tsireske.

Hebrearja 9:12

Har o Yezous an o Debleskro kheer an o bolepen djas, anas lo gar i bakrengro rat peha, vitar gar i groumyengro rat. Na-a. Peskro rat anas lo glan o Debleste. Kova kras lo yek kopo oun gar boud kope. Oun yaake las lo mari doosh hako tsireske mendar.

Hebrearja 9:13

An o phouro tsiro čoras o rashay o bakrengro rat, oun o groumyengro rat, oun o yagakri čik i rhačedi groumyatar ap kolende, kay hi pale-čiddo glan o Debleste, te venn le pale erligo kerdo. Te hi o firheskro rat yaake zorelo,

Hebrearja 9:7

Yek kopo an o bersh djas o baro rashay kokres an i palstouni kouč isema. Har djal lo dren, lell lo o rat peha i firhestar, hoy maras lo o Debleske, te lell o Devel leskri doosh lestar, ninna i doosh kol menshendar, kay anan doosh ap pende, ninna te djinan le gar, kay kova, hoy yon kran, i čilačo koova his.