2. Samuel 23:5 - O Debleskro Lab 2024 (Sinte-Manouche)

⁵ O Devel das man peskro lab hako tsireske, oun hoy lo penas hi mishto oun ačell tardo. Yaake hi miro kheer zoreles glan leste tardo. Lauter, hoy mange mishto hi oun hoy kamau o djiyestar, moukell lo mishto te djal.

O Debleskro Drom 2021 (Sinte)

⁵ O Dewel das man peskro lab hako tsireske, un hoi lo penas hi mishto un atchell tardo. Jaake hi miro kheer soreles glan leste tardo. Lauter, hoi mange mishto hi un hoi kamau o djijestar, mukell lo mishto te djal.

2. Samuel 23:5 Iomraidhean Croise

1. Mose 9:16

Te hi miro brishineskro bogo an o bolepen tardo, dikau les, oun ko lab, hoy dom, vell an miro shero. Ko lab ačell tardo hako tsiro mange oun hakeneske, kay djivella ap i phoub.”

2. Samuel 12:10

An tire yaka his miro lab či moldo, har lal tou touke koy romyat foun o Uriya, te vell li tiri romni. Kanna vell o rharo ap tiro kheer gar bouder krik lino.

2. Samuel 13:14

O Amnon shounas gar ap late, tapras lat, peras pral late, oun sovas lah.

2. Samuel 13:28

O Absalom penas ap peskre lourde: “Denn yak! Te piyas pes o Amnon mato, oun te penau me ap t'mende: Denn o Amnones khetne! palle denn les moulo! Ma trashenn! Me penom t'menge, te krenn kova. Avenn čače morsha oun krenn kova kek trashah!”

2. Samuel 18:14

“Kamau gar te nashrap miro tsiro touha!” das o Yoab gole, oun las triin lengste sane čourya an peskro vast, oun das len o Absalomeske an o dji, har yob gomme djido ap o rouk bladedo his.

2. Samuel 7:12

Te hi tiro tsiro trouyel, oun tou mereh, hadau yekes tire čavendar, kay pal toute venna, te vell lo baro ray, oun ačell kova.

2. Samuel 7:18

djas o baro ray David an o Debleskro plarhteno kheer, čivas pes tele glan o baro Debleste oun penas: “Baro Devel, miro ray, koon hom me, oun hoy hi miro kheer, kay tou kral yaake boud mange?

1. Rajengro liil 1:5

Oun o Adoniya, koleskri day o Davideskri romni, i Haggit his, kova kras pes baro oun penas: “Me, me kamau baro ray te vell!” Oun yob las peske vourdya oun graya, oun i paash-sheel morsha, te nashenn le glan leste.

1. Rajengro liil 11:38

Te shouneh ap halauter, hoy me touke penau, oun te djah tou ap mire dromma oun kreh, hoy glan mire yaka mishto hi, oun djiveh pal miro čačepen oun mire laba, har miro boudepaskro, o David, kova kras, palle hom me touha. Oun yaake har o Davideske krom, krau me, te vell dran tiri familya hako tsiro yek, kay hi o ray. Oun me dau tout o Israel, te vess ray pral leste.

1. Rajengro liil 12:14

Na-a, yob rakras lentsa yaake, har i terne morsha kova leske penan. Oun penas: “Te čivas miro dad i pharo djipen ap t'mende, me krau t'maro djipen gomme phareder! Miro dad das t'men i čoupniyah, me dau t'men i čoupniyah, hoy saster pre hi!”

Debleskri gili 111:9

O baro Devel las peskre menshen vin dran i čilače vasta, oun kras lentsa vin, te venn le leskre menshe hako tsiro. Yob kokres hi lengro Devel. Baro hi lo!

Debleskri gili 119:81

Miro dji nashell pal toute: Ab ap miri rig! Me dikau ap toute, te rakress mantsa.

Debleskri gili 27:4

Yek koova mangau miro baro Deblestar, kova kamaus me lestar, te nay ačoms an leskro kheer yaake rah har me djivau, te nay dikap o tselo tsiro leskro shoukapen, oun nay poučap pal leskro kamlepen an leskro kheer.

Debleskri gili 62:2

Pash o Debleste kokres hi miro djiyes kek daar, Yob vell ap miri rig.

Debleskri gili 89:3

Kova hi hoy me penau: Hako tsireske ačell leskro lačepen, yaake rah har dell o bolepen, rikrell yob peskro lab.

Jesaja 11:1

Yaake har vell i tikno nevo kasht dran i tele dino rouk, oun i nevo tikno rouk mank leskre draba vin, yaake vell i nevo baro ray dran o Davideskro kheer.

Jesaja 27:6

Ko tsiro vella, kay vell o Yakob pale zorelo. Ava, o Israel vell har i rouk, koles zorele draba hi, oun zenelo vell, oun ap koleste bloume pre djan, oun boud roukengre vin anenn. Kolendar vell i tseli phoub pherdo.

Jesaja 4:2

I tsiro vella, kay krell o baro Devel peskro them Israel raylo oun shoukar. Oun kolla, kay pral ačan oun an o them djivenn, hi barhtelo pral ko boud lačo koova, hoy i phoub vin anell. Oun vavar menshe sharenn len koleske.

Jesaja 54:10

I berge nay djan ap i rig, oun i tikne berge nay perenn khetne, miro lačepen, kova djal gar toutar, oun kova, hoy vin kram, te ham mer mala, ačell tardo. Kova penau me, o baro Devel, kay peskro dji touke pre kras.

Jesaja 55:3

Shounenn mishto, hoy penau, oun avenn pash mande! Shounenn ap mande, te ačenn djido! Oun me kamau t'mentsa vin te krell, te ačas mer mala hako tsireske. Ko lačo koova, hoy o Davideske penom, vell ap t'mende.

Jesaja 61:8

Me, o baro Devel kamau o čačepen, oun hom rhoyedo pral o čorepen oun o čilačepen. Oun čačepah, me dau lačo koova i menshende an Youda ko tselo čilačepaske, hoy ap lende vas. Oun me krau lentsa vin, te ačas mer mala hako tsiro. Koy pre dau miro čačo vast.

Jesaja 7:14

Doleske dell o baro Devel kanna kokres i sikepen, te sikrell lo, kay hi lo ap t'mari rig: I terni čay vell vavarčandes oun lell i morsh čaves. Oun koles dell li o lab Immanuel.

Jeremia 32:40

Oun me krau lentsa vin, te moukap gar tele, te krap lenge lačepen, oun te dap len i dji, hoy ap mande shounell, oun moukell man gar. Kava lab, hoy lentsa vin krau, ačell hako tsireske.

Jeremia 33:21

yaake nay lell kek ko lab pale, hoy dom Davideske, kay mange koy his. Leske penom, te hi hako tsiro yek leskre čavendar o baro ray pral Youda. Vitar gar nay lell yek ko lab pale, hoy dom i Levitarenge, kol rashayenge, kay mange boudrenn.

Ezekiel 37:26

Oun me pandau miro dji ap lende, oun krau lentsa vin, te nay djivenn le an o lačepen. Kova te ačell hako tsireske yaake. Oun me moukau len boud te vell, oun krau lendar i zoreli natsyona. Oun miro kheer ačell mashkral lende hako tsireske.

Amos 9:11

O baro Devel penell: Ap ko dives krau o Davideskro kheer neves, kova hoy kanna khetne peredo hi. Kote, kay lo paash hi, krau les tseles. Kote, kay barra vin phagedo hi, čivau len pale pre. Me krau les yaake har lo glan boud tsiro his.

Bičepangre 13:34

O Devel kras o Yezouses i moulendar djido. Oun yob merell bouder gar. Ap mare phourende penas o Devel: Me kamau t'men miro lačepen oun miro kamlepen te dell, har me o Davideske penom, te dap leste.

Hebrearja 13:20

O Devel kras i drom, te nay vah pash leste. Yob kras o Yezouses, maro rayes, i moulendar djido. Kova ratas peskro rat menge, te nay vah pash o Debleste, oun djivah hako tsiro leha khetne. O Yezous vas maro baro bakrengro. Kova dell yak ap mende, har i bakrengro dell yak ap peskre bakre.

Hebrearja 6:19

Kava patsepen rikrell maro djipen, yaake har rikrell i zorelo saster i shiffo, te djal lo gar ap o pani nashedo. Oun kova, ap koleste patsah oun dikah, kova hi o Yezous. Yob djas glan mende pash o Debleste an o bolepen, yaake har djas o baro rashay an o phouro tsiro an o Debleskro kheer. Oun yaake vas o Yezous hako tsireske savo baro rashay, har glan i rah tsiro o Melkisedek his.

1. Samuel 2:35

Me moukau mange i rashayes pre te stell, kay peskri boudi mishto krell. Yob krell lauter yaake, har me kamau oun mange shoukar hi. Oun me krau leske i kheer, hoy ačella. Oun yob boudrella hako tsiro koleske, koles me vi-rodau, te vell lo baro ray.

1. Samuel 25:28

Biste mange, te hadom me man oun rakrom ap toute! Me djinau, o baro Devel dell tout i kheer, hoy ačella. Tou hal kova, kay djal o baro Debleske an o kourepen. Kek čilačepen mou vell hatslo ap toute, yaake rah har tou djiveh!