2. Mose 4:1 - O Debleskro Lab 2024 (Sinte-Manouche)

¹ O Mose poučas o baro Deblestar: “Hoy hi, te patsenn i Israelitarya gar, hoy me lenge penau, oun yon shounenn gar ap mande? Nay vell, yon penenna ap mande: O baro Devel moukas pes gar glan toute te dikell.”

O Debleskro Drom 2021 (Sinte)

¹ O Mose putchas o baro Deblestar: “Hoi hi, te patsenn i Israelitarja gar, hoi me lenge penau, un jon shunenn gar ap mande? Nai well, jon penenna ap mande: ‘O baro Dewel mukas pes gar glan tute te dikell.’”

2. Mose 4:1 Iomraidhean Croise

1. Rajengro liil 13:3

Palle penas o Debleskro morsh: “Kava hi ko sikepen, hoy sikrell t'mende, te rakras o baro Devel dran miro mouy: Kay rhačepaskri phagell an kotya, oun koy yagakri čik koy pre, perell ap i phoub.”

2. Mose 2:14

Kava penas: “Koon penas, te vess tou ray pral mende? Kameh tou man ninna moules te dell har ko Egiptares?” Kote las o Mose traash oun penas peske: “Har vas kova vin?”

2. Mose 3:16

Dja kanna an o them Egiptia, oun de i phoureden i menshendar Israel khetne gole, oun pen ap lende: O baro Devel, ko Devel t'mare phoure dadendar, moukas pes te dikell glan mande. Yob hi o Devel, koles o Abraham, o Isaak oun o Yakob an-mangan. Oun yob penas ap mande: Me dom ap lauter yak, hoy yon t'mentsa an o them Egiptia kran.

2. Mose 3:18

Oun i phoureder shounenna ap tiro lab. Palle dja lentsa pash o baro rayeste pral o them Egiptia. Oun penenn ap leste: O baro Devel, koles i Hebrearya an-mangenna, vas pash mende. Kanna mouk men triin divessa dour an o moulo tato them te djal, te maras firhen maro Debleske.”

2. Mose 4:10

Oun o Mose penas ap o baro Debleste: “Miro Ray, me hayvau gar mishto te rakrell, ninna kanna kay rakreh mantsa, hi mange phares te rakrap.”

2. Mose 4:30

Oun o Aron penas lenge i tsele laba, hoy o baro Devel ap o Moseste penas. Palle kras o Mose glan lengre yaka ko baro koova an o Debleskri zoor.

2. Mose 4:31

Oun yon patsan len. Oun har shounan i Israelitarya, te dikas o baro Devel lengro pharo djipen, oun kamell lenge lačepen te krell, koy vitsran pen le ap i phoub, oun mangan o Debles an.

2. Mose 6:12

O Mose penas ap o baro Debleste: “Dik, i Israelitarya shounan gar ap mande. Har shounell palle o Farao ap mande? Ninna hayvau gar mishto te rakrell.”

2. Mose 6:30

Oun o Mose penas ap o baro Debleste: “Tou djineh, me hayvau gar mishto te rakrell. Har shounell o Farao ap mande?”

Jeremia 1:6

Oun me penom: Baro Devel, miro ray, me hom gar mishto doha te penap tiro lab. Me hom gar phouro doha.

Ezekiel 3:14

Oun o dourho hadas man pre oun las man krik. Oun an mande his i bari rholi. Kova, hoy o baro Devel mande sikras, his phares čiddo ap mande.

Bičepangre 7:25

O Mose patsas, kay peskre menshe hayvenna, kay o Devel les bičras, te lell lo len dran lengri bibarht vin. Yon hayvan kova gar.

Čačepangre 6:17

Kote penas lo: “Te hal tou mange lačo, palle de man čomone, hoy man sikrell, te hal tou čačepah o baro Devel, kay mantsa rakrell.