2. Mose 23:12 - O Debleskro Lab 2024 (Sinte-Manouche)

¹² Shob divessa boudress tou! Ap o eftato dives boudress tou gar! Ninna tire groumya, tiri bourika, tire boudepangre oun i vi-themarya, hoy pash toute hi, boudrenn ap ko dives gar, yaake te nay lenn le pale nevi zoor.

O Debleskro Drom 2021 (Sinte)

¹² Shob diwessa budress tu! Ap o eftato diwes budress tu gar! Ninna tire grumja, tiri burika, tire budepangre un i wi-themarja, hoi pash tute hi, budrenn ap ko diwes gar, jaake te nai lenn le pale newi soor.

2. Mose 23:12 Iomraidhean Croise

Nehemia 13:16

An o foro Yerusalem djivan ninna menshe dran Tirus. Kolla anan mačen oun vavar koova oun bikran kova ap o Debleskro dives ap i menshende dran Youda.

2. Mose 16:23

Oun yob penas ap lende: “Kava hi, hoy o baro Devel penas: Taysar hi i dives, kay vell kek boudi kerdo. Kova hi i dives o baro Debleske, te vell yob sharedo. Kava maro, hoy kamenn te pekell, kova pekenn! Kova, hoy kamenn te kerell an o pani, kova kerenn an o pani! Lauter, hoy pral ačella, hadenn pre i taysarlake!”

2. Mose 23:11

An o eftato bersh ma vitse tiri djob ap tiri phoub vin! Oun ko djob, hoy an ko bersh pre djal oun bares vell, kova mouk i čorvelenge tardo! Oun kova, hoy i čorvele pral moukenn, kova mouk i divye firhenge tardo! An ko eftato bersh mouk ninna i molengre drake oun i olivtikre drake ap i rouka i čorvelenge. Oun kova, hoy yon pral moukenn, vell i divye firhenge.

2. Mose 34:21

Shob divessa krenn t'mari boudi! Ap o eftato dives krenn či! Kova te vell yaake hako tsireske, ninna ko tsireske, kay t'mer boudrenn ap t'maro kotar phoub oun kay t'mer anenn o djob dren.

2. Mose 35:2

Shob divessa krenn t'mari boudi! O eftato dives hi o Debleskro dives. Ap ko dives krenn či! Ko dives hi o baro Debleske. Koon ap kava dives boudrella, hounte merella.

2. Mose 35:3

Ap ko dives krenn kek yag an t'mare tsele khera!”

Jesaja 58:3

Boud kope rham či, penenn le, te dikess lačes ap mende. Hoske dikeh tou kova gar? Mer rikram men pale o rhapastar, oun tou hayveh kova gar! Dikenn, penell o baro Devel, ap ko dives, kay t'mer mange či rhan, krenn t'mer, hoy t'menge mishto hi, oun rikrenn t'mare boudepangre tele.

3. Mose 23:3

Rikrenn o Debleskro dives! Shob divessa boudrenn, ap o eftato dives krenn kek boudi! Ko dives hi o baro Debleske. Ap leste avenn khetne glan leste! Ap kava dives krenn kek boudi, kay t'mer ninna djivenna!

Markus 2:27

Oun o Yezous penas ap lende: “O Debleskro dives hi i menshenge koy. O mensho vas gar kerdo, te hi lo o Debleskro diveske koy.

Louka 13:14

Koy rhoyras pes ko pralstouno an i biboldengri kangri, kay o Yezous koy djouvyat ap o Debleskro dives sasto kras. Oun kova penas ap i menshende: “Mer hounte boudras shob divessa. Avenn an kolla divessa, te moukenn t'men sasto te krell, oun gar ap o Debleskro dives!”