2. Mose 18:21 - O Debleskro Lab 2024 (Sinte-Manouche)

²¹ Tou, rode touke dran i tsele menshende čače morshen vin, hoy ap o Debleste shounenna, save morsha, hoy pengro lab rikrenna, oun kekes i lovenge rhorhenna! Oun kolen čip pral i Israelitarya! Kre pralstunen lendar pral i zerya, vavaren pral i sheel, oun pale pral i paash-sheel oun pral deesh.

O Debleskro Drom 2021 (Sinte)

²¹ Tu, rode tuke dran i tsele menshende tchatche murshen win, hoi ap o Debleste shunenna, sawe mursha, hoi pengro lab rikrenna, un kekes i lowenge chochenna! Un kolen tchip pral i Israelitarja! Kre pralstunen lendar pral i serja, wawaren pral i sheel, un pale pral i paash-sheel un pral deesh.

2. Mose 18:21 Iomraidhean Croise

1. Mose 22:12

Penas o bolepaskro: “Tape kol čaves gar an! Oun kre les či! Kanna djinau me, kay shouneh o tselo djiyeha ap o Debleste oun kreh, hoy yob penell. Tou rikral tiro yek čaves mandar gar pale.”

1. Mose 42:18

Ap o triinto dives penas o Yosef ap lende: “Te krenn t'mer, hoy penau, ačenn t'mer djido. Me darau o Deblestar.

1. Mose 47:6

O them Egiptia hi ninna touke koy. Rode tiro dadeske oun tire phralenge o feteder kotar them vin, te djivenn le kote! Mouk len te djivell an o them Gosen! Oun te dikeh, kay hi morsha mank lende, kay krenn pengri boudi mishto, kre te venn le pralstoune pral mire firhende.”

2. Samuel 18:1

Oun o David dikas pal, kitse lourde pash leste hi, oun čivas pralstunen pral lende, pral hako zero oun pral hako sheel morshende.

2. Samuel 23:3

Mantsa rakras o Israeleskro Devel, oun kova, kay rikras peskre vasta pral o Israel, penas mange: “Koon ray pral i menshende hi, oun djal pal o čačepen, oun rikrell peske o Debles glan peskre yaka pash kova, hoy lo krell,

1. Rajengro liil 18:12

Hoy hi, te djau kanna toutar, oun o baro Debleskro dourho lell tout krik oun anell tout ap i vavar kotar phoub, hoy me gar djinau? Oun me vau palle pash o Ahab oun penau leske, tou hal kay, oun yob hatsell tout gar? Palle moukell lo man te marell. Tou djineh, me, tiro boudepaskro, shounau ap o baro Debleste foun tiknes pre.

1. Rajengro liil 18:3

Oun o Ahab moukas o Obadya te kharell, – kova his o pralstouno pral leskro kheer. O Obadya shounas peskro tselo djiyeha ap o baro Debleste.

Esra 7:25

Oun tou Esra, čip o gosvepah, hoy tiro Devel tout dell, čačepangren oun rakepangren an i boudi dren, te rakrenn le o čačepen vin i tsele menshenge, kay vergel o panyestar Eufrat djivenna, halauterenge, kay i laba tiro Deblestar prindjrenn. Oun koon kal laba gar prindjrell, koleske sikrenn, hoy t'maro Devel lestar kamell!

Nehemia 5:9

Oun me penom: “Gar mishto hi kova, hoy t'mer kay krenna! T'mer hounte djivans glan o baro Debleskre yaka, oun krans, hoy mishto hi, te nay praasens men kol vavar menshe gar, kay troul mende djivenn oun maro merepen kamenn.

Nehemia 7:2

Oun me čivom douy pralstunen pral o foro Yerusalem, miro phrales, o Hanani, oun o Hananya, kay o pralstouno lourdo pral o lourdengro kheer his. Yob his i morsh o labestar, oun djivas yaake o Debleha har gar boud vavar.

Hiob 1:1

An o them Ous djivas i morsh, kova kharas Hiob. Yob his an o čačepen tardo, oun kek doosh his ap leste. Yob mangas o Debles an, oun rikras pes dour krik o čilačepastar.

Hiob 29:16

O čorveleske homs me har i dad, oun lom koleskro koova an o vast, kay i vi-themari his.

Hiob 31:13

Te doms miro boudepaskres – nay vell i morsh, nay vell i djouvel – gar čačes an i čingepen, kay les čačes his,

Debleskri gili 15:1

I gili o Davidestar. Baro Devel, koon nay vell an tiro kheer? Kones moukeh tou ap koy berga te djivell, kay tou khere hal?

Debleskri gili 15:5

Te patsas lo peskre love, lell lo gar boudeder love pale. Ninna te denn le les shoukar koova, anell lo kek rhorhepen ap koleste, kay kek čilačepen kras. Koon yaake djivella, kova hi zoreles tardo an peskro djipen.

2. Mose 17:9

Oun o Mose penas ap o Yosua: “Rode menge morsha vin oun dja lentsa an o kourepen oun denn i Amalekarya! Taysar kamau me man ap koy berga tardo te čivell, o Debleskro kasht an miro vast.”

2. Mose 18:25

Yaake rodas o Mose peske čače morshen vin oun kras lendar pralstoune pral i Israelitarya: Pralstoune pral i zerya oun pralstoune pral i sheel, ninna pral i paash-sheel oun pral deesh.

Gosewe laba 28:2

Te hi boud čilačepen an o them, venn ninna boud raya pre. Te vell savo morsh o ray, kay djinell boud oun hayvell lauter mishto, palle hi o čačepen i rah tsiro an o them.

Sikepaskro 12:13

Kova lauter, hoy kate penlo vas, hi khetne lino kova: Shoun ap o Debleste oun rike leskre laba! Kova molell i tsele menshenge.

Jesaja 16:5

Palle vell i rayeskri beshepaskri pre tardo. Oun yek o Davideskre menshendar hi koy pre beshdo, oun hi i lačo ray. Les hi i dji peskre menshenge. Oun hi i čačepaskro ray, kay krell, hoy čačo hi, oun dell hakenes peskro čačepen.

Jesaja 33:15

Kolla, kay an o čačepen tardo hi, oun rakrenn, hoy čačo hi; kolla, kay kekeske rhorhepah love tele lenn, te venn le bravelo, oun tserdenn pengre vasta pale, te kamell yek len love te dell, te anenn le rhorhepen pre; kolla, kay shounenn gar ap kolende, kay kamenn yekes te marell, oun kolla, kay djan gar kolentsa, kay o čilačepen krenn,

Jesaja 59:4

Kekeske t'mendar, kay djal glan o čačepaskro morsheste, djal troul o čačepen. Oun kek, kay anell čomone ap i vavareste pre, penell o čačepen. Pash t'mende hi yaake: Ap kova, hoy či moldo hi, rikrenn t'men, oun rakrenn o rhorhepen. Kova, hoy an t'mare sherya trouyel djal, hi har nay rhorhenn oun doukrenn i vavaren. Ko čilačo koova, hoy vin vell, anell o merepen,

Jeremia 5:1

Djan kol dromma an Yerusalem pral oun tele! Krenn t'mare yaka pre oun rodenn ap kol dromma o forestar! Te hatsenn yekes, kay djivell an o čačepen, oun rikrell pes ap o Debleste, palle bistrau i doosh o tselo forestar.

Ezekiel 18:8

Te patsas lo love vin, lell lo peske gar boudeder love pale. Yob rikrell peskro vast pale, te krell lo kek čilačepen. Oun an i čingepen dell lo yak, te lell hakeno peskro čačepen.

Ezekiel 22:12

Hi save mank t'mende, kay moukan pen te playsrell, te marenn le yekes. Kolen, kay siyaan pash t'mende hi, kolendar lenn t'mer boudeder love pale, har patsan lenge. T'mer krenn t'men braveles ap i vavarende, kolen t'mer rhorhenn oun ap lende zoryah djan. Oun man, o baro Debles, t'maro rayes, bistran t'mer.

Zakarie 7:9

Me, o baro Devel, ko ray pral o bolepen oun i phoub, penom glan boud bersha mire menshenge: “T'mer hounte denn yak, te vell o čačepen kerdo. Oun hakeno hounte krell peskro dji pre peskro phraleske oun vell leske lačes.

Zakarie 8:16

Kova hi, hoy hounte krenn t'mer: Rakrenn o čačepen yek o vavareha. Denn hakeneste peskro čačepen, te vell o čingepen krik lino.

4. Mose 1:16

Kolla van vi-rodedo dran i tsele Israelitarya. Hakeno his o pralstouno pral peskre menshende. Oun yon van i pralstoune pral kol boud zerya menshende an Israel.

4. Mose 1:4

Lenn deesh-te-douy morshen, yek dran haki bari familya, hoy vell kol deesh-te-douy Yakobeskre čavendar, te venn le ap t'mari rig pash koy boudi. Kal morsha hounte venn i pralstoune pral pengre menshende.

4. Mose 10:4

Te phourdenn le ap yekeste, hounte venn kolla pash toute, kay hi pralstoune pral kol boud zerya menshende an Israel.

Louka 18:2

“An i foro djivas i čačepaskro ray. Kova poučas gar pal o Debleste, oun daras kek menshestar.

Louka 18:4

I rah tsiro kras ko čačepaskro ray lake či. Pal i tsiro penas lo ap peste: Čačepah, pal o Debleste poučau gar, oun vitar gar darau i menshendar.

Bičepangre 20:33

T'mer djinenna: Me mangom kekestar t'mendar čomone: kek sonakay, kek roup, kek an-ripaske. Mire vastentsa boudrom, te vell man oun kolen, kay pash mande hi, te rhal.

Bičepangre 6:3

Doleske, mire phrala, rodenn mashkral t'mende efta morshen vin! Kolla hounte venn morsha, kay hi pherdo Debleskro Dourho oun gosvepen. Kolla hounte lenn koy boudi ap pende.

5. Mose 22:18

Oun kol phoureder ko forestar hounte lenn ko romes, oun denn les dava,

1. Timoteo 3:3

Yob hi kek pipaskro. Yob hi kek marepaskro. Les hi i baro dji i vavarenge. Yob hi kek čingepaskro. Yob hi gar pal i love.

Josua 22:14

Oun khetne leha djan deesh pralstoune, dran hako baro kheer yek. Hakeno lendar his i pralstouno pral peskri familya.

1. Samuel 8:12

Hi save mank lende, kolendar krell lo pralstoune pral peskre lourdende: pral yek zero (1.000) oun ninna pral paash-sheel (50). T'mare morsh čave hounte boudrenn ap leskro kotar phoub oun anenn leskro djob dren, hoy bares vas. Ninna hounte krenn le leskre rhare, oun kol kotya, kay leskre vourdya dran kerdo venna.

1. Samuel 8:3

Yon djan gar o drom har lengro dad, oun rodan kova, hoy lenge o feteder his, oun lan čorrhanes love, oun phagan o čačepen.