1. Timoteo 1:9 - O Debleskro Lab 2024 (Sinte-Manouche)

⁹ Mer djinah, o Moseskre laba van gar činlo kolenge, kay pal o čačepen djivenna. Kol laba van činlo kolenge, kay gar pal o čačepen djivenna, oun kay gar ap o Debleste shounenna. Kol laba van činlo kolenge, kay gar ap o Debleste patsenna, oun krenna, hoy yob gar kamella. Kol laba van činlo kolenge, kay lengro dji djoungelo hi, oun kolenge, kay praasenn o Debles. Kol laba van činlo kolenge, kay marenn o dades oun i da, oun ninna vavar menshen.

O Debleskro Drom 2021 (Sinte)

⁹ Mer djinah, o Moseskre laba wan gar tchinlo kolenge, kai pal o tchatchepen djiwenna. Kol laba wan tchinlo kolenge, kai gar pal o tchatchepen djiwenna, un kai gar ap o Debleste shunenna. Kol laba wan tchinlo kolenge, kai gar ap o Debleste patsenna, un krenna, hoi job gar kamella. Kol laba wan tchinlo kolenge, kai lengro dji djungelo hi, un kolenge, kai praassenn o Debles. Kol laba wan tchinlo kolenge, kai marenn o dades un i da, un ninna wawar menshen.

1. Timoteo 1:9 Iomraidhean Croise

2. Samuel 16:11

Oun o David penas ap o Abishay oun ap leskre pralstoune boudepangre: “Miro čavo Absalom, kay mandar vas, kamell man moulo te dell, hoske gar ninna ko Benyaminari. Moukenn les te praasell! O baro Devel penas, kay nay krell yob kova.

2. Rajengro liil 19:37

Oun har lo an-mangas an o kheer leskro deblestar, o Nisrok, dan les leskre čave, o Adrammelek oun o Sharezer, moulo o rhareha. Oun yon nashan penge krik an o them Ararat. Oun leskro čavo Asarhaddon vas baro ray pal leste.

2. Familjakro liil 32:21

Kote bičras o baro Devel i bolepaskres. Kova maras i tsele lourden, ninna lengre pralstunen oun bare lourden ap i lourdengri platsa o baro rayestar dran o them Assour. Oun i ladjatar djas lo pale an peskro them. Har yob an o kheer leskro deblestar vas, maran les leskre čave o rhareha.

2. Mose 20:13

Ma mare kekes!

2. Mose 21:14

Te das lo les čorrhanes oun an o čilačepen temerl, dell kek platsa, kay ačell lo nay djido, vitar gar, te nashell lo an o Debleskro kheer pash o Debleskri sasterni rhačepaskri. Lenn les kotar krik oun denn les temerl!

Gosewe laba 20:20

Kova, kay pral peskro dades oun peskri date bibarht vin rakrell, koleske djal har yek, koleskri momeli vin djal an i kali rat.

Gosewe laba 28:17

I mensho, kay i vavares moulo das, kova ačell ap o naashepen, yaake rah har djivell lo. Kek te rikrell les pre!

Gosewe laba 28:24

Koon peskro dades oun peskri dat vi-randell oun penell kova hi kek doosh, savo hi gar feteder har i čorepaskro.

Gosewe laba 30:11

Hi menshe koy, kay rakrenn pral pengro dad bibarht vin, oun penenn kek lačo lab pral pengri date.

Gosewe laba 30:17

Kova, kay praasell peskro dades, oun kamell gar ap peskri date te shounell, koleske hounte dens i korake i yaka vin, oun i bare čirkle hounte rhans len.

Jeremia 23:11

O baro Devel penell: Mire rakepangre shounenn gar ap mande, vitar gar mire rashaya. Lengro čilačo koova hatsau ninna an miro kheer.

Ezekiel 21:25

Ko yek djal an o foro Rabba, kay i Ammonarya djivenn, ko vavar an o zorelo foro Yerusalem an o them Youda. Yaake sikreh tou kol dromma, ap kolende o baro ray nay vell peskre lourdentsa.

3. Mose 20:9

Te rakrell yek pral peskro dadeste oder peskri date bibarht vin, palle hounte vell lo moulo dino. Koon savo koova krell, ap koleste vell leskro rat.

Mateo 10:21

Ap ko tsiro dell i phraal peskro phrales an lengre vasta, te vell lo maredo. Oun o dad dell o čaves an lengre vasta, te vell yob maredo. Oun i čave hi midjak ap pengre dadende oun pengre dayende, oun denn len an i vasta kolendar, kay marenn len.

Remarja 1:30

oun rakrenn rhorhepen pral lende. Yon praasenn o Debles oun i menshen, oun hadenn pen pre oun hi sharedo. Yon rodenn, har te krenn le o čilačepen. Yon shounenn gar ap pengro dadeste oun ap pengri date.

Remarja 4:13

Glan rah tsiro das o Devel o Abrahames peskro lab, te lenn leskre čave i tseli phoub. Ap ko tsiro penas o Devel leske gar: Tou te kreh lauter, hoy toutar kamau, palle leh tou kova halauter. Na-a. Yob penas leske: Tou patsal ap mande, doleske hal čačo glan mande.

Remarja 5:20

O Devel kamas i menshende te sikrell, har baro lengri doosh hi. Doleske das lo len peskre laba. Kolla penan lenge, hoy lačo oun hoy čilačo hi. Yaake dikan le, har boud čilačo koova yon kran. Oun kote, kay o čilačepen baro vas, kote vas o Debleskro lačepen gomme bareder.

Remarja 6:14

T'mer hounte rikrenn t'men bouder gar ap o Moseskre laba. O Devel kras t'men čačo glan leste dran peskro lačepen. Doleske nay vell o čilačepen bouder gar o ray pral t'mende.

Galatarja 3:19

Hoske hi o Moseskre laba koy? O Devel das len mende, te dikas mer, har baro maro čilačepen hi. O Moseskre laba ačan tardo yaake rah, bis te vas o Abrahameskro čavo, ko yek, konestar o Devel penas, te vell yob. I bolepangre anan kol laba o Moseske. Kova his tardo mank i menshende oun o Debleste. Oun o Mose das kol laba i menshende.

Galatarja 5:18

Te krenn t'mer kova, hoy o Debleskro Dourho t'menge penella, palle hi o Moseskre laba kek zoor pral t'mende.

Galatarja 5:21

Yon kamenn kova, hoy o vavares hi. Yon hi pipangre oun rhapangre. Oun boud vavar čilačo koova krenn yon. Me penom t'menge oun penau pale: Koon yaake djivella, vell gar pash o Debleste an o bolepen oun lell gar ko lačo koova, hoy o Debles peskre čavenge hi.

Galatarja 5:23

Yob krell pes gar bares oun lell pes khetne. O Moseskre laba, kolen hi kek zoor pral koleste, koon yaake djivella.

5. Mose 27:16

“Praasedo vell kova, hoy ap peskro dadeste oun peskri date tele dikell!” Oun i tsele menshe hounte penenn: Amen!

2. Tessalonikarja 2:8

palle sikrell pes ko čilačo mensho, har yob čačepah hi. Koles marell maro ray Yezous ap ko dives, kay vell lo pale. Yob phourdell ap leste, oun kova merella.

1. Timoteo 4:7

Ma shoun ap dinele parmisse! Kolla venna gar o Deblestar! Dik ap toute, te djivess o djipen, hoy lačo hi glan o Debleskre yaka.

1. Timoteo 6:20

Tou, Timoteo, ač pash kova, hoy o Devel an tiro vast čivas! Ma shoun ap kolende, kay rakrenn laba, hoy či moldo hi, oun hoy gar o Deblestar venna! Yon rakrenn dinelo koova, oun patsenn, kay djinenn le boudeder har kol vavar. Lengro hi gar čačo.

2. Timoteo 2:16

Ma shoun ap dinelo rakepen, hoy vell i menshendar oun gar o Deblestar! Kova hi či moldo oun anell i menshen o Deblestar krik!

2. Timoteo 3:2

An ko pharo tsiro dikenn i menshe ap pende, te djal lenge kokres mishto. Yon hi pal i love. Yon krenn pen bares. Yon dikenn tele ap i vavarende. Yon rakrenn djoungeles pral o Debleste. Yon shounenn gar ap pengro dadeste oun ap pengri date. Yon parkrenn pen gar ko lačepaske, hoy i vavar lenge kras. Yon djivenn yaake, har te dals kek Devel.

Tito 1:10

Koy hi boud menshe, kay shounenn gar ap o Debleste, oun rakrenna dinelo koova, oun anenn i menshen o čačo dromestar tele. Boud lendar djivenn pal i biboldengro čačepen oun penenn: I morsha hounte venn činlo ap o mass.

Tito 1:16

Yon penenn, te prindjrenn le o Debles. An lauter, hoy yon krenna, sikrenn le, kay yon les gar prindjrenna. Yon hi infam an o Debleskre yaka, oun kamenn gar ap leste te shounell. Yaake hi lauter, hoy yon krenna, či moldo.

Tito 1:6

Savo phoureder hounte djivell yaake, te dikell kek i čilačo koova ap leste. Les vell gar boudeder har yek romni. Leskre čave shounenn ap leste, oun patsenn ap o Debleste. Yon hi gar bipandlo.

Tito 3:3

Glan ko tsiro, kay hams gar patslo, hams ninna save menshe, kay prindjran o čačepen gar. Mer shounam gar ap o Debleste, oun djam gar ap leskro drom. Hams pandlo ap djoungelo koova, hams čilačo oun dikam čilače yakentsa ap kova, hoy i vavaren his. Hams čilačo oun rhoyemen ap i vavarende, oun yon ap mende.

Hebrearja 11:31

Ninna i loubni Rahab patsas ap o Debleste, oun las kol morshen an lakro kheer dren, kolen o Mose bičras, te dikenn le, har zorelo o foro Yericho hi. Yaake vas i Rahab gar maredo khetne kol vavar menshentsa an ko foro, kay prindjran o Debles gar.

Hebrearja 12:16

Denn garda, te krell kek t'mendar vi-ladjedo koova, vitar gar, te djivell yek har o Esau, koleske o Debleskro lačepen či moldo his! Yob his o phoureder čavo, oun les hi o čačepen, te lell lo peskro dadeskro bravlepen pal koleskro merepen. Vas i dives, kay vas les bok, oun yob bikras ko čačepen, te lell lo i čaro lačo rhapen.

1. Petro 2:7

Kava bar hi kouč t'menge, kay patsenna. Kava bar hi gar kouč kolenge, kay gar patsenna. Yon perenn pral kava bar, oun rhoyrenn pen koy pral, yaake har činlo hi an o Debleskro lab: Ko bar, hoy kol boudepangre ap i rig vitsran, kova vas ko bar, ap koleste ko tselo kheer tardo hi; pral ko bar perenn i menshe, oun rhoyrenn pen koy pral. Kolla kay patsenn gar ap o Debleskro lab, perenn pral leste. Yaake hounte djal lenge.

1. Petro 3:20

Yob djas pash kol moulende, kay djivan an ko tsiro, kay o Noah djivas. Har o Noah ko panyeskro kheer kras, das o Devel i menshen i rah tsiro, te venn le pash leste. Oun yon van gar. His gar boudeder har orhta menshe, kay djan an o panyeskro kheer. Oun kolla tassan gar an o pani.

1. Petro 4:18

Kolla, kay hi čilačo, oun kamenn o Deblestar či te djinell, kolenge djal boud djoungleder har kolenge, kay kran, hoy o Devel kamas, ninna te vell kolengro djipen ninna phares an ko čilačo tsiro.

Judas 1:15

Yob vell, te rakrell lo o čačepen vin pral i tsele menshende, oun te dell lo kolen i phagi, kay djan gar ap o Debleskro drom oun kran gar, hoy yob kamas, oun čingran ap leste čilače labentsa.

Debleskro tsiro 21:8

Kol vavar djan an i bari yag, hoy zoreles rhačella oun khandella. Kote merenn le o douyto kopo. Yon hi kolla, kay i daryatar gar mantsa djan, kolla, kay phoukran ap pengro patsepen, kolla, kay djoungelo koova kran, kolla, kay maran vavaren, kolla, kay loubran pen trouyel, kolla, kay bengeskro koova kran, kolla, kay mangan vavar koova an har o Debles, oun i tsele rhorhene.

Debleskro tsiro 22:15

Vin hi kolla, kay moukan o Debleskro drom, kolla, kay kran bengeskro koova, kolla, kay loubran trouyel, kolla, kay maran vavaren, kolla, kay mangan vavar koova an har o Debles, oun hakeno, kay kamell oun krell o rhorhepen.