1. Timoteo 1:3 - O Debleskro Lab 2024 (Sinte-Manouche)

³ Tou djineh, har me touke penom, te ačess an o foro Efesus. Kova mangom toutar, har me an o them Macedonia djom. An o foro Efesus hi menshe, kay sikrenn i patslende i rhorheno drom, hoy anell len gar pash o Debleste. Kolenge peness, te moukenn le kova.

O Debleskro Drom 2021 (Sinte)

³ Tu djineh, har me tuke penom, te atchess an o foro Efesus. Kowa mangom tutar, har me an o them Macedonia djom. An o foro Efesus hi menshe, kai sikrenn i patslende i chocheno drom, hoi anell len gar pash o Debleste. Kolenge peness, te mukenn le kowa.

1. Timoteo 1:3 Iomraidhean Croise

Bičepangre 18:19

Pal kova van le an o foro Efesus. Oun o Paulo moukas o Akviles oun i Priskat koy. Yob djas an i biboldengri kangri oun rakras koy i biboldentsa.

Bičepangre 18:21

Har djas lo peske, penas lo ap lende: “Te kamell o Devel, vau pale pash t'mende.” Oun yob djas vin dran o foro Efesus, oun ouleras ap o shiffo pral o baro pani,

Remarja 16:17

Mire phrala, me mangau t'men, denn yak, te shounenn t'mer gar ap kolende, kay anenn čingepen mank i patslende oun sikrenn o Debleskro drom vavarčandes har kova, hoy t'mende siklo vas, oun krenn t'maro patsepen paash! Rikrenn t'men lendar pale!

2. Korintarja 11:4

Hi yaake: Te vell yek pash t'mende oun sikrell t'men i vavar drom, har ko drom, hoy mer t'mende sikram, palle nashenn t'mer leske palla. Te rakrell lo pral i vavar Yezous oun i vavar Debleskro Dourho, har kova, hoy an t'mende vas, palle shounenn t'mer mishto ap ko rhorheno morsheste.

Efesarja 4:14

Palle ham bouder gar har tikne čave, kay lauter patsenna, kava dives yaake oun ko vavar dives vavarčandes. Oun mer shounah bouder gar ap kolende, kay rhorhenna, oun kamenn men o čačo dromestar tele te anell.

Filiparja 2:24

Me patsau te moukell man o ray Yezous sik pash t'mende te vell.

1. Timoteo 4:11

Kal laba pen i patslenge oun pen lenge, te shounenn le ap kova!

1. Timoteo 4:6

Te peneh tou kava koova i patslenge, hal tou o Yezouseskro lačo boudepaskro. Yaake sikreh, kay djiveh pal o lačo lab o Yezous Kristestar, hoy tou shounal oun patsal, oun kay djah tou doureder ap o Debleskro drom!

1. Timoteo 5:7

Pen i patslenge, te djivenn le pal kal laba, te hatsell kek i doosh ap lende!

1. Timoteo 6:10

Koon pal i love hi, perell an hako čilačepen. His menshe koy, kay kaman i love yaake boud, kay peran le o Debleskro dromestar tele, oun doukran pen kokres.

1. Timoteo 6:17

Pen kol bravelenge, te rikrenn yon pen gar bareder har vavar, oun te čivenn yon pengro patsepen gar ap o bravlepen, hoy gar ačella. Mer čivas maro patsepen ap o Debleste, kay dell men lauter djipaske, yaake te nay djivas barhteles.

1. Timoteo 6:3

Te sikrell yek i menshende i vavar drom, oun penell lenge gar o čačo lab maro rayestar, o Yezous Kristestar, oun sikrell lende gar, har te djan le ap o Debleskro drom,

2. Timoteo 1:18

Me mangau o Debles, te vell lo leske lačes ap ko dives, kay yob glan leste tardo hi. Tou djineh ninna, har boud yob i patslenge an o foro Efesus boudras.

2. Johanni 1:7

Boud rhorhene sikepangre nashenn ap i phoub trouyel, kay kamenn i patslen o čačo dromestar tele te anell. Yon penenna, kay vas o Yezous Kristo gar i mensho dran mass oun rat. Kol sikepangre venna gar o Deblestar. Yaake har yon rakrenna, yaake rakrell ninna ko rhorheno, kay hadell pes pral o Yezous Kristeste.

Debleskro tsiro 2:14

I tikno koova pash t'mende hi gar mishto. Mashkral t'mende hi save menshe, kay djan ap ko drom, koles o Bileam glan i rah tsiro i menshende sikras. Yob sikras o baro rayeste pral o them Moab, – leskro lab his Balak, – har te anell lo nay i Israelitarya ap i čilačo drom. Yaake rhan i Israelitarya ko mass kol firhendar, hoy kol vavar menshe glan pengro debleste anan. Ninna djan le pash vavar djouvyende.

Debleskro tsiro 2:20

Yek koova hi gar mishto pash t'mende. T'mer moukenn koy djouvel Isebel te rakrell, hoy yoy kamella, koya, hoy penell, te hi li o Debleskri rakepaskretsa. Yoy tserdell mire boudepangren o Debleskro dromestar tele oun penell lenge, te nay djan i morsha pash vavar djouvyende, oun i djouvya pash vavar morshende. Ninna penell li lenge, te nay rhan le ko mass, hoy vavar menshe glan pengro debleste anan.