1. Samuel 6:4 - O Debleskro Lab 2024 (Sinte-Manouche)

^4-5 Oun yon poučan: “Hoy hi kova hoy mer hounte das leste, te vell lauter pale mishto?” Yon penan: “Panč raya hi an o them Filistia. Len oun t'men hi o emligo nasslepen. Doleske krenn panč sonakangre figure, hoy vin dikenn har o doukepen, hoy ap t'maro mass vas, ninna panč sonakangre figure, hoy vin dikenn har kol kermuse, kay rhan t'maro them pre. Denn kolen o Israeleskro Debleste. Yaake sikrenn t'mer leste, te djinenn, har baro yob hi. Nay vell, te lell lo peskro vast t'mendar pale, ninna t'mare deblendar oun t'maro themestar.

O Debleskro Drom 2021 (Sinte)

^4-5 Un jon putchan: “Hoi hi kowa hoi mer hunte das leste, te well lauter pale mishto?” Jon penan: “Pantch raja hi an o them Filistia. Len un tumen hi o emligo nasslepen. Doleske krenn pantch sonakangre figure, hoi win dikenn har o dukepen, hoi ap tumaro mass was, ninna pantch sonakangre figure, hoi win dikenn har kol kermuse, kai chan tumaro them pre. Denn kolen o Israeleskro Debleste. Jaake sikrenn tumer leste, te djinenn, har baro job hi. Nai well, te lell lo peskro wast tumendar pale, ninna tumare deblendar un tumaro themestar.

1. Samuel 6:4 Iomraidhean Croise

2. Mose 12:35

Oun i Israelitarya kran pal i laba, hoy o Mose ap lende penas, oun djan pash i Egiptarya oun moukan pen lendar roupeno oun sonakaskro koova te dell, ninna shoukar ripya.

Josua 13:3

oun ko them, kay i Kanaanitarya djivenn, mank o pani Shihor, hoy glan o them Egiptia nashell, oun o foro Ekron, kay kote čiddo hi, kay norden hi; oun kol panč forya, pral kolende panč Filistarya i raya hi: Gaza, Ashdod, Ashkelon, Gat oun Ekron; koy pashel ko them, kote kay o kham pralstounes hi, oun kay i Avarya djivenn;

Čačepangre 14:19

Oun o baro Debleskro dourho vas pral leste. Oun yob djas tele an o foro Ashkelon oun das triyanda morshen lendar moulo, oun rivas len vin, oun das kol koola kolen, kay leske penan, hoy peskre laba kaman te penell. Oun bari rholyah djas lo pale an peskro dadeskro kheer.

Čačepangre 3:3

I panč raya pral i Filistarya, i tsele Kanaanitarya oun i Sidonarya oun i Hivarya, kay ap i berge Libanon djivan mank i berga Baal-Hermon oun Lebo-Hamat.

1. Samuel 5:12

Ninna kol menshe, kay gar meran, lan i djoungelo nasslepen. Oun koy gole an ko foro djas pre an o bolepen.

1. Samuel 5:6

Oun o baro Debleskro vast čivas pes phares ap i menshende an Ashdod oun anas bibarht ap lende. I djoungelo nasslepen vas ap kolende, kay djivan an Ashdod oun an i gaba trouyel.

1. Samuel 5:9

Oun har yon ko morhton kote anan, vas o baro Debleskro vast phares ap o foro, oun lauter, tikne oun bare lan ko djoungelo nasslepen. Oun i bari daar tapras len.

1. Samuel 6:8

Lenn o baro Debleskro morhton oun hadenn les ap ko vourdin! Oun ko sonakaskro koova, hoy leste denn, te vell lauter pale mishto mank leste oun t'mende, kova čivenn an i tikno morhton, oun čivenn lat koy pashel ap o vourdin. Oun palle moukenn i groumyen te djal, kay kamenn le!