1. Samuel 6:17 - O Debleskro Lab 2024 (Sinte-Manouche)

¹⁷ Kova hi, hoy i Filistarya o baro Debleste dan, te vell lauter pale mishto mank leste oun lende: panč sonakangre figure, hoy vin dikan har o doukepen ap lengro mass: Yek figura hako foreske: Ashdod, Gaza, Ashkelon, Gat oun Ekron.

O Debleskro Drom 2021 (Sinte)

¹⁷ Kowa hi, hoi i Filistarja o baro Debleste dan, te well lauter pale mishto mank leste un lende: pantch sonakangre figure, hoi win dikan har o dukepen ap lengro mass: Jek figura hako foreske: Ashdod, Gaza, Ashkelon, Gat un Ekron.

1. Samuel 6:17 Iomraidhean Croise

2. Samuel 1:20

Penenn kova gar an ko foro Gat, oun rakrenn gar koy pral ap i dromma an Ashkelon, te venn gar barhtelo i djouvya an Filistia, te denn le gar gole i barhtyatar, kolla ča kolendar, kay gar činle hi ap pengro mass!

2. Samuel 21:22

Kolla star his bare morsha oun djivan an o foro Gat. Oun kolla van moulo dino o Davidestar oun leskre lourdendar.

2. Rajengro liil 1:2

Ko baro ray, kay pal o Ahab vas, his o Ahasya. His i dives, har his lo an peskri pralstouni isema an o foro Samaria, koy peras lo tele dran i vorhni oun doukras pes. Oun yob bičras morshen an o foro Ekron oun penas ap lende: “Djan koy oun poučenn o deblestar Baal-Seboub, – kova hi o devel o forestar Ekron: Vau me pale sasto?”

2. Familjakro liil 26:6

Oun yob djas an o kourepen oun kouras pes i Filistarentsa oun phagas i massurya tele troul i forya Gat, Yabne oun Ashdod. Oun moukas zorele barrengre khera te krell an o them troul Ashdod oun an o Filistarengro them.

Jeremia 25:20

oun vi-themarya an o them Egiptia; i tsele bare raya an o them Ous; i tsele raya an kol Filistarengre forya Ashkelon, Gaza, Ekron oun kolla, kay pral ačan an Ashdod;

3. Mose 5:7

Te hi ko morsh čorvelo oun nay anell kek bakri vitar kek bouzni, nay anell lo douy taube. Kolla nay hi douy divye taube oder douy vavar taube, yek, te vell i doosh krik lino, oun yek, hoy o baro Debleske tseles rhačedo vell.

Amos 1:6

O baro Devel penell: I menshe dran o foro Gaza kran pale te pale djoungelo koova. Yon lan i menshen dran tsele gaba pandlo, oun bikran len an i vasta kolendar dran o them Edom, te venn le lengre boudepangre. Doleske lenn le pengri phagi oun khaytenn man gar.

Amos 6:2

[T'mer penenn ap i menshende:] Djan an o foro Kalne! Oun dikenn, har ko foro hi! Oun kotar djan doureder pash o baro foro Hamat! Palle djan tele pash i Filistarya an o foro Gat! Hi le zorleder har kal themma Youda oun Israel? Hi lengro them bareder har t'maro them? Na-a!

5. Mose 28:27

O baro Devel bičrell t'men savo nasslepen, hoy lo glan i rah tsiro i Egiptaryen das: I djoungelo nasslepen vell ap t'maro mass, doukepen phagell pre, oun t'maro mass rhačell oun rhandjrell. Oun kek drab hi koy, hoy nay krell t'men sasto.

Čačepangre 1:18

Oun o Youda las ninna i forya Gaza, Ashkelon oun Ekron dren oun o them, hoy koy pashel his.

Čačepangre 14:19

Oun o baro Debleskro dourho vas pral leste. Oun yob djas tele an o foro Ashkelon oun das triyanda morshen lendar moulo, oun rivas len vin, oun das kol koola kolen, kay leske penan, hoy peskre laba kaman te penell. Oun bari rholyah djas lo pale an peskro dadeskro kheer.

Čačepangre 16:1

Oun o Simson djas an o foro Gaza, oun kote dikas lo i loubni. Pash kolate djas lo dren.

Čačepangre 16:21

Oun i Filistarya tapran les, oun dan leske i yaka vin čourye. Oun yon anan les tele an o foro Gaza oun pandan les sasterne shellentsa. Oun an o stilepen hounte kras lo o djob tiknes an i djobeskri.

1. Samuel 5:1

Oun o morhton, kay o Debleskre deesh laba dren hi, his kanna an i vasta kol Filistarendar. Oun yon lan les dran Eben-Eser oun anan les an o foro Ashdod.

1. Samuel 5:10

Koy bičran le o morhton, kay o Debleskre laba dren hi, an o foro Ekron. Oun har ko morhton an o foro Ekron dren vas, dan i menshe kote gole i daryatar oun penan: “Yon anan o morhton o Israeleskro Deblestar pash mende, te marell lo men lauteren.”

1. Samuel 5:8

Oun yon bičran morshen an o tselo them Filistia oun dan i tsele rayen khetne gole, oun poučan lendar: “Hoy kras mer ko morhtoneha o Israeleskro Deblestar, kay leskre laba dren hi?” Kolla penan: “Anenn les an Gat.” Oun yon hidjran les an o foro Gat.

1. Samuel 6:4

Oun yon poučan: “Hoy hi kova hoy mer hounte das leste, te vell lauter pale mishto?” Yon penan: “Panč raya hi an o them Filistia. Len oun t'men hi o emligo nasslepen. Doleske krenn panč sonakangre figure, hoy vin dikenn har o doukepen, hoy ap t'maro mass vas, ninna panč sonakangre figure, hoy vin dikenn har kol kermuse, kay rhan t'maro them pre. Denn kolen o Israeleskro Debleste. Yaake sikrenn t'mer leste, te djinenn, har baro yob hi. Nay vell, te lell lo peskro vast t'mendar pale, ninna t'mare deblendar oun t'maro themestar.