1. Samuel 6:14 - O Debleskro Lab 2024 (Sinte-Manouche)

^14-15 Oun o vourdin vas ap i kotar phoub, hoy his i morshes, kay kharas Yosua oun his dran Bet-Shemesh. Kote ačas o vourdin tardo. Kote his i baro bar čiddo. Oun i Levitarya lan ko morhton tele, kay o Debleskre deesh laba dren hi, ninna ko tikno morhton, hoy koy pashel tardo hi, an koya ko sonakaskro koova his. Oun čivan lauter ap ko baro bar. Oun i menshe dan ko vourdineskro kasht tiknes, oun maran kol groumyen oun rhačran len o baro Debleske. Ap ko dives maran kol morsha dran Bet-Shemesh kote gomme boudeder firhen o baro Debleske. His firhe pashel, kay van tseles rhačedo, oun vavar, kay rhan le khetne glan leste.

O Debleskro Drom 2021 (Sinte)

^14-15 Un o wurdin was ap i kotar phub, hoi his i murshes, kai kharas Josua un his dran Bet-Shemesh. Kote atchas o wurdin tardo. Kote his i baro bar tchiddo. Un i Levitarja lan ko mochton tele, kai o Debleskre deesh laba dren hi, ninna ko tikno mochton, hoi koi pashel tardo hi, an koja ko sonakaskro koowa his. Un tchiwan lauter ap ko baro bar. Un i menshe dan ko wurdineskro kasht tiknes, un maran kol grumjen un chatchran len o baro Debleske. Ap ko diwes maran kol mursha dran Bet-Shemesh kote gomme budeder viechen o baro Debleske. His vieche pashel, kai wan tseles chatchedo, un wawar, kai chan le khetne glan leste.

1. Samuel 6:14 Iomraidhean Croise

2. Samuel 24:18

Oun o Gad vas ap ko dives pash o David oun penas ap leste: “Dja koy pral ap koy djobeskri platsa ko morshestar Arauna, ko Yebousari! Oun kre kote o baro Debleske i rhačepaskri!”

2. Samuel 24:22

O Arauna penas ap o David: “Miro baro ray, le touke kova lauter oun mare firhen o Debleske, yaake har kameh. Dik, koy hi i groumya rhačepaske! Le ninna ko vourdin oun ko vavar kasht, hoy hi i groumyen troul i meen, te vell tout kasht rhačepaske!

2. Samuel 24:25

Oun o David kras koy o baro Debleske i rhačepaskri oun anas firhen leske, saven kay van tseles rhačedo oun saven, kay rhan le khetne glan o baro Debleste. Oun o baro Devel dikas pale lačes ap ko them Israel. Oun ko nasslepen djas kol menshendar pale krik.

1. Rajengro liil 19:21

Oun o Elisa djas pale pale pash i groumyende, las douy groumyen oun maras len. Ko kasht, hoy kol douyen khetne rikras, las lo oun kras i yag. Koy pre keras lo o mass, das les peskre menshende, oun yon rhan. Palle stas lo pre, oun nashas pal o Eliya, oun vas leskro boudepaskro.

2. Mose 20:24

Hi mange doha, te krenn mange i rhačepaskri dran phoub! Koy pre anenn mange kol marede bakren oun groumyen, hoy rhačrenn tseles mange, ninna kolen, hoy mange marenn, te rhan t'mer lengro mass khetne glan mande. Kote, kay kamau, te mangenn man an, kote vau me pash t'mende oun dau t'men miri barht oun miri zoor.

Čačepangre 21:4

Oun o vavar dives taysarlake stan i menshe sik pre, oun kran i rhačepaskri, oun maran firhen o Debleske, save, hoy leske tseles rhačedo van oun save, kay rhan le khetne glan leste.

Čačepangre 6:26

Oun kre i rhačepaskri o baro Debleske, kay tiro Devel hi, kate pral ap kay berga, kay t'maro zorelo kheer tardo hi! Oun le ko douyto gouroum oun mare les mange oun rhače les mange kote! Kre koy yag ko kashteha, hoy i debletsa Ashera his, hoy tou trouyel dal!”

1. Samuel 11:5

An ko tsiro vas o Saul peskre groumyentsa pale peskri boudyatar ap peskro kotar phoub, oun poučas: “Hoy hi i menshenge, te rovenn le yaake?” Oun yon penan leske i laba, hoy i morsha dran Yabesh lenge penan.

1. Samuel 20:29

Yob penas: Mouk man koy te djal! Mire menshe anenn o Debleske firhen an o foro. Oun miro phraal penas, me hounte vap. Te hom tiro maal, palle mouk man te djal, te dikap mire phralen! Doleske vas lo gar pash tiro rhapen.”

1. Samuel 6:13

Oun i menshe dran Bet-Shemesh lan an ko tsiro o djob dren an o telstouno them. Oun har le pre dikan, oun o morhton dikan, kay o Debleskre deesh laba dren hi, van le barhteles.

1. Samuel 6:18

Ninna dan le sonakangre kermuse, yek kermuso hako foreske, pral koleste i panč Filistarya i raya his: gar kokres i zorele foryenge, na-a ninna hako gab. Ko baro bar, kay čivan le o morhton pre, kay o Debleskre deesh laba dren hi, ko bar hi gomme kava dives čiddo ap ko kotar phoub, hoy hi ko morshes Yosua dran Bet-Shemesh.