1. Samuel 12:3 - O Debleskro Lab 2024 (Sinte-Manouche)

³ Doleske hom kanna glan t'mende tardo: Stenn pre oun rakrenn kate glan o baro Debleste oun glan o baro rayeste, kones yob vin rodas: Koneskri groumni lom me? Koneskri esla? Kones rhorhrom me? Konestar lom i zoryah, hoy leske his? Konestar moukom man te playsrell, te pandap mire yaka glan leskro čilačo koova. Me te krom kova, palle kamau les me pale te dell.”

O Debleskro Drom 2021 (Sinte)

³ Doleske hom kanna glan tumende tardo: Stenn pre un rakrenn kate glan o baro Debleste un glan o baro rajeste, kones job win rodas: Koneskri grumni lom me? Koneskri esla? Kones chochrom me? Konestar lom i sorjah, hoi leske his? Konestar mukom man te plaissrell, te pandap mire jaka glan leskro tchilatcho koowa. Me te krom kowa, palle kamau les me pale te dell.”

1. Samuel 12:3 Iomraidhean Croise

2. Samuel 22:22

Me rikrom man ap i dromma o baro Deblestar, oun moukom gar miro Debles.

Nehemia 5:11

Denn len gomme kava dives lengri harhetikri phoub pale, ninna lengro drakengro them, lengre djeteskre rouka oun lengre khera! Oun moukenn lenge lengri tseli siyaan tele, hoy yon pash t'mende hi, love, djob, mool oun djet!”

Debleskri gili 15:5

Te patsas lo peskre love, lell lo gar boudeder love pale. Ninna te denn le les shoukar koova, anell lo kek rhorhepen ap koleste, kay kek čilačepen kras. Koon yaake djivella, kova hi zoreles tardo an peskro djipen.

2. Mose 20:17

Ma rode, har nay less tou kova touke, hoy i vavares hi: leskro kheer, leskri romni, boudepaskro, boudepaskretsa, groumni, bourika, či, hoy i vavares hi.

2. Mose 22:4

Te dell i morsh gar yak ap peskre firhende, oun moukell len ap i vavareskro them te djal oun kote te rhal, palle hounte dell lo kova pale. Te rhan i firhe djob, palle dell lo o lačeder djob, hoy leskro hi. Te rhan i firhe drake, palle dell lo peskre lačeder drake.

2. Mose 23:8

Te hi yek an o čingepen i vavareha oun kamell tout te ginell, te dess les čačepen, ma le kova, hoy yob kamell tout dell! Koon sau koova an-lell, vell korelo o čačepaske oun dikell bouder gar, koon an o čačepen hi.

Gosewe laba 15:27

Koon rhorhepah peskro bravlepen khetne lell, anell peskri familya an i bibarht. Koon moukell pes gar te ginell, savo djivell.

3. Mose 6:4

Palle rivell lo peskre koola vin oun vavar koola an, oun hidjrell koy yagakri čik vin dran koy platsa, kay i menshe hi, ap i platsa, hoy hi djoudjo o Debleske.

3. Mose 6:5

Oun koy yag ap i rhačepaskri rhačell doureder, oun djal ko tselo tsiro gar vin. Haki taysarla čivell o rashay kasht pre, oun koy pre ko mass ko firhestar, hoy vell tseles rhačedo, ninna kol kotya thulepen ko firhestar, hoy i menshe khetne rhan. Oun o rashay moukell lauter pre te rhačrell.

4. Mose 16:15

Koy vas o Mose rhoyedo, oun penas ap o baro Debleste: “Ma dik lačes ap kova, hoy yon tout denna! Me lom gar i bourika lendar, oun krom len kek čilačepen.”

Mateo 22:21

Penan le: “O shero oun o lab o baro rayestar an o foro Rom!” Penas lo ap lende: “Yaake denn leste, hoy leskro hi! Oun denn o Debleste, hoy leskro hi!”

Louka 19:8

O Zakeo his koy tardo oun penas ap o Yezouseste: “Mo ray, me dau i čorvelende i paash lauterestar, hoy man hi. Oun te rhorhrom yekes, dau les kanna star kope yaake boud pale.”

Bičepangre 20:33

T'mer djinenna: Me mangom kekestar t'mendar čomone: kek sonakay, kek roup, kek an-ripaske. Mire vastentsa boudrom, te vell man oun kolen, kay pash mande hi, te rhal.

2. Korintarja 12:14

Me vau kanna o triinto kopo pash t'mende. Ninna kava kopo kamau či t'mendar te lell. Me kamau t'men oun gar t'mare love. O dad oun i day denn pengre čaven te rhal, oun gar i čave pengro dades oun pengri dat.

5. Mose 16:19

Te hal tou i čačepaskro, hounte dess tou koles peskro čačepen, koon an o čačepen hi. Tou dikess gar koy pre, koon glan toute tardo hi. Te dell yek tout kouč koova, te dess tou les čačepen, ma le kova an! Koon savo shoukar kouč koova an-lell, vell korelo o čačepaske, oun dikell bouder gar, koon an o čačepen hi.

1. Tessalonikarja 2:10

O Devel dikas, har djivam mashkral t'mende. Oun t'mer, kay ap leste patsenna, dikan ninna, te djivam yaake pash t'mende har o Devel kamella, oun djam pal o čačepen, te hatsas kek i doosh ap mende.

1. Tessalonikarja 2:5

T'mer djinenna, mer rakram t'menge gar pal o mouy. Vitar gar penam o Debleskro lab, te las love i menshendar. O Devel djinella, me penau o čačepen.

1. Petro 5:2

Denn garda ap i patslende, kay o Devel peske khetne anas! T'mer han har i bakrengre. Oun o Debleskre čave hi har bakre, hoy o Devel an t'mare vasta das. Denn len kova, hoy len hounte vella, te ačell lengro patsepen djido! Krenn kova o tselo djiyestar! Yaake kamell les o Devel. Krenn kova gar, har te vals i phari boudi, hoy hounte krenn! Krenn koy boudi dran o kamlepen oun gar, te venn t'mer playsedo!

1. Samuel 10:1

Oun o Samuel las o khoro, kay o kouč djet dren hi, oun čoras les pral o Sauleskro shero. Oun yob čoumras les oun penas: “Ko djet sikrella, te čivas tout o baro Devel pral peskre menshende, te vess lengro ray.

1. Samuel 12:4

Yon penan: “Tou rhorhral men gar, oun lal touke či i zoryah, oun lal kekestar čomone an, te pandess tire yaka glan leskro čilačo koova.”

1. Samuel 12:5

Yob penas ap lende: “O baro Devel oun t'maro baro ray, koles yob vi-rodas, kolla douy dikenn oun shounenn kava dives, te hatsan t'mer či an miro vast.” “Ava, yaake hi kova”, penan le.

1. Samuel 2:35

Me moukau mange i rashayes pre te stell, kay peskri boudi mishto krell. Yob krell lauter yaake, har me kamau oun mange shoukar hi. Oun me krau leske i kheer, hoy ačella. Oun yob boudrella hako tsiro koleske, koles me vi-rodau, te vell lo baro ray.

1. Samuel 24:11

Kava dives nay dikeh tire yakentsa, te das tout o baro Devel an mire vasta, har hals tou an koy grotta. Oun mange penan le, te dap tout moulo. Oun me krom tout či. Me penom mange: Me kamau gar miro vast ap miro rayeste te čivell, koles o baro Devel vin rodas, te vell lo baro ray.

1. Samuel 24:6

Pal kova, har lo kova kras, djas leskro dji zoreles.

1. Samuel 24:7

Oun yob penas ap kol morshende, kay pash leste his: “O baro Devel mou rikrell man pale, te taprap miro rayes an, koles o baro Devel vin rodas, te vell lo baro ray. Kova hi lo oun ačell lo.”

1. Samuel 26:11

O baro Devel mou rikrell man pale, te taprap me koles an, kones yob peske vin rodas. Le kanna leskro vitsepaskro čouri, hoy pash leskro shero an i phoub dino hi, oun leskro panyeskro khoro, te djas mer menge!”

1. Samuel 26:9

O David penas: “Na-a, ma de les moulo! Koon hadell o vast pre ap koleste, koles o baro Devel peske vin rodas, kova lell peskri phagi.”