1. Mose 17:17 - O Debleskro Lab 2024 (Sinte-Manouche)

¹⁷ Koy moukas pes o Abraham ap i phoub te perell, sanas oun penas peske: “Me hom sheel bersh phouro. Oun man te vell i čavo? Oun i Sara hi enya-deesh bersh phouro. Yoy te lell i ternepen?”

O Debleskro Drom 2021 (Sinte)

¹⁷ Koi mukas pes o Abraham ap i phub te perell, sanas un penas peske: “Me hom sheel bersh phuro. Un man te well i tchawo? Un i Sara hi enja-deesh bersh phuro. Joi te lell i ternepen?”

1. Mose 17:17 Iomraidhean Croise

1. Mose 17:18

Oun o Abraham penas ap o Debleste: “Ah, mouk kova, hoy tou mange penal, ap o Ismael te vell!”

1. Mose 17:3

Koy moukas pes o Abram ap i phoub te perell. Oun o Devel rakras leha oun penas:

1. Mose 18:11

O Abraham oun i Sara his hake douy phouro. Oun i Sara djinas, kay nay lell li bouder kek čave.

1. Mose 18:12

Koy sanas yoy peske oun penas: “Kanna hom me phouro. Oun miro ray, miro rom, hi ninna phouro! Har nay lau me i ternepen?”

1. Mose 21:5

O Abraham his sheel bersh phouro, har peskro čavo Isaak boldo vas.

1. Mose 21:6

Oun i Sara penas: “O Devel das man i sapen. Hakeno, kay shounella, hoy mange djas, sal mantsa.

1. Mose 21:7

Koon penals ap o Abrahameste, te dell i Sara i ternepen i beč te piyell? Oun me anom leske an leskro phourepen i čaves ap i phoub.”

1. Familjakro liil 21:16

Oun o David dikas pral oun dikas ko bolepaskres o baro Deblestar tardo mashkral i phoub oun o bolepen. An leskro vast his i rharo, koleha sikras lo pral o foro Yerusalem. Kote peras o David oun i phoureder ap pengro mouy. Halauter his le an gone an-rido.

Hiob 1:20

Kote stas o Hiob pre, oun zoryah tserdas lo peskre pralstoune koola pestar tele, oun kras len paash, yaake boud doukas leskro dji. Yob činas peskre balla tele, moukas pes ap i phoub te perell oun mangas o Debles an.

Ezekiel 1:28

har i brishineskro bogo, hoy vell diklo ap o bolepen pal i brishin. Yaake sikras pes o baro Devel an peskro raylepen mange. Oun har les dikom, moukom man glan leste ap i phoub te perell. Oun me shounom yekes, kay rakras.

Daniel 8:17

Oun o Gabriel vas pash mande, kay me tardo homs. Oun i daar tapras man yaake zoreles, te perom ap i phoub. Yob penas ap mande: “Tou mensho, de yak oun shoun! Kova hoy dikal, kova hi ko tsireske, kay o tsiro kay phoubyake tele nashell.”

3. Mose 9:24

I yag djas vin o baro Deblestar, oun rhačras ko mass pre kol firhendar, koleskro tselo mass rhačedo vell, ninna kol thoulle kotya, hoy ap o Debleskri rhačepaskri čiddo his. Har kova i tsele menshe dikan, dan le i barhtyatar gole, oun čivan pen tele glan o baro Debleste ap i phoub.

4. Mose 14:5

Oun o Mose oun o Aron vitsran pen glan i tsele Israelitarya ap pengro mouy.

4. Mose 16:22

Kol douy moukan pen ap pengro mouy te perell, oun penan: “Ah Devel, tou hal o Devel, kay das hakenes o djipen! Te kras yek morsh i čilačo koova, kameh tou doleske tiri rholi pral i tsele menshende te čivell?”

Mateo 2:11

Oun yon djan an ko kheer, oun dikan kote o ternepas oun leskri dat, i Mariat. Oun yon vitsran pen glan leste tele, mangan les an, oun čivan ko kouč bravlepen glan leste, hoy dan le leste. Oun kova his sonakay, kouč kasht, hoy soungella mishto, ninna vavar kouč kasht, hoy vella djet lestar kerdo.

Louka 1:18

O Zakari penas ap o bolepaskro: “Har nay djinau me, kay tiro čačo hi? Me hom i phouro morsh. Oun miri romni hi ninna phouro.”

Johanni 8:56

O Abraham, t'maro dad, his barhtelo, har yob dikas, kay me vau. Yob dikas kava dives, oun his barhtelo.”

5. Mose 9:18

Oun me vitsrom man tele glan o baro Debleste, oun homs čiddo glan leste har koy ersto kopo 40 (star-deesh) divessa oun ratsya. Maro rhom kek, oun pani piyom gar. Oun mangom les t'menge, te dikell lo gar ap t'mari bari doosh, hoy t'mer ap t'mende lan, har savo djoungelo koova kran, oun les yaake rhoyedo kran.

5. Mose 9:25

Oun har kamas o baro Devel t'men te marell, homs čiddo glan leste 40 (star-deesh) divessa oun 40 (star-deesh) ratsya.

Josua 5:14

Oun yob penas: “Kek kol douyendar! Me hom o pralstouno pral o baro Debleskre lourdende. Oun kanna vom kay.” Kote peras o Yosua ap peskro mouy ap i phoub, oun mangas les an, oun penas ap leste: “Me hom tiro boudepaskro. Hoy penell miro ray ap mande, te krap?”

Josua 7:6

Har o Yosua kova dikas, doukas leskro dji yaake, te kras lo peskre koola, hoy ap leste his, paash, oun moukas pes i mouyeha ap i phoub te perell, – glan o morhton, kay o baro Debleskre deesh laba dren his, oun ačas yaake čiddo bis ap i rat. Ninna i phoureder an Israel kran kova yaake. Oun yon vitsran čik ap pengre shere.

Debleskro tsiro 11:16

Oun kol biish-te-star čačepangre phoure, kay glan o Debleste ap pengre beshepangre beshdo hi, kolla vitsran pen glan o Debleste tele, oun sharan les,

Debleskro tsiro 5:8

Oun har las yob o liil, peran kol star zorele bolepangre oun kol biish-te-star čačepangre phoure glan o terno bakro tele. Oun hakenes lendar his i bashepaskri. Oun yon bashran i shoukar bashepen. Len his ninna sonakangre čare pherdo goudlo kasht, hoy o Debleske rhačedo vella, oun mishto soungella. Ko goudlo kasht hi o mangepen, hoy o Debleskre menshe pengro Deblestar mangan.

Čačepangre 13:20

Oun har i yag ap o bar pre djas an o bolepen, koy djas o baro Debleskro bolepaskro ninna pre an koy yag. Oun o Manoa oun leskri romni dikan kova, oun vitsran pen ap i phoub ap pengro mouy.