1. Johanni 4:1 - O Debleskro Lab 2024 (Sinte-Manouche)

¹ Lače phrala oun phenya, ma patsenn hakenes, koon penella, te hi les o Debleskro Dourho! Dikenn ap leskro rakepen, te djinenn t'mer, te vell kova čačepah o Deblestar! Boud rhorhene rakepangre nashenn ap i phoub trouyel. Kolla penenna i menshenge, te vell lengro rakepen o Deblestar. Kova hi gar čačo.

O Debleskro Drom 2021 (Sinte)

¹ Latche phrala un phenja, ma patsenn hakenes, koon penella, te hi les o Debleskro Ducho! Dikenn ap leskro rakepen, te djinenn tumer, te well kowa tchatchepah o Deblestar! Bud chochene rakepangre nashenn ap i phub trujel. Kolla penenna i menshenge, te well lengro rakepen o Deblestar. Kowa hi gar tchatcho.

1. Johanni 4:1 Iomraidhean Croise

1. Rajengro liil 13:18

Kote penas o phouro ap leste: “Me hom ninna i Debleskro rakepaskro har tou, oun i bolepaskro o baro Deblestar penas mange: An les khere pash toute, te nay rhal lo maro oun te nay piyell lo pani!” Rhorhepen his kova, hoy ko phouro penas.

Gosewe laba 14:15

Koles či an o shero hi, kova patsell hako lab, hoy yek ap leste rakrell. Kones i gosevo dji hi, kova dell yak, hoy lo krell oun kay lo djal.

Jeremia 14:14

O baro Devel penas ap mande: Kol rakepangre rakran rhorhepen an miro lab. Me bičrom len gar. Oun me penom lenge či, hoy te krenn le, oun rakrom lentsa vitar gar. Yon rakrenn pral kova, hoy dikan le, – kova vas gar mandar. Oun kova, hoy le glan-vi penan, hi rhorhepen oun dourkepen, oun hi či moldo oun vell dran lengre djia.

Jeremia 23:16

Kova penell o baro Devel, ko ray pral o bolepen oun i phoub: Ma shounenn ap i laba, hoy kol rakepangre penenn! Yon rhorhenn t'men, oun rakrenn pral dikepen, hoy vell dran lengre djia oun gar o baro Deblestar.

Jeremia 5:31

O Debleskre rakepangre rakrenn rhorhepen, oun kol rashaya rodenn penge ko feteder vin, oun mire menshe kamenn kova yaake. Hoy kamenn t'mer te krell, te hi t'maro tsiro trouyel?

Markus 13:21

Te penell yek ap t'mende: Dikenn, kate hi o Kristo! – palle patsenn les gar! Oun te penell i vavar: Ake, kote hi lo! – palle patsenn les vitar gar!

Louka 12:57

Hoske nay dikenn t'mer gar, hoy o čačepen hi?

Louka 21:8

Penas lo: “Denn yak! Moukenn t'men kekestar o Debleskro dromestar tele te anell! Koy venna boud morsha, kay penenna: Me hom o Kristo, ko baro ray, kolestar o Devel penas, te vell yob! Oun yon penenn ninna: O tsiro hi kay! Me penau t'menge: Ma nashenn lenge palla!

Bičepangre 17:11

I bibolde an o foro Berea shounan feteder ap o Debleskro lab, har kol bibolde an o foro Tessalonika. Yon shounan o Debleskro lab pengro tselo djiyeha, oun rodan hako dives an o Debleskro lab, te djinenn le, te hi kova čačo, hoy o Paulo penas.

Bičepangre 20:29

Me djinau, te hom me gar bouder koy, venn divye djoukle pash t'mende oun marenn boud t'mendar.

1. Korintarja 12:10

I vavares dell yob i zoor, te krell yob baro koova, hoy kek kokres pestar nay krella. Oun pale i vavar penell i menshenge, hoy o Devel leste sikras. Oun pale i vavar hayvella, hoy o Deblestar vella, oun hoy gar o Deblestar vella. Vavar rakrenn an vavar rakepen, hoy o Debleskro Dourho len das. Oun pale vavar penenn, hoy koy rakedo vas.

1. Korintarja 14:29

Kolla, kay penenna i menshenge i lab, hoy o Deblestar vella, kolendar moukenn te rakrenn douy te triin! Oun kol vavar denn garda, te hi kova čačo, hoy rakedo vella!

1. Tessalonikarja 5:20

Shounenn ap kol laba, hoy o Devel i patsleske an o dji čivas!

1. Tessalonikarja 5:21

Denn yak, te vell ko lab, hoy yob penas, čačepah o Deblestar! Oun rikrenn kova, hoy mishto hi!

2. Tessalonikarja 2:2

Mer mangah t'men: Ma moukenn t'men dinelo oun dareno te krell, te penenn i menshe t'menge: “Ko dives hi kanna kay.” Ma patsenn lenge ninna, te penenn le, te sikras len o Devel kova, vitar gar, te penenn le, te lans le i liil mendar, kay mer kova činams!

1. Timoteo 4:1

O Debleskro Dourho penell menge, te perenn i menshe o Debleskro dromestar tele an ko tsiro, hoy vella. Yon shounenn ap o rhorhepen, oun ap kova, hoy vella o bengestar.

2. Timoteo 3:13

Kol čilače menshe oun kol rhorhene, kay krenn yaake, har te vans le patslo, kolentsa vell djoungleder oun djoungleder. Yon peran o Debleskro dromestar tele, oun tserdenn ninna vavaren o Debleskro dromestar tele.

2. Petro 2:1

Glan i rah tsiro his rhorhene rakepangre an o them Israel, kay kran, har te bičras len o Devel. Yaake venna ninna mashkral t'mende rhorhene sikepangre, kay sikrenn t'men i rhorheno drom, kay anell t'men krik o Deblestar. Kol sikepangre denn o Yezouses, maro rayes, bourhoste, kay playsras peskro rateha lenge, te lell lo len dran o čilačepen vin. Yon nashenn an pengri bibarht.

1. Johanni 2:18

Čovale, mer djivah an ko tsiro, kay i phoub bouder gar rah ačella. Oun t'mer shounan, kay ko rhorheno vella, kay hadell pes pral o Yezous Kristeste. Shounenn, boud rhorhene hi kanna kay, kay hadenn pen pral o Yezous Kristeste. Ap kova dikah mer, kay i phoub bouder gar rah ačella.

1. Johanni 2:7

Kamle phrala, ko lab, hoy me t'menge kate činau, te krenn kova, hi t'menge či nevo. Na-a, kova hi i phouro lab. T'mer shounan ko lab, har t'mer patslo van, oun djinenn les.

2. Johanni 1:7

Boud rhorhene sikepangre nashenn ap i phoub trouyel, kay kamenn i patslen o čačo dromestar tele te anell. Yon penenna, kay vas o Yezous Kristo gar i mensho dran mass oun rat. Kol sikepangre venna gar o Deblestar. Yaake har yon rakrenna, yaake rakrell ninna ko rhorheno, kay hadell pes pral o Yezous Kristeste.

3. Johanni 1:11

Lačo phraal, ma kre o čilačepen palla! Kre o lačepen! Kova, kay krell lačo koova, vell o Deblestar. Kova, kay o čilačepen krella, kova prindjrell o Debles gar.

Debleskro tsiro 2:2

Me prindjrau lauter, hoy t'mer mange kran, t'mari tseli phari boudi. T'mer dan t'maro patsepen gar pre. Oun t'mer moukenn gar čilače menshe mashkral t'mende te vell. Oun t'mer lan kolen an o yak, kay penan, te hi le o Yezouseskre bičepangre, oun yon hi kova gar. Oun t'mer hayvan, te rhorhran le.