Aposel 1:8 - Nupela Testamen long tokples Mende long Niugini

⁸ Hako os ji heyekwa karem. Avui Wasilaka avak Masikome orhin or halashinak or takaha jihik or sinak kwambu nga ji naha mashi anhin laha yanga yangak saweikwa jira. Jerusalemik ji sawehe provins Judiak ji sawehe provins Samariak saweyakwa jira. Er ji sawe ihi misam sumbu lersuwu sumbuk er ji sawerakokwa sira.”

Aposel 1:8 Iomraidhean Croise

Matyu 24:14

Mashi jivi os Avui Wasilaka hulaima nokopma orhin or arangoshinak orhi yangak li likwa mashi oson yanga yangak li sawenak li mistakonakop misambi nga lersuwu nga mendek nakwa vri.”

Matyu 28:19

Erem nawa osik jir avak yanga yangak ji ihi mashi anhin ji sawenak ma amber anin tiyanda mak li naka. Unak lirin fak ji tolofaleka, hi Avui anhik, hi Jikisi orhik, hi Masikome orhik, karem ji mbaha lirin fak ji tolofaleka.

Mashi jivi Jisashi Mak or kayeri 16:15

Uhu lirin ormu sawera, “Avak yanga yangak ji ihi mashi jivi anhi toson ji sawenak ma amber li misika.

Mashi jivi Jisashi Luk or kayeri 1:35

Urik ensel mu sirin sawera, “Avui Wasilaka metenjek fehe Masikome orhi avak nyirik takwa ri. Uhu nyirin jelya arangokwa ri. Ushinak jikisi or nyi wakwa avak jivi worna mendek nakwa ria. Unak avak li ushakwa ri, “Avui Wasilakahi jikisi indingo toria.”

Mashi jivi Jisashi Luk or kayeri 10:19

Ji misi, kwambu angop jirin a hari sir. Uwa osik jir avak hovo nga listava nga ol man kavak nanda ondon esnorkokwa jir. Uhu wutari jihi Laulaka kwambu orhin avak ji tikrikwa sir. Unak mbele las avak jirin kavak nakwa ambu sir.

Mashi jivi Jisashi Luk or kayeri 24:29

Urik fri mba toloho frimu mbara, “Mir avak shir nga lika. Ta am or layiwak krinyakwak naw.” Karem fri mbaha frir nga akak nakrem limu layira.

Mashi jivi Jisashi Jon or kayeri 15:27

Jir angop an nga ni lihi lerawu os a lawan ji heitakonda osik avak ji ihi ma amber mashi anhi kason ji sawenak li misika.”

Aposel 1:5

Jon fambak man tolofalendari ria. Hako nambek nakwa ambu sir, avak Avui Wasilaka or mbashinak Masikome orhi or takaha jihik sikwa ri,” karem ormu sawera.

Aposel 13:31

Uhu hindi mushak kormbak or talarik ma ol Galilin halaha or nga nakrem Jerusalemik iri ondo orin limu heyera. Ushihindak ma ondo os orin li heyendan Judama ondon ter nga olmu sawenduwa.

Aposel 2:32

Avui Wasilaka or mbashirik Jisas oto mawan or halaha indiyok usahari ri. Nir amber angop ni heyeri osik mashi kason nimu saweyanduwa.

Aposel 22:15

Mir avak mashi Avui Wasilakahin mi laha hulaima nokopma amber tos mi heyehe mi misindan sawenak li misikwa mira.

Aposel 3:15

Uhu ma or ermba ermbak linda oson handa ma oto or jimu mandingormera. Hako Avui Wasilaka or mbarik indik or usahari angop shi heyenda osik os shimu sawenduwa.

Aposel 4:33

Aposel ondo mashi os Wasilaka Jisas indiyok or usahari oson kormbak kwambu mendek saweri lir. Urik Avui Wasilaka Jisasin hishindiyanda ma ondo amber armek ormu ura.

Aposel 5:32

Karem or urin ni heyehe nir nga Masikome Avui Wasilakahi nga nimu sawenduwa, Masikome oto Avui Wasilaka ma ol orin hishiowehe tiyawa ma ondon or hari ria.”

Aposel 6:8

Avui Wasilaka Stivenin or waprupshihi kwambu orhik orin ormu jelyara. Uri osik Stiven mbele mbele apsham apshamhi nga ma undahi ambu nga hulaima nokopma lihi nindik ormu ura.

Aposel 8:1

Sol Stivenin li mandingormekurin rupshiri ri. Stiven or hashirik Judama ol Avui Wasilakahi mashin yawur tiyandari ondo ornjik li owetlaha orin limu wakor owera. Os Stivenin li mandingormeri wolo, Jisasin hishindiyandari ma ol Jerusalemik lindari ondo er nga kavak li nakurik limu ura. Sol oto aka akak or layihi Jisasin hishindiyandari ma ondon or jihi or tolo longo laihi krawuk or oweshirik limu lira. Hako lal os erem or urin li heyehe li tulu ihi lal provins Judiak li irik lal provins Samariak limu ira. Hako aposel ondo nom Jerusalemik er liri lira.

Jekamba Pol ol yanga Romik lindanjik or kayeri 10:18

Hako Judama ondo mashi orhin am misiri ol? He, angop li misiri sir, os Avui Wasilakahi jekambak mas karem li kayehendari hom, “Mashi Avui Wasilakahi angop yanga yanga amber hom ilai tala irakorik li misiri sir.” Buk Song 19:4

Kolosi 1:23

Jir avak Avui Wasilakan er ji hishindiyaha mashi orhin ji toltambanaha kwambu indingak ji sika. Ushinak misokome orhik or heyewa jivindingak ji naha musa nga nakwa ambu jir. Las avak mbele kava las si unak os Avui Wasilaka jirin or jivinaha jirin jipjip or ukmbaha nor mbahanda mashi jivi oson ji halanda ngashi. Mashi jivi oso angop ji misihi ji tiyaha jirin jipjip or ukmbaha or mbahanda oson jimu nikishinduwa. Mashi jivi oso osmu yanga yangak si iwak ma amber limu mistakonduwa. An Pol mashi jivi oson hulaima nokopma misambik fehen amu saweyanduwa.