Matiwu 2:1 - Wɩɩsɩ Nyʋʋfalɩɩ Teŋ (Ghana)

^1-2 Bɛtɩlɛhɛm tɩyaŋ nɛ ba gyɩ lʋl Yesu. Bɛtɩlɛhɛm gyɩ yaa tɔbiye rɛ, a we Gyudɩya paalʋʋ tɩyaŋ. Haŋ saŋa hʋ Kuwori Hɛrɔtɩ rɛ gyɩ yaa doŋ paalʋʋ kuworibal. Ba gyɩ aa lʋl Yesu, ʋ bɩ pɩɩsa ka wɩgyʋnna badɔmɔŋ aa gʋnnɩ kyɩŋwʋlɩya wɩkanɩya sii lɩɩ tɩɩmemii dɩɩlaŋ, a ko Gyerusalɛm, a ko pɩyɛsɩ, a baa, “Lee tɩyaŋ nɛ ba lʋl biye hʋ aa sɩ yaa Gyuuma kuwori hʋ? Á na kyɩŋwʋlɩɩ rɛ tɩɩmemii tɩyaŋ, ʋ daga anɩɩ ba lʋla ʋ rɛ á ko dɩ á kyʋwalɩ ʋ a kpa ʋ gyɩrɩma tɩya ʋ.”

Matiwu 2:1 Iomraidhean Croise

Matiwu 1:25

Amɛ ʋ beel-ʋ ha gyɩ bɩ gyɩŋ dɔmɔŋ anɩɩ baal bee haaŋ aŋka Mɛɛrɩ lʋl boyoŋbiye. Nyɛ rɛ Gyosɛfʋ we biye hʋ feŋ Yesu.

Matiwu 2:16

Kuwori Hɛrɔtɩ gyɩ aa ko gyɩma anɩɩ wɩgyʋnna hʋ mʋrɩ ʋ rɛ, ʋ na baaŋ kɩŋkaŋ. Wɩgyʋnna hʋ gyɩ aa daga ʋ saŋa hʋ ba aa lʋl Yesu wɩya, ʋ sii ta ʋ laalyuwolo dɩ ba mʋ Bɛtɩlɛhɛm abee tɔbiisi hʋ buloŋ aa kpaga doŋ, a kpʋ boyoŋbiisi hʋ buloŋ ha aa yaa bɩsɩ balɩya a kaŋ kɩ tuu.

Matiwu 2:19

Kuwori Hɛrɔtɩ sʋʋ hal tɩyaŋ, Gyosɛfʋ bɩl duwosi a na malɩka dɩ ʋ ko ʋ lee Igyipiti paalʋʋ tɩyaŋ a basɩ tɩya ʋ a baa, “Sii kpa biye hʋ abee ʋ naa a mɩɩgɩ mʋ Iziral paalʋʋ. Nala hʋ fa aa kyɛ dɩ ba kpʋ biye hʋ sʋba rɛ.” Ɛɛ rɛ ʋ sii kaŋ biye hʋ abee ʋ naa a mʋ we Iziral paalʋʋ tɩyaŋ.

Matiwu 2:3

Kuwori Hɛrɔtɩ gyɩ aa nɩɩ wɩɩ no, kambɩŋ gyɩ kaŋ ʋ bee Gyerusalɛm tɩmma buloŋ nɛ kɩŋkaŋ.

Matiwu 2:5

Ɛɛ rɛ ba basɩ tɩya ʋ a baa, “Ba sɩ lʋla ʋ Bɛtɩlɛhɛm aa we Gyudɩya paalʋʋ tɩyaŋ. Ɛɛ rɛ Wɩɩsɩ tɩŋdaal hʋ gyɩ sabɩ. Ʋ gyɩ baa dɩ

Matiwu 2:7

Doŋ nɛ Kuwori Hɛrɔtɩ lʋwɔlɩ yɩrɩ wɩgyʋnna hʋ aa lɩɩ tɩɩmemii ko, a kaŋ ba mʋ faŋa a pɩyɛsɩ ba dɩ ba daga ʋ saŋa hʋ tɩɩ kyɩŋwʋlɩɩ hʋ aa lɩya. Ba daga tɩya ʋ.

Luka 1:5

Baal kɩdɩgɩ rɛ gyɩ we doŋ, ba kɩ yɩrɩ Zakarɩya. Ʋ gyɩ yaa Gyuuma wɩɩkyʋwal sɩlaala kɩdɩgɩ rɛ. Saŋa hʋ tɩyaŋ dɩ ba kaŋ Gyuuma wɩɩkyʋwal sɩlaala buloŋ kpaa kpaa rɛ. Nala hʋ tɩyaŋ ba gyɩ aa kpaa Zakarɩya we, Abigya rɛ gyɩ yaa ba nɩhɩyawʋ. Zakarɩya haaŋ mɛ feŋ nɛ gyɩ yaa Ɛlizabɛtɩ. Ʋ mɛ gyɩ lɩɩ Gyuuma wɩɩkyʋwal sɩlaala doho tɩyaŋ nɛ. Aarɔŋ yaa ʋ naabatuugo rɛ. Saŋa hʋ tɩyaŋ dɩ Hɛrɔtɩ rɛ gyɩ yaa Gyudɩya paalʋʋ buloŋ kuwori.

Luka 2:11

Gyɩnaŋ ba lʋl ma Laataal lɛ Bɛtɩlɛhɛm tɩyaŋ, ba kɩ yɩrɩ ʋ á Tɩɩna Krisita, laataal hʋ Wɩɩsɩ aa lɩya dɩ ʋ laa ʋ nala ta.

Luka 2:15

Malɩkasɩ hʋ aa mɩɩgɩ mʋ wɩɩsɩbee ko teŋ, pedaala hʋ basɩ tɩya dɔmɔŋ a baa, “Ma leŋ dɩ á mʋ Bɛtɩlɛhɛm, a na wɩɩ hʋ á Tɩɩna Wɩɩsɩ aa leŋ ʋ malɩkasɩ hʋ ko basɩ tɩya ma.”

Gyɔɔŋ 7:42

Wɩɩsɩ teŋ tɩyaŋ ba basa anɩɩ Krisita hʋ, laataal hʋ Wɩɩsɩ aa lɩya, sɩ yaa Deviti doho nal lɛ, a lɩɩ Bɛtɩlɛhɛm, lee hʋ Deviti aa lɩya.