Wugubutulo 8:3 - IShiyanso nu Lufingo uLupya

³ Woope umalayikha uyunji wáyinsa wáyiima pamwandi pa luvala ulwa kihumisa ishadanda, wáava akheete mu mawokho isebeti ya sahaabu iya kitinshilisa ingaagulwa sina sinunshilila. Wápeelwa ifya kitinshilisa finshi, baheene aviishe lumo na mafuunyo ga vabaagule woona mu luvala ulwa kihumisa ishadanda ulwa sahaabu, luna luli pamwandi ya shitengo sha Wutwa.

Wugubutulo 8:3 Iomraidhean Croise

Luuka 1:10

Pina akhandi mukhati itinshilisa ingaagulwa sina sinunshilila, avaanu vinshi vakhandi vifuunya mu lukeeke lwa nanda imbaagule.

Valuumi 8:34

Khanji, kusiina umuunu yuna akwiliile kituhiga, kwa kiiva hata uKilisito Yeesu, yuna wáfwisaga na kifyukha, yuna akheele ku liwokho ilya kundiilo ilya Nguluvi, mu luvala ulwa lishima likhome mandu, uyo yumwene yuna ikitufuunyila.

Vahebulaniya 7:25

Kwa kiiva ya ilyo, umwene akwiliile kivakulusa khabisa avaanu woona vina viiluta kwa Nguluvi kishilila kunyaakwe. Umwene ikivafuunyila kwa Nguluvi luhaavi loona, kwa kiiva muumi shiluta na shiluta.

Vahebulaniya 9:4

Mu shumba isho isha wuvili, mukhandi nu luvala luna lupashiilwe isahaabu apa kitinshilisisa ingaagulwa sina sinunshilila. Khanji yikhandi yikwali isandikho iya Nguluvi, iya lufingo yina yipashiilwe isahaabu imbali soona. Mu sandikho iyo, mukhandi ni shigaana sha sahaabu shina shikhandi ni mana nu lukwegu lwa Haluni luna lwalembulaga. Khanji mu sandikho iyo mukhandi ni mbawo sivili sa mangʼanga, sina sikhayandiikhwe indaji ishumi isa lufingo.

Wugubutulo 10:1

Baheene namwaga umalayikha uyunji umunya ngufu, iyiikha kihuma kwa Nguluvi. Umalayikha uyo akhandi apiliimwe na mafunde, pashaanya ya mutwe gwakwe kukhandi kuna lipingangʼombe lya noonya, uweeni waakwe wukhandi wingʼaala ngaja lijuva, amagulu gaakwe gakhandi ngaja nsimbili sa mooto.

Wugubutulo 14:18

Baaho khanji umalayikha uyunji yuna akhandi nu wutawulilwa uwa mooto gwa mafuunyo wátwiwukha, ahumile pa luvala ulwa kihumisa ishadanda. Wámujovela kwa shawuti nkhome umalayikha yula uyunji umunya lihenjelo ilitemi, wáaja, “Ulute nyangu ni lihenjelo lyakho ilitemi, ukungule amahoojo ga sabiibu ga nyi yoona, kiiva isabiibu saakwe sayeela.”

Wugubutulo 5:8

Pina wátoolaga ilitaafili lila, ifiwumbwa fina (4) fila, lumo na vagosiivaha vala mashumi gavili na vana (4), vayigwisa pansi, vagubama pa Mwana Nkholo. Woona vakhandi ni malimba ni sebeti isa sahaabu sina simemile ifya kitinshilisa ingaagulwa sina sinunshilila. Ifiinu fya kitinshilisa, ifyo fifyene mafuunyo ga vabaagule va Nguluvi.

Wugubutulo 6:9

Baheene uMwana Nkholo pina ilamaatula umupulya ulubali ulwa wusaanu, navaaga pansi pa luvala ulwa kihumisa ishadanda, avaanu vina vakhandi vashinjiilwe kwa kiiva ya kilihuviilila iLiswi lya Nguluvi na kilibedela.

Wugubutulo 7:2

Naawona umalayikha uyunji itaana kihuma kunena, akhandi nu mupulya ugwa Nguluvi yuna muumi. Wávajovela kwa shawuti nkhome avamalayikha vana (4) vala, vina vapeliilwe ingufu isa kiyinanga inyi ni bahali,

Wugubutulo 8:4

Ilyosi ilya kitinshilisa ingaagulwa sina sinunshilila lumo na mafuunyo ga vabaagule va Nguluvi, lyataana kwa Nguluvi kihuma mu liwokho lya malayikha.

Wugubutulo 8:5

Baheene umalayikha uyo wátoola isebeti, wáamemya amakhala ga mooto pa luvala ulwa kihumisa ishadanda, wágutaaga mu nyi. Kwava ni muli ni ngulumo sa noonya nu ludegenkho lwa nyi.

Wugubutulo 9:13

Baheene umalayikha uwa mutanda wáatova ibalagumu yaakwe. Napulikha ishawuti yimo yina yiihuma mu mapembe gana gala, pa luvala ulwa kihumisa ishadanda ulwa sahaabu luna luli pa Nguluvi.