Wugubutulo 6:9 - IShiyanso nu Lufingo uLupya

⁹ Baheene uMwana Nkholo pina ilamaatula umupulya ulubali ulwa wusaanu, navaaga pansi pa luvala ulwa kihumisa ishadanda, avaanu vina vakhandi vashinjiilwe kwa kiiva ya kilihuviilila iLiswi lya Nguluvi na kilibedela.

Wugubutulo 6:9 Iomraidhean Croise

Shiyanso 4:10

UNguluvi wáaja, “Waagaha shi? Puliisa! Idanda ya munangʼana waakho yikinikhoolela kihuma mu nyi!

Yohana 16:2

AVayahuudi vakhava vikivadaga omwe mu nanda saanave isa kifuunyila. Luyinsa uluhaavi luna nda umuunu akhamubuda umunyaayumo paakhati yeenyu, akhahiiva kiija ikimusenjela insengo uNguluvi.

2 Vakolinto 5:8

Shiyooli, tina luhuviililo, khanji tiiwona shiba tiguleshe umuvili ugu, na kiluta kikhala nu Mutwa.

Vafilipi 1:23

Nikwehwa na mahiiva gavili, ilihiiva limonga nidobokha nilute baheene nikhale lumo nu Kilisito, ilyo lilyene lina linofu mandu kunyangu.

Vafilipi 2:17

Hata nda nifwe, idanda yangu yihumisiwe ngaja sadaakha ya divaayi pa luvala ulwa kihumisa ishadanda, lumo ni sadaakha ya lihuuvi lyenyu kwa Nguluvi, one nikhashendeeva, khanji nikhashendeeva lumo noomwe woona.

2 Timoteo 1:8

Lino, usikhaveesaga ni nsoni kisibedela imola sa Mutwa weesu uYeesu Kilisito, khanji usikhawonaga nsoni kwa kiiva nili mu shifungo kwa kiiva ya mwene. Leelo ugugumilaje mu malava lumo noone kwa kiiva ya Mola iNofu, ngaja shina wipeelwa ingufu nu Nguluvi.

2 Timoteo 4:6

Nikikujovela aga, kwa kiiva visakula kinihumya one ngaja mwela ya divaayi, yina viiponya pa luvala ulwa kihumisa ishadanda. Lulwene niijova, uluhaavi lwangu ulwa kiifwa lwafikha.

Vahebulaniya 12:23

Omwe mwafikha mu shipuga ishikhome isha vahuvililaaji woona, vina uNguluvi ikivatambula kiija vanaakwe va wutasi kisawa. Avahuvililaaji awo amataawa gaanave gayandiikhwe kushaanya. Mwafikha pa Nguluvi yuna Muhigaaji wa vaanu woona na pa vaanu avagolofu, vina vavalasiiwe nu Nguluvi.

Wugubutulo 1:2

Baheene woope uYohana wáyibedelaga goona gina wágaaga, amaswi ga Nguluvi nu wubedelo wa Yeesu Kilisito.

Wugubutulo 1:9

One Yohana, muhuvililaaji muyeenyu na nili lumo noomwe kimuyinatila uYeesu Kilisito mu malava, mu Wutwa na kigugumila. Nikhandi nidindiilwe pa shigunguli, shina shitambulwa Patimo shina shili paakhati ya bahali, kwa kiiva ya kiyalaalisa iLiswi lya Nguluvi nu wubedelo wa Yeesu Kilisito.

Wugubutulo 14:18

Baaho khanji umalayikha uyunji yuna akhandi nu wutawulilwa uwa mooto gwa mafuunyo wátwiwukha, ahumile pa luvala ulwa kihumisa ishadanda. Wámujovela kwa shawuti nkhome umalayikha yula uyunji umunya lihenjelo ilitemi, wáaja, “Ulute nyangu ni lihenjelo lyakho ilitemi, ukungule amahoojo ga sabiibu ga nyi yoona, kiiva isabiibu saakwe sayeela.”

Wugubutulo 16:7

Baheene napulikha ishawuti kihuma pa luvala ulwa kihumisa ishadanda yiija, “Eena Mutwa Nguluvi, uMunya Ngufu Soona, uwuhigo waakho wa shiyooli, usibaniilila vamonga!”

Wugubutulo 19:10

Baaho nayigwisa pansi, nagubama pa magulu gaakwe nimufuunye. Leelo wánijovela wáaja, “Lekha! One na yuune nili muvanda muyaago, lumo na vahuvililaaji vayaago woona vina viihumya uwubedelo wa Yeesu. Mufuunyaji uNguluvi, kiiva woona vina viihumya uwulunjikhaaji ulwa Yeesu, vilogola injowo sa wukuwamalago.”

Wugubutulo 2:13

One nipameenye pina mwikhala, apo baheene pina iitema uShetaani. Hata ndeeno mukilikhata ilitaawa lyangu. Khanji musikhakhaanile ilihuuvi lyenyu kunyangu, hata mu luhaavi ulwa Antipa umulunjikhaaji wangu, umuyinatifu mbakha kiifwa. Umuunu yula yumwene yuna wábudwagwa paakhati yeenyu, pina iikhala uShetaani.

Wugubutulo 20:4

Baheene nafyaga ifitengo ifya Wutwa fikhaliilwe na vaanu vina vakhandi vapeliilwe uwutawulilwa uwa kihiga na kitema. Awo vakhandi vaanu vina vadumulwagwa amatwe kwa kihumya uwubedelo uwa Yeesu na kiyalaalisa iLiswi lya Nguluvi. Vasikhalifuunyile ilikhanu ilikhome lila wala isanaamu yaakwe. Vasikhayanushiile ishimanyilo sha likhanu ilikhome ilyo pa weeni waanave wala mu mawokho gaanave. Avaanu ava vafyukhaga, vaatema lumo nu Kilisito kwa maakha magana lishumi (1,000).

Wugubutulo 8:3

Woope umalayikha uyunji wáyinsa wáyiima pamwandi pa luvala ulwa kihumisa ishadanda, wáava akheete mu mawokho isebeti ya sahaabu iya kitinshilisa ingaagulwa sina sinunshilila. Wápeelwa ifya kitinshilisa finshi, baheene aviishe lumo na mafuunyo ga vabaagule woona mu luvala ulwa kihumisa ishadanda ulwa sahaabu, luna luli pamwandi ya shitengo sha Wutwa.

Wugubutulo 9:13

Baheene umalayikha uwa mutanda wáatova ibalagumu yaakwe. Napulikha ishawuti yimo yina yiihuma mu mapembe gana gala, pa luvala ulwa kihumisa ishadanda ulwa sahaabu luna luli pa Nguluvi.