Vafilipi 3:10 - IShiyanso nu Lufingo uLupya

¹⁰ Nidobokha kimumanya mandu uKilisito na kihanga nawo mu ngufu sina akhandi anaso pina ifyukha kihuma kwa vina vafwile. Khanji nidobokha kihanga mu malava gaakwe. Khanji nidobokha nifwe ngaja shina wáfwisaga umwene.

Vafilipi 3:10 Iomraidhean Croise

Mataayo 20:23

UYeesu wávajovela wáaja, “Shiyooli musingʼwelele ikhoomasi iya malava yina one nisiilave, leelo kikhala ku liwokho ilya kundiilo awu ilya kunshiji, wusili wutawulilwa wangu. UNguluvi yumwene akhavapeela vina avavishiile shankhaani.”

Yohana 10:18

Kusiina umuunu yuna akwiliile kipokha uwuumi wangu. One yuune yuna nihaagula kiwuyasa uwuumi wangu. One nina wutawulilwa uwa kiwuyasa uwuumi wangu, leelo khanji nina wutawulilwa uwa kiiva muumi khanji. Yu Daada yumwene yuna wánilajisaaga kigaha ndeeno.”

Yohana 17:3

Uwuumi wa shiluta uwo, umuunu ikiwupata kwa nsila ya kimanya kiija, owe Nguluvi uli yuuwe duguli, khanji vanimanye one kiija yuune Yeesu Kilisito, yuna unifiliishe kuveene.

Valuumi 8:17

Lino, nda ose tili vaana va Nguluvi, tili vahaasi va Nguluvi, ose lumo nu Kilisito. Leelo lina lisakulwa kunyeesu, tihanje mu malava lumo nu Kilisito, baheene na yuuse titupikhwe lumo nawo.

Valuumi 8:29

UNguluvi wávamanyaga avaanu vaakwe kihuma pina akhandi asinayiwumbe inyi. Awo vaveene wávabagulaga vave ngaja shina ashwali uLusawo lwakwe uYeesu Kilisito. Wágahaga ndeeno, baheene uLusawo uyo ave yumwene mukhome kwa vaana woona va Nguluvi.

Valuumi 8:36

Ngaja shina yiyandiikhwe mu Mayandikhwa aManofu kiija, “Nsiku soona tifwimwa, kwa kiiva tikikusenjela owe. Ose tigahilwa fivi na vaanu, ngaja nkholo sina sitwalwa kishinjwa.”

2 Vakolinto 1:10

Uyo yumwene yuna wátukulusaaga pina tikhandi mu hataali ya kiifwa, khanji akhatukulusa. Ose tikimuhuviilila umwene kiija akhava iigaha shiisho shila luhaavi.

2 Vakolinto 1:5

Kiiva, tiishila mandu kilava ngaja uKilisito shina wálavaga, shiisho ndeeno uNguluvi akhashila kituyishilisa.

2 Vakolinto 13:4

Hata nda uKilisito akhandi muwoto pina ikhomeelelwa na kiifwa pa musalaaba, leelo lino muumi kwa ngufu sa Nguluvi. Shiisho ndeeno na yuuse tili vawoto kwa kiiva tilungeene nu Kilisito, leelo mu ngufu isa Nguluvi tikhava wuumi lumo nu Kilisito, na mu ngufu iso tikhavawulanisa.

Vagalatiya 2:20

Uwiikhasi wangu uwa pawukuulu wakhomelelwagwa lumo nu Kilisito pa musalaaba, leelo uluhaavi ulu nili muumi, leelo nisili muumi one, ila yu Kilisito yuna muumi mukhati yangu. Uwuumi wuna ninawo uluhaavi ulu, ninawo kwa kimuhuviilila uLusawo lwa Nguluvi. Umwene wániganaga, wáwuhumyaga uwuumi waakwe baheene anikuluse.

Vagalatiya 6:17

Ino yoyoona asikhanilafyaga khanji kwa liswi ilyo, kwa kiiva mu muvili gwangu ninago amavamba ga kihudwa na mangʼanga na kitowa ni nkwegu, ngaja shina akhandi anago uYeesu.

Vaefeso 4:13

Iliswi ilyo, likhalutiilila mbakha ose woona tikhava vavaamo mu lihuuvi lyesu na kimumanya uLusawo lwa Nguluvi. Tikhava vaanu vina vakhajina mu lihuuvi, khanji tikhakwilana ngaja uKilisito yumwene.

Vafilipi 3:8

Gasili ago hela, leelo nikigaaga goona kiija gangaya lutono, pina nilingaania nu lutono ulukhome ulwa kimumanya uKilisito Yeesu uMutwa wangu. Nigaleshile aganji goona, kwa kiiva yaakwe. Nikigavasa ago kiija mafi, baheene nive muunu wa Kilisito,

Vakolosaayi 1:24

Lino nishendeevela amalava gangu, kiiva niilava kwa kiiva yeenyu. Khanji mu muvili gwangu, nihanga mu malava ga Kilisito gina gikiyitenekha kwa kiiva ya muvili gwakwe, shisheene shipuga sha vahuvililaaji.

Vakolosaayi 2:13

Khanji mukhandi mufwile kwa kiiva ya wunansi weenyu, na mavili geenyu aga wunansi gasikhandi gayinjisiiwe ijando. Leelo uNguluvi wávafyusaaga lumo nu Kilisito Yeesu. Uluganulo lwakwe, wátusaajila uwunansi weesu woona.

Vakolosaayi 3:1

Lino, kwa kiiva uNguluvi wávafyusa lumo nu Kilisito, inumbula seenyu sidobokhaje aga kushaanya, kuna uKilisito akheele ku liwokho ilya kundiilo ilya Nguluvi, mu luvala ulwa lishima likhome mandu.

1 Petulo 1:3

Timusufyaje uNguluvi, uDaada wa Mutwa weesu uYeesu Kilisito! Kwa lusungu lwakwe lukhome wátugahaga kiija tisawe ulwa wuvili, kwa kiiva wámufyusaaga uYeesu Kilisito kihuma kwa vina vafwile. Wágahaga ndeeno baheene tive nu luhuviililo lwa wuumi kiija,

2 Petulo 1:13

Niiwona lunofu kunyangu kivakumbusa ulwa mola iso, uluhaavi loona luna nikheele mu nyi muno.

1 Yohana 2:3

Nda tikisiyinatila indaji sa Nguluvi, baheene tiimanya kiija, timumeenye uNguluvi.

1 Yohana 2:5

Leelo umuunu yoyoona yuna ikiliyinatila iliswi lyakwe, uyo iiva shiyooli amugeene uNguluvi. Ishimanyilo isha kimanya kiija tihanjile nu Nguluvi, shisheene ishi,

Wugubutulo 1:18

One yuune yuna nili muumi, yuna nikhandi nifwile, loleela lino nili muumi shiluta na shiluta. One nina fungulo sa wutawulilwa wa mfwa ni sa wusimu.