Vafilipi 1:1 - IShiyanso nu Lufingo uLupya

¹ Ibalula iyi yihumile kunyangu one Pawulo, lumo nu Timoteo. Ose tili vavanda va Kilisito Yeesu. Tikivayandishila omwe vabaagule woona va Kilisito Yeesu, muna muli ku lijumbi lya Filipi, lumo na vayimililaaji na vavanda va shipuga sha vahuvililaaji.

Vafilipi 1:1 Iomraidhean Croise

Maluko 13:34

“Yisiive ngaja umuunu yuna wáshuulile. Baheene wáyilekha inanda yaakwe mu mawokho ga vavanda, shila muunu wámupeelaga insengo yaakwe. Khanji wámulajiise umuyangalilaaji wa nanda kiija, ave meeho.

Yohana 12:26

Umuunu yoyoona yuna ikinisenjela one, isakulwa anifwate. Khanji, popoona pala pina nikwali, papeene pina umuvanda wangu akhava akwali. UDaada akhamutuna umuunu yoyoona yuna ikinisenjela one.

Nsengo sa Vanandeje 1:20

UPetulo wáyitenekha kilogola kiija, “Ago gageene gayandiikhwe mu litaafili lya Sabuli kiija, ‘Inanda yaakwe yikhava yigaya shiinu, khanji asikhasigala muunu yoyoona mukhati yaakwe.’ “Khanji yiyandiikhwe kiija, ‘Insengo yaakwe iya kilongosa, apyanile umuunu yunji.’

Nsengo sa Vanandeje 20:28

UNumbula uMunofu wávaviikhaga omwe muve vayimililaaji va shipuga sha vahuvililaaji va Nguluvi. Muyiyangalilaje yuumwe na kishidiima ishipuga shaakwe, shina uNguluvi wáshikulusaaga kwa danda ya Mwanaakwe.

Nsengo sa Vanandeje 9:13

UAnaniya wámugomosesa wáaja, “Wee Mutwa, loleela avaanu vinshi vanijoveele uSawuli uyo shina wávagahilaga uwuvi avabaagule vaakho ava ku Yelusalemu!

Valuumi 1:1

Ibalula iyi yihumile kunyangu one Pawulo, yuna nili muvanda wa Kilisito Yeesu. UNguluvi wánishemeelaga nive mwanandeje waakwe, na kinibaagula nive niikhoma iMola iNofu yaakwe.

Valuumi 1:7

Lino nikivayandishila omwe woona muna muli vahuvililaaji vayangu, vina muli ku lijumbi lya Luumi, vina uNguluvi avaganile mandu na kivabaagula muve vabaagule vaakwe. Imota nu wulindamafu kihuma kwa Nguluvi uWiheesu nu Mutwa uYeesu Kilisito, five lumo noomwe.

1 Vakolinto 16:10

UTimoteo nda ayinse kunyeenyu, muposheelaji wunofu, baheene akhale wunofu asikhatiilaga, kwa kiiva woope ikimusenjela uMutwa, ngaja yuune.

2 Vakolinto 1:1

Ibalula iyi yihumile kunyangu one Pawulo, yuna nili mwanandeje wa Kilisito Yeesu, ngaja shina akhandi ageene uNguluvi, lumo nu Timoteo, umuhuvililaaji muyangu. Tikivayandishila omwe shipuga sha vahuvililaaji va Nguluvi, vina muli ku lijumbi lya ku Kolinto, lumo na vabaagule va Nguluvi woona ava mu nyi ya Akaya.

Vagalatiya 1:10

Lino wuli, muhiiva kiija one nisakula kiganwa na vaanu? Ndaali, nisakula kiganwa nu Nguluvi mwene duguli! Naali niveesaje nisakula kivashendeefya avaanu, ndi nisili muvanda wa Kilisito!

Vagalatiya 3:26

Kwa nsila ya lihuuvi, omwe woona muli vaana va Nguluvi, kwa kilungana nu Kilisito Yeesu.

Vagalatiya 3:28

Ndeeno uMuyahuudi na yuna asili Muyahuudi vasili paayo, umuvanda na yuna asili muvanda, umugoosi nu mudala. Woona muli shiinu shimo, kwa kiiva mulungeene nu Kilisito Yeesu.

Vaefeso 1:1

Ibalula iyi yihumile kunyangu one Pawulo, yuna nili mwanandeje wa Kilisito Yeesu ngaja shina akhandi isakula uNguluvi. Nikivayandishila omwe muna mwikhala [mu lijumbi lya Efeso], muna muli vabaagule va Nguluvi, khanji mukimuhuviilila uKilisito Yeesu.

Vaefeso 1:15

Nikimuhonjesa uNguluvi, kwa kiiva ya njowo iso soona sina wátugahilaga. Kihuma pina napulikhaga kiija mukimuhuviilila uMutwa uYeesu na kivagana avahuvililaaji woona va Nguluvi,

Vaefeso 6:24

Imota ya Nguluvi yive lumo noomwe woona, vina vamugeene uMutwa weesu uYeesu Kilisito kwa lugano luna lungaya wudugo.

Vafilipi 2:19

Nihuviilila kiija nda agane uMutwa uYeesu, nikhamufilikha uTimoteo mu nsiku siisi, ayinse kunyeenyu, baheene pina akhatina kuno, na yuune niyishilisiwe inumbula, pina akhava ikinitaviilila imola seenyu.

Vafilipi 2:5

Ulugulumilo lwenyu luveesaje luhwanana nu lugulumilo luna akhandi analo uKilisito Yeesu.

Vafilipi 3:12

One nisiijova nigapatile ago, awu kiija nili mugolofu kwa goona. Ndaali! Leelo, nipikiyikhangasa kiija nikhagapata ago. Ago gageene gina uKilisito Yeesu wánishemelelaga nipate.

Vafilipi 3:3

Ose yuuse vaanu vina tiyinjisiiwe ijando mu numbula seesu, kwa kiiva uNumbula wa Nguluvi ikitutanga kimufuunya uNguluvi. Ose tikiyihalila uKilisito Yeesu na kimuhuviilila. Khanji ose tisikiyihuviilila injendo seesu isa mu muvili, kiija tipate uwukulukho,

Vafilipi 3:8

Gasili ago hela, leelo nikigaaga goona kiija gangaya lutono, pina nilingaania nu lutono ulukhome ulwa kimumanya uKilisito Yeesu uMutwa wangu. Nigaleshile aganji goona, kwa kiiva yaakwe. Nikigavasa ago kiija mafi, baheene nive muunu wa Kilisito,

1 Vatesalonike 1:1

Ibalula iyi yihumile kunyangu one Pawulo lumo nu Silwano nu Timoteo. Tikivayandishila omwe shipuga sha vahuvililaaji ava ku lijumbi lya ku Tesalonike, omwe vina mukimuhuviilila uNguluvi uWiheesu nu Mutwa uYeesu Kilisito. Imota nu wulindamafu, five lumo noomwe.

1 Vatesalonike 2:2

Khanji mumeenye kiija, pina tisinaafishe kunyeenyu tikhalafisiiwe na kiligwa, mu lijumbi lila ilya Filipi. Hata nda kukhandi kuna lukhaani kunyeenyu, uNguluvi wátupeelaga uwujimfu uwa kikhoma iMola iNofu yaakwe.

2 Vatesalonike 1:1

Ibalula iyi yihumile kunyangu one Pawulo lumo nu Silwano nu Timoteo. Tikivayandishila omwe shipuga sha vahuvililaaji ava ku lijumbi lya ku Tesalonike. Omwe mukimuhuviilila uNguluvi uWiheesu nu Mutwa uYeesu Kilisito.

2 Vatesalonike 1:10

Aga gakhasenjekha ilisiku lila lina uMutwa uYeesu akhayinsa kitupikhwa na kitiilwa na vaanu vaakwe woona, avahuvililaaji vaakwe. Na yuumwe shiisho mukhava lumo nawo, kwa kiiva mwawuyiitikha uwubedelo wuna tavabedelaga ulwa mwene uYeesu.

1 Timoteo 1:2

Nikikuyandishila owe Timoteo muswamu wangu wa shiyooli yuna tihanjile mu lihuuvi. Imota, ulusungu nu wulindamafu kihuma kwa Nguluvi uWiheesu nu Kilisito Yeesu uMutwa weesu, five lumo noowe.

1 Timoteo 3:8

Shiisho ndeeno, vina vikivatanga avayimililaaji vave vana njendo nofu, vina vasili vamyansi, vasili vagaasi, vasikhaveesaga nu wupafu wa hela.

Tito 1:1

Ibalula iyi yihumile kunyangu one Pawulo, yuna nili muvanda wa Nguluvi, khanji nili mwanandeje wa Yeesu Kilisito. One nifiliikhwe nivataviilile avabaagule va Nguluvi na kivajinia vina vikimuhuviilila uNguluvi, khanji nivamanyise vave viimanya ishiyooli vave ni shitiilo shina shikivalongosa pa Nguluvi.

Tito 1:7

Umwene kwa kiiva muyimililaaji, apeliilwe insengo ya Nguluvi, asisakulwa kiiva muunu wa kipiikhwa. Aleshe kiyisufya, yuna agaya nkhalasi, yuna asili mugaasi, yuna agaya mabaatu, khanji agaya wupafu uwa kipata uwusi mu nsila sina sisifwaya.

Filimoni 1:1

Ibalula iyi yihumile kunyangu one Pawulo, yuna nidindiilwe kwa kiiva ya kikhoma imola sa Kilisito Yeesu. Nikikuyandishila owe Filimoni. One nu muhuvililaaji muyeesu uTimoteo, tikikuhunjila owe mugani weesu nu muvanda muyeesu.

Vahebulaniya 13:23

Nisakula mumanye kiija, umuhuvililaaji muyeesu uTimoteo, wádindulilwa mu shifungo. Nda ayinse nyangu panu pina nikwali, nikhayinsa nawo kunyeenyu, baheene tivahunjile.

Yaakobo 1:1

Ibalula iyi yihumile kunyangu one Yaakobo, yuna nili muvanda wa Nguluvi nu Mutwa uYeesu Kilisito. Nikivahunjila omwe Vayahuudi woona va fikholo ishumi na fivili, muna mupalankheene mu nyi nyinshi.

1 Petulo 2:25

Mwayagaga ngaja nkholo sina sikhandi siyajile, leelo lino mwamutinila uMutwa uYeesu, uMudimaaji khanji Muyangalilaaji wa numbula seenyu.

2 Petulo 1:1

Ibalula iyi yihumile kunyangu one Simoni Petulo, yuna nili mwanandeje na muvanda wa Yeesu Kilisito. Nikivayandishila omwe muna muposheelile ilihuuvi lilila ilikhome lina na yuuse taposheelaga. Muposheelile ilihuuvi ilyo kwa kiiva uNguluvi weesu uMukulusaaji uYeesu Kilisito, iigaha gina gisakulwa.

Yuuda 1:1

Ibalula iyi yihumile kunyangu one Yuuda, yuna nili muvanda wa Yeesu Kilisito, na nili lukholo lwakwe nu Yaakobo. Nikivayandishila omwe muna mushemeliilwe nu Nguluvi uWiheesu na muna muganiilwe nu mwene, na kiyangalilwa wunofu nu Yeesu Kilisito.

Wugubutulo 1:1

Uwu wugubutulo wa Yeesu Kilisito. Wápeliilwe uwugubutulo uwo nu Nguluvi, baheene avawonense avavanda vaakwe amaswi gina mbakha gawoneshe lilino ndeeni. UYeesu wámupeelaga uYohana umuvanda waakwe uwugubutulo uwo kishilila kwa malayikha waakwe.

Wugubutulo 1:20

Wasaagaga inondwe fungati sina sili mu liwokho lyangu ilya kundiilo. Khanji wasaagaga insimbili sila isa muli fungati sa sahaabu. Nikuwulanise uluganulo lwa mbuusa isi. Inondwe sila fungati, vamalayikha va fipuga fila fungati fya vahuvililaaji. Insimbili sila isa sahaabu isa kiviishila imuli, fipuga fungati ifya vahuvililaaji va Yeesu.”

Wugubutulo 19:10

Baaho nayigwisa pansi, nagubama pa magulu gaakwe nimufuunye. Leelo wánijovela wáaja, “Lekha! One na yuune nili muvanda muyaago, lumo na vahuvililaaji vayaago woona vina viihumya uwubedelo wa Yeesu. Mufuunyaji uNguluvi, kiiva woona vina viihumya uwulunjikhaaji ulwa Yeesu, vilogola injowo sa wukuwamalago.”

Wugubutulo 2:12

“Muyandishila umalayikha wa shipuga sha vahuvililaaji vangu ava ku lijumbi lya Peligamo ndeeni, Amaswi aga gahumile kunyangu one Yeesu, one nina panga yina nemi koona na koona. Ndeeno, munipuliise!

Wugubutulo 2:8

“Muyandishila umalayikha wa shipuga sha vahuvililaaji vangu ava ku lijumbi lya Simulina ndeeni, Amaswi aga gahumile kunyangu one Yeesu, one yuune wa Wutasi khanji yuune wa Wudugo, nafwisaga khanji nafyukhaga. Ndeeno, munipuliise!

Wugubutulo 22:9

Leelo wánijovela wáaja, “Lekha! One na yuune nili muvanda muyaago, lumo na vahuvililaaji vayaago avakuwamalago, na vala vina viyinatila amaswi gina gakwali mu litaafili ili. Lino, mufuunyaji uNguluvi mwene duguli!”