Eburulo 6:4 - Sénoufo Nyarafolo

⁴ Bɛ̀ sí ki yē gè, bàli pe sí pɛ́nì yiri koligo nī gè, kiǐ ní gbɛ̀ kpíʔile bè pe kɔ́ri bɛn cígini, kire 'jo: bàli pe yé kíni nɛ̀ kpìɛnmɛ taa bè, nɛ́ laala nɛ̀ nyaa nyìʔɛnɛ yakɛngɛ nɛ̄ gè gàa gī suɔlɔ lè, nɛ́ míɛni Kulocɛliɛ Pìle taa lè nɛ̀ nyaa lè,

Eburulo 6:4 Iomraidhean Croise

Leviiyé 13:55

Bà pe 'ki jíge nɛ̀ kúɔ gè, kacuɔnriwɔ wi bé ki sɔ́migɔ bè wéli. A wi 'ki nyaa kiì yiʔɛ gèʔ, nɛ̀ sí ki taa kàa sì cɛ́nì fàri ki nɛ̄ gèʔ, kiī núʔɔgɔ. Ki 'yɛli pe- ki sórigo kàsun nī. A ki 'tiɛlɛ tɛ́ngɛ yɛgɛ nɛ̄ gè ki laamɛ nī, kire ga laa ki kàduʔu mɛ́ gè, kire yē kùɔnnɔ yaama bī.

Leviiyé 14:43

«A ki 'nyaa kùɔnnɔ ni ń'nɛ̀ koli nɛ saʔa cògí gè nɛ waa wè, nɛ̀ ki yaʔa pe 'kàdɛniyɛ nyíì kɔ̀n yè nɛ̀ kúɔ yè, nɛ́ saʔa gunyɔ kàari yè nɛ̀ yi wɔligɔ nɛ̀ kúɔ yè,

Tɔ́rilɔ 24:3

A Balaami 'fali nɛ̀ séli nɛ wi kanyaamijuʔulo nyu gèle nɛ́ jo: «Balaami siɛnrɛ ti n'dɛ, Beyɔri jaa wè, wire siɛnrɛ dī, ŋàa wī nàgalirige gè, ŋàa wi nyaʔa cɛ̀ngɛ wè.

Matiye 12:45

Wi nɛ̂ sí koli nɛ̀ kɛ́ nɛ̀ sɛ́nì gbòdolilo pálì caa nɛ̀ fàri wìi nɛ̄, gbòdolilo kɔlisiin, bìli pe 'pii péliwe nɛ̄ wè. Pe nɛ̂ pɛ́nì pínɛ nɛ̀ jíin baa tiɛliʔɛ nī gè. Siɛn wi cefuuro ti nɛ̂ serige pélige nɛ̄ gè. Bɛ̀ sí ki bága puu nɛ́ siɛnpiile kɛ̀nnɛ náà wuulo ní bèle.»

Matiye 5:13

«Yeli bīɛlɛ duniya wi yasuʔɔgɔ gè. A yasuʔɔgɔ ki tàanma pi sí kúɔ ki nī gè, gáa ní pe bé ní ki tɛ́ni cígini ? Kiì kò lé kanyuɔnɔfun yɛgɛ wī lé ? Ki 'kò pe- ki líɛ pe wáa kpànʔanɛ, siɛnnɛ de ki tánʔana de tòrí wī.

Zezi Kirisi Kataanna Siɛnrɛ dè Zan juumɔ nɛ̄ bè 15:6

«A siɛn ŋíì wè mi nī kòriwo wèʔ, pe bé wi cìra bè yige kpànʔanɛ, majo fètirige gíì pe sî ceri nɛ̀ wáa gè. Ki bé waʔa dí pe sí ga ti fàa bè wáa kàsun nī bè ti sórigo.

Zezi Kirisi Kataanna Siɛnrɛ dè Zan juumɔ nɛ̄ bè 3:27

A Zan wi 'siɛnnugoro kɛn dè nɛ́ pe yɛ: «Siɛn sǐ gbɛ̀ jáa bè yakaa taaʔ, ka laa Kulocɛliɛ bɛ̀ʔ wi 'kire yɛgɛ kɛn gè ki siɛn mɛ́ wèʔ.

Zezi Kirisi Kataanna Siɛnrɛ dè Zan juumɔ nɛ̄ bè 4:10

A Zezi wi sí siɛnnugoro kɛn wi mɛ́ nɛ́ wi yɛ: «A ki yē muɔ cé Kulocɛliɛ yakɛngɛ cɛ́n gè, nɛ́ siɛn ŋáà wi 'muɔ yɛ: ‹-Mi kɛn mi gbuɔ wè›, muɔ tíimɛ ma sî ní koli bè wi náari; wi sî muɔ kɛn nɛ́ sìi luʔɔ ní gè.»

Zezi Kirisi Kataanna Siɛnrɛ dè Zan juumɔ nɛ̄ bè 6:32

A Zezi wi 'pe yɛ: «M'bé ti juu yeli mɛ́ kányiʔɛ nɛ̄, Misa bɛ̀ʔ wi cé yaliire kɛn dè yeli mɛ́ʔ, dàa ti cé tìgi nyìʔɛnɛ nī lèʔ. Mi Tuu wire wi 'yeli kɛn nɛ́ nyìʔɛnɛ yaliire ní dè, ti wocɛ̀nrɛ dè.

Kakpiʔiligele 10:45

A ki 'kpíʔile bìli pe cé pínɛ nɛ̀ kɛ́ nɛ́ wi ní bèle nɛ́ ní Zuufulo tɛ́ngɛfɔlilɔ bèle, a ki 'pe fungo wúɔ kpuʔɔ, bà pe 'ki 'nyaa Kulocɛliɛ Pìle ni 'tìgi kùlogolo kálì siɛnnɛ nɛ̄ bèle nɛ̀ pínɛ wè.

Kakpiʔiligele 11:17

«A ki sí yē Kulocɛliɛ wi 'ki kpuʔɔrɔ nuro kpíʔile dè siɛnnɛ bálì mɛ́ bèle bà pe 'tɛ́ngɛ Kàfɔli Zezi Kirisi nɛ̄ wè, majo mɛni wi cé ki kpíʔile weli mɛ́ bèle, mi yē ŋáa mi wè bé sí jo m'bé Kulocɛliɛ cɔ̀ri wè wi fǎga ki kpíʔile wè ?»

Kakpiʔiligele 15:8

A Kulocɛliɛ míɛni wè, wire ŋáà wi 'siɛnnɛ funyɔ cɛ́n yè, a wi 'ki tìɛ dí wire nyɛ́nì fɔ̀li pe nɛ̄ bɛ̀ wi 'wi Pìle kɛn lè pe mɛ́ nɛ̀ pínɛ wè, majo bɛ̀ wi 'ki kpíʔile weli mɛ́ bèle.

Kakpiʔiligele 8:20

A Piɛri wi sí wi yɛ: «Muɔ nɛ́ muɔ wali ní wè, ye- pínɛ ye cúʔɔ, bɛ̀ ki 'nyaa muɔ 'ki sɔ̀ngi nɛ̀ jo dùʔɔ Kulocɛliɛ yakɛngɛ kiī nɛ suu nɛ́ wali ní wī wè.

Wurɔmiyé 1:11

Yeli nyaa láa ki tɔ̀ni yē mi nɛ̄ kpuʔɔ, dí mi sí kpuʔɔrɔ táà kɛn yeli mɛ́ Kulocɛliɛ Pìle wori dè, ti- ŋɔri nyɔ́gɔ yeli nī.

Korɛntiyé 2 4:4

Kire siɛnnɛ bálì bèle, tɛ́ngɛlɛfun siɛnnɛ bèle, Setɛni wè, duniya ŋáà wi kàfɔli wè, wi 'pe sìnjilige fuu gè nɛ̀ tɔ́n pe nī, pe fǎga gbɛ̀ jáa bè Kirisi kpuɔmɔ Kataanna Siɛnrɛ ti kpìɛnmɛ nyaa bèʔ, Kirisi wire ŋáà wī Kulocɛliɛ líɛrɛ dè.

Korɛntiyé 2 4:6

Nɛ̀ taʔa gíi nɛ̄, Kulocɛliɛ ŋáà wi cé ki juu nɛ́ jo: «Kpìɛnmɛ pi de càanná yebilige sunʔɔmɔ nī bè», wire wi nyɛ́ni wi kpìɛnmɛ cáanri bè weli funyɔ nī yè, gìi ki bé tí we- wire kpuɔmɔ cɛ́n bè, bàa pi nyíʔɛnɛ Zezi Kirisi yiʔɛ nī gè.

Galasiyé 3:2

Ye- sí tí mi 'yeli yúgo kaala nigbe ní wêli: Kulocɛliɛ Pìle lè, yeli 'ni taa Fànʔa Siɛnrɛ kakpiʔiligele nī wī lé, dí yeli 'ni taa bà yeli 'Kataanna Siɛnrɛ lúʔu dè nɛ́ tɛ́ngɛ wè, kire lé ?

Galasiyé 3:5

Á kire 'laa wè, bà Kulocɛliɛ wi 'wi Pìle kɛn lè yeli mɛ́ bèle, níɛ kakpoliyo kele gílì kúu yeli sunʔɔmɔ nī bè, wiī nɛ kire kpínʔini lé nɛ̀ taʔa bɛ̀ yeli yē nɛ Fànʔa Siɛnrɛ tári dè nɛ láʔala dè lé, dí bɛ̀ yeli 'Kataanna Siɛnrɛ lúʔu dè nɛ́ tɛ́ngɛ wè, kire lé ?

Efɛziyé 1:18

Kulocɛliɛ wi- yeli sìnjilige múgu gè, ye- ki cɛ́n sɔ̀ngirɔ taʔadiʔɛ gíì gī baa Kulocɛliɛ wi kayerile nī lè, yé ki cɛ́n ye pínɛ wi kɔrigɔ ki kpuʔɔrɔ tiī nìʔɛrɛ nɛ̀ fàri lɔri cɛ̀nrɛ nɛ̄ wi wuulo mɛ́ bèle.

Efɛziyé 2:8

Ki 'nyaa Kulocɛliɛ kacɛ̀ngɛ kire nyúmɔ nī yeli nyɛ́nì suɔ, tɛ́ngɛlɛ kɛnmɛ nɛ̄ bè. Kiì sí kò majo yeli nī ki 'yɛ̀ʔ, Kulocɛliɛ yakɛngɛ gī.

Efɛziyé 3:7

Nɛ̀ yɛli nɛ́ Kulocɛliɛ wi kpuʔɔrɔ yakɛngɛ ní gè, wi 'wi fànʔa tìɛ gè nɛ̀ ki kpíʔile mi mɛ́, a mi 'kò Kataanna Siɛnrɛ ti baakuɔwɔ.

Efɛziyé 4:7

Nɛ̀ sí ki taa we mìɛni nigbe nigbe bèle, we 'kpuʔɔrɔ taa nɛ̀ yɛli nɛ́ Kirisi wi yakɛngɛ ní gè.

Timote 1 4:14

Ma fǎga Kulocɛliɛ kpuʔɔrɔ faʔa dèʔ dàa wi 'kɛn muɔ mɛ́ dè, tire dáà muɔ 'taa dè lɛ̀lɛ líì nī Kulocɛliɛ siɛnjuulo pe 'ti juu nɛ̀ fílige dè, á tɛ́ngɛfɔlilɔ gboli liɛlɛ pe 'pe kiyɛ taʔala yè muɔ nɛ̄ wè.

Timote 2 2:25

Wi 'yɛli bèri nyu de tìí siɛnnɛ nɛ̄ bèle nɛ́ funnyige ní, bàli pe cìʔí wi tɛnmɛnɛ nɛ̄ lè. Dùʔɔ Kulocɛliɛ bága pe yaʔa pe- pe sɔ̀ngirɔ yiʔɛ dè pe- kányiʔɛ cɛ́n gè,

Timote 2 4:14

Alɛgizandiri wè, fɔ̀ninaguɔ wè, wi nyɛ́nì kapiiniʔɛgɛlɛ kpíʔile mi nɛ̄. Kàfɔli wi bé ki sàri wi mɛ́ nɛ̀ yɛli nɛ́ wi kakpiʔiligele ní gèle.

Eburulo 10:32

Ye- sɔ̀ngi ye taa kɛnmɛ bíì nɛ̄ ki yé puu yeli mɛ́ ki sélimɛ nɛ̄ bè, bà yeli yé Kulocɛliɛ kpìɛnmɛ taa bè, a yeli sɔ́migɔ nɛ̀ yéri cáanra nɛ̄ dè dàa ti 'kpúʔɔ dè, nɛ́ wuʔɔniʔɛyɛ taa yè.

Eburulo 2:4

Kulocɛliɛ míɛni 'ŋɔri nyɔ́gɔ pe siɛnrɛ nī dè, nɛ́ fìɛlɛ ní bèle nɛ́ kanyuʔɔnigɔlɔ ní gèle, nɛ́ kakpoliyo yi mìɛni feliye ní yè, nɛ́ wi Pìle yakɛnrɛ ní dè dàa wi 'liɛlɛ nɛ̀ yɛli nɛ́ wi nyɛ́ni kaala ní lè.

Zan 1 5:16

A wàa 'wi siinyɛni nyaa ŋàa wi kapiile kpínʔini lè nàa ni wè nɛ waa kùu mɛ́ wèʔ, wi de náari wi siinyɛni mɛ́ wè. Bà Kulocɛliɛ bé sìi kɛn wè wi mɛ́, a ki 'nyaa kányiʔɛ, kapiile náà wi kpínʔini lè, ni wè nɛ waa kùu mɛ́ wèʔ. Nɛ̀ sí ki yaʔa kapiile láà yē baa nàa ni waa kùu mɛ́ wè. Kire kapiile lire wuʔu bɛ̀ʔ mi nɛ nyu nɛ́ jo yeri náari wèʔ.