Luku 1:1 - Panake Pi La: Ula: Buka pita: Kine Pieke Buka

¹ Diopilusio. Mo niki tukiki pa꞉ta꞉ pa꞉la꞉eki manuta꞉ mandane wanda꞉hali wotuma꞉ ika꞉ ika꞉ kone honkopu wotu hao wape lao wilimime.

Luku 1:1 Iomraidhean Croise

Maka 16:20

Yesuta꞉ oli hepeni nane pua hata꞉ disaipolo wanda꞉halima꞉ kenke paeyaona꞉ do pi seliapo wala꞉tiki pu hayekeme. Kutupa Tekehalima꞉ mandakena꞉ e pokolo hata꞉ wanda꞉halima꞉ ika꞉ pi ota꞉ pie lena꞉yeke wele pieke ekimanu pimikime. Kutu pimikime.]

Dioni 20:31

Kutu pa꞉la꞉pate ikana꞉ma꞉ Yesuta꞉ mo Ketiso make Koda꞉ ipika꞉ Eiyeke make hala꞉me laa ipiki pa꞉ta꞉ hone tulao hata꞉ ipika꞉ bikina꞉ da꞉ta꞉la꞉eki muemena꞉yeke do ekimanu do bukana꞉ wape pea ula꞉me.

Loma꞉ 14:5

Hali ma꞉nda꞉ ipika꞉ honema꞉ta꞉ nate ma꞉nda꞉ta꞉ tiekee pa mandane nate manuta꞉ paekie hone wita꞉la꞉pate paa hali ma꞉nda꞉ ipika꞉ honema꞉ta꞉ natemanu paeyao homekeeki kone hone wita꞉la꞉me. Hali paeyao homeke homekema꞉ta꞉ Do pa꞉la꞉ ekita꞉ ota꞉ pea꞉peke ya꞉la꞉ekie laa hone wia lea꞉ka꞉na꞉ta꞉ epelieke.

Loma꞉ 4:21

Eipoloha꞉ma꞉ ipikana꞉ma꞉ hone lenkene pa witolota꞉ Koda꞉ma꞉ la꞉ ula꞉ pita꞉ ota꞉ yaapeke ya꞉la꞉me hone wiekeme.

Kolosi 2:2

I̱ma꞉ doeki pitolo ekita꞉ mo wanda꞉halima꞉ pukima꞉ homa꞉ alualu pitolo hata꞉ puki hana꞉ noka꞉pa꞉la꞉ ekima꞉ tumbina꞉ lena꞉ loluekema꞉ pitolome. Do pitolo ekita꞉ ikana꞉ma꞉ ota꞉ tikitiki piki hone wita꞉la꞉eki pa꞉ta꞉ yama꞉ a꞉pa꞉la꞉ hone tulaaseme honkopu muemena꞉ loa꞉me. Do hau pimika꞉na꞉ta꞉ Koda꞉na꞉ a꞉mbao ula꞉eki handilimikie. Do ekita꞉ Ketiso ipiki konee.

Kolosi 4:12

Ika꞉ tapake some ma꞉nda꞉ ombu Epa꞉petasi Yesu Ketisona꞉ pa hameke e pokaasa꞉ halima꞉ a꞉taloe la꞉neaasa꞉me. Ipikana꞉ma꞉ta꞉ hoto paeyao ikina꞉ pukima꞉ e̱ alo haena꞉ yeni peaatiki pu hala꞉me. Ikita꞉ Koda꞉na꞉ hone pa꞉la꞉eki ota꞉ epeke tupa꞉ opitolo hata꞉ da̱o̱la hamena꞉ Koda꞉ pa꞉ta꞉ honke lao hala꞉me. Ipikana꞉ma꞉ dupiki hauta꞉ iki hone homeke wia keileke Ketiso wanda꞉hali hamena꞉ yeke peaasa꞉me laa loa꞉me.

1 Desalonaika 1:5

Hande Pi Seliapota꞉ nikana꞉ma꞉ iki pa꞉ta꞉ mea epoma꞉pate pa pahameke ala꞉ pimanu na mea epeketa꞉ ota꞉ wele tonka꞉na꞉ Holi Sipitidi tonka꞉na꞉ do pita꞉ ota꞉eki laa hone wotu wia mea epoma꞉me. Iki ame̱le̱ hata꞉ pia꞉tiki puma꞉ haumanu make ikana꞉ma꞉ handememe. Iki epeaalo pieki pitolo puma꞉me.

1 Timodi 3:16

Mo nika꞉ Ketiso hauna꞉ teketa꞉ ota꞉ hau tieke dia꞉me pita꞉ ma꞉nda꞉ma꞉ lapeke na ya꞉la꞉me. Do ekina꞉ alome. Ipikita꞉ ota꞉ halina꞉ loke kone mea opolo epeekeme. Mo hande Sipitidima꞉ ipika꞉ yako pa꞉la꞉ ekita꞉ ota꞉ ekie laa peneme waleekeme. Kutupa ipikita꞉ enisoloma꞉ make handeekeme. Ipika꞉ bikita꞉ mo tutu ma꞉nda꞉ ma꞉nda꞉ paeyao pa꞉ta꞉manu make walemekeme. Kutu pieketa꞉ mo kenke paeyao pa꞉ta꞉ haemeke wanda꞉halima꞉ ipiki pa꞉ta꞉ hone tulaemekeme. Kutaa ipikita꞉ Koda꞉ma꞉ oli ya nane hatuku mea peekeme.

2 Timodi 4:17

Kutu pimipate mo Tekehalima꞉ I̱ teke pa꞉ta꞉ hata꞉ I̱ wele peaya꞉me. Kutu pia꞉ ekima꞉ta꞉ mo pi na miki wanda꞉hali paeyaoma꞉ opina꞉ I̱ma꞉ mo Pi Seliapo epeke tupa꞉ waloa꞉me. Kutaa make mo laionima꞉ I̱ lu nena꞉ taapolo pimikieki teke pa꞉ta꞉ ya꞉na꞉ mo Tekehalima꞉ I̱ petelea꞉me.

Hibulu 10:22

Koto pa꞉la꞉ ekima꞉ta꞉ nikana꞉ma꞉ nika꞉ puki pa꞉ta꞉ ota꞉ hau homeke miniki halomeke handa make Koda꞉ pa꞉ta꞉ ota꞉ hone tulaomeke handa make Ketisona꞉ wema꞉ mo nika꞉ hoke hone tekena꞉ tande laaleke halomeke handa make mo kila wiki ikalima꞉ nika꞉ loke tanda꞉paleke handa make koto haloma꞉ ekina꞉ta꞉ ota꞉ Koda꞉ teke pa꞉ta꞉ a꞉pa hamana꞉e.

Hibulu 6:11

Koda꞉ma꞉ ota꞉ pina꞉e hone wilimieki iki pa꞉ta꞉ ota꞉ pina꞉ kima꞉ na homeke honkopu hao hata꞉ mo hande epeke haumanu pa pea꞉tiki pu hamena꞉ niki hone wopu pa꞉la꞉me.