प्रकाशितवाक्य 2:10 - सादरी नवाँ नियम

¹⁰ जे दुःख तोके झेलेक होवी, उमन से ना डराव। काले कि देख, शैतान तोहर में से थोरेक आदमीमन के जेहेल घर में साजेक वाला अहे, ताकि तोहरेमन परखल जबा, आउर तोहरेमन के दस दिन तक दुःख उठाएक होवी। प्राण देवेक तक बिसवासी रहा, तो मोंय तोहरे के जिंदगी केर मुकुट देमूँ।

प्रकाशितवाक्य 2:10 Iomraidhean Croise

मत्ती 10:22

तोहरेमन मोर उपरे बिसवास कराला से लगिन आदमीमन तोहरेमन से नफरत करबैं, मगर जे आदमीमन दुःख तकलीफ केर आखरी बेरा तक मोर उपरे भरसा करबैं आउर हार नी मानबैं उमन के परमेश्‍वर बचाय लेई।

मत्ती 10:28

तोहरेमन उमन से ना डरावा, जेमन काया के तो माइर मोराएक पारबैं, मगर आत्मा के मोराएक नी पारबैं, तोहरेमन उकरे से डरावा, जे आत्मा आउर काया दुयो के नरक में नाश करेक पारेला।

मत्ती 24:13

मगर जे आदमीमन दुःख तकलीफ केर आखरी बेरा तक मोर उपरे भरसा करबैं आउर हार नी मानबैं उमन बाइच जबैं।

मरकुस 13:13

तोहरेमन मोर उपरे बिसवास कराला से लगिन आदमीमन तोहरेमन से नफरत करबैं, मगर जे आदमीमन दुःख तकलीफ केर आखरी बेरा तक मोर उपरे भरसा करबैं आउर हार नी मानबैं, उमन के परमेश्‍वर बचाय लेवी।

मरकुस 8:35

काले कि जे केऊ अपन जीउ के बचाएक चाही, उ जुग-जुग केर जिंदगी के गवाँय देवी। मगर जे केऊ मोर आउर शुभ समाचार लगिन अपन जीउ के गवाँई, उ जुग-जुग केर जिंदगी के पावी।

लूका 21:12

मगर इ सोउब गोइठमन से आगे तोहरेमन मोर चेला हेका, से लगिन उमन तोहरेमन के धारबैं आउर सताबैं, आउर यहूदी मनक प्रार्थना घर में जिम्मा देबैं, आउर जेहेल घर में सजुवाबैं, आउर तोहरेमन के राजामन आउर अधिकारी मनक आगे ठड़ुवाल जाएक ले मजबूर करबैं।

यूहन्ना 12:25

जे अपन जीउ के प्रेम करेला, उ उके गवाँय देवेला, आउर जे इ दुनिया में अपन जीउ के प्रेम नी करेला; उ उके जुग-जुग केर जिंदगी लगिन बचाय लेवेला।

यूहन्ना 13:2

यीशु राइत के अपन चेलामन केर संगे खात रहे। शैतान आगे से हें यीशु के धोखा देवेक लगिन सिमोन केर बेटा यहूदा के उसकाय रहे, जे इस्करियोत गाँव केर रहे।

यूहन्ना 13:27

आउर जइसनेहें यहूदा रोटी केर टुकरा खालक शैतान उकर में ढूइक गेलक। तब यीशु उकर से कहलक, “तोके जे करेक अहे उके तुरते कर।”

खास चेलामन केर काम 20:24

मगर मोके अपन प्राण से कोनों मोह-माया नखे, मोंय तो सिरिफ उ सेवकाई के पूरा करेक चाहाथों, जेके प्रभु यीशु मसीह मोके जिम्मा देई हे, मतलब परमेश्‍वर केर किरपा केर शुभ समाचार के सच्चाई से परचार करमूँ।

खास चेलामन केर काम 21:13

मगर पौलुस उमन के जबाब देलक, “तोहरे इ का कहाथा? तोहरे काइंद-काइंद के मोके काले दुःख देवाथा? मोंय तो प्रभु यीशु केर नाँव लगिन यरुशलेम शहर में ना सिरिफ बाँधल जाएक लगिन मगर मोरेक लगिन हों तेयार अहों।”

1 कुरिनथियनमन 9:25

आउर हरेक पहलवान अपन काया केर सोउब रकम केर इच्छामन के रोकेला, उ तो एगो मुरझाएक वाला मुकुट के पावेक लगिन इ सोउब के करेला। मगर हमरे तो उ मुकुट के पावेक लगिन मेहनइत करिला जे मुरझाएक वाला नखे।

इफिसियनमन 2:2

उ बेरा तोहरेमन इ दुनिया केर आदमी मनक रीति-रिवाज केर मोताबिक चलत रहा, जेमन परमेश्‍वर के नी जानैना। आउर तोहरेमन शैतान केर आगया के मानत रहा जे भूतमन केर उपरे आकाश में राइज करेला। जे एखनोहों उ आदमीमन के अपन कब्जा में करेक केर कोशिश कराथे, जेमन परमेश्‍वर केर आगया के नी मानैना।

इफिसियनमन 6:12

काले कि हमरे लोहू आउर माँस से बनल आदमीमन से नी लड़ाथी, मगर मुखियामन से आउर अधिकारीमन से, आउर अनदिस्तार शक्तिमन से जेमन उ आदमीमन उपरे राइज करैना, जेमन एखनो तक इ दुनिया केर अंधार में अहैं, आउर उ दुष्ट आत्मामन से जेमन फौजमन नियर आकाश में अहैं।

याकूब 1:12

धाइन अहे उ आदमी, जे परीक्षा में स्थिर रहेला, काले कि उ खरा निकइल के जिंदगी केर उ मुकुट के पावी, जेकर करार प्रभु अपन प्रेम करइयामन से काइर हे।

1 पतरस 5:4

जब यीशु मसीह, जे कि हमरे केर मुध चरवाहा हेके, दोबारा फिन से घूइर आवी, तब तोहरे के एगो इनाम देवी जे कहियो अपन चमक के नी हेराई।

1 पतरस 5:8

सोउब बेरा तेयार रहा आउर जागते रहा, काले कि शैतान, तोहर दुश्मन तोहर उपरे हमला करेक चाहेला कि तोहरे आबा परमेश्‍वर केर आगयामन के ना माना। उ गरजेक वाला सिंह नियर अहे, जे आगे-पिछे जाय के इ खोजेला कि उ केखो खाएक पारोक।

प्रकाशितवाक्य 13:14

आउर उ चिन्हामन केर खातिर जेके उ जानवर केर सामने देखाएक केर अधिकार उके देवल जाय रहे, उ धरती केर रहेक वाला आदमीमन के बहकात रहे आउर उमन से इ कहत रहे कि जे जानवर के तलवाइर लाइग रहे, उ जी जाय हे, उकर मूर्ति बनावा।

प्रकाशितवाक्य 13:2

जे जानवर के मोंय देखलों, उ चीता नियर रहे आउर उकर गोड़ भालू केर गोड़ नियर आउर मुँह सिंह केर मुँह नियर रहे। आउर उ अजगर अपन शक्ति, अपन सिंहासन आउर बड़का अधिकार उके देई देलक।

प्रकाशितवाक्य 13:7

आउर उ जानवर के एहो अधिकार देवल गेलक कि पवितर आदमीमन से लड़ोक आउर उ मनक उपरे जीत पाओक आउर उके हर एक गोतर, हर एक आदमीमन, हर एक भाषा आउर हर एक जाइत केर उपरे अधिकार देवल गेलक।

प्रकाशितवाक्य 17:14

इमन मेमना से लड़बैं, आउर मेमना उमन केर उपरे जीत जाई, काले कि उ प्रभुमन केर प्रभु आउर राजामन केर राजा हेके आउर जेमन बोलाल आउर चुनाल अहैं, आउर उकर परती बिसवास लायक अहैं, आउर उमन उकर संगे अहैं, उमन हों जीत जबैं।”

प्रकाशितवाक्य 2:13

मोंय इ तो जानोना कि तोंय हूवाँ रहिसला जहाँ शैतान केर सिंहासन अहे, आउर तोंय मोर नाँव में स्थिर रहिसला। तोंय मोर उपरे बिसवास करेक से उ दिनमन में हों पिछे नी हटले, जेकर में मोर बिसवास लायक गवाह अन्तिपास, तोहर माझे उ ठाँव में मोराल गेलक जहाँ शैतान रहेला।

प्रकाशितवाक्य 2:9

मोंय तोर दुःख आउर गरीबी के जानोना, मगर हकीकत में तोंय धनी अहिस। आउर जे आदमीमन खुद के यहूदी कहैना आउर ना लगैं, मगर शैतान केर सभा हेकैं, उमन केर निंदा के हों जानोना।